Bildiyimiz kimi cari, ilin son ayları ölkəmizdə bələdiyyə seçkiləri keçiriləcək. Cəmiyyətin bu seçkilərə hazırlığı hiss olunmasa da bəzi siyasi partiyaların ara-sıra fəallığı görünür. Onu da qeyd edək ki, Azərbaycan ictimaiyyətinin seçki prosesində kifayət qədər təcrübəsi var. Lakin seçib-seçilmək hüququnu məhdudlaşdİran qüvvələr cəmiyyətdə seçki məfhumuna inamsızlıq yaradıb. Bunun nəticəsi olaraq seçkili orqanlarda ziyalıların iştirakı nisbətən azalıb desək, səhv etmərik. Belə hallar daha çox bələdiyyə seçkilərində özünü göstərir.

İlk günlər daha böyük iddialarla meydana girən bələdiyyə sektoru özünü təsdiqləyə bilmədi. Müstəqil qurum kimi fəaliyyətə başlasa da az sonra müvafiq icra hikimiyyətlərinin əlaltısına çevrilən bələdiyyə sədrləri ancaq torpaq alverçiləri fonunda yaddaşlara həkk olundu. Bu mənada ki, vətəndaşların problemlərini həll etmək əvəzinə eyni sahəni bir neçə şəxsə satmaqla soyğunçuluq görkəmi bağışladılar. Məhz belə neqativ halların şahidi olan ziyalılar bələdiyyə sədrliyindən və üzvlüyündən uzaqlaşmaq məcburiyyətində qaldılar...

Belə ki, cəmiyyətdə baş verən prosesləri və bələdiyyələrin iş prinsiplərini nəzərə alsaq, builki seçkinin tam fərqli olacağını demək olar. Bir neçə ay əvvəl keçirilmiş referenduma əsasən, ölkə ərazisində bələdiyyələrin sayı xeyli azaldılıb. Bundan əlavə qurumun ümumi fəaliyyətini nəzərdən keçirəndə növbəti seçkinin hansı səviyyədə olacağı fikrimcə çoxlarına əyan olub. Amma yenə də siyasi partiyalar bələdiyyə seçkilərinə hazırlaşdıqlarını bildirirlər. Baxmayaraq ki, 2008-ci ildə prezident seçkilərinə siyasi partiyaların çoxu qatılmaqdan imtina etdi. Görəsən bir il ərzində müxalifəti dəyişdirən nə olub? Fikrimcə, bu az müddətdə onlar ancaq ilahi güc hesabına qüdrətlənə bilərdilər. Bu da mümkün deyil...

Ya da ağalarından təlimat belədir. Heç bilmək olmur ki, bunlar hansı dinə, məzhəbə qulluq edirlər. Əsas odur ki, müasir siayəsətçi hesab olunurlar. Odur ki, siyasətçiyə siyasət dərsi keçmək bizim işimiz deyil. Hamısından yaxşısını özləri bilir.

Partiyaların hazırlıq məsələsinə gəldikdə isə həmişə olduğu kimi yenə də hakim Yeni Azərbaycan Partiyası "tam gücü ilə" seçkiyə qatılacağını bildirib. Mətbuat səhifələrində yayımlanan bəyanatlara əsasən, YAP bu sınaqda özünü ən real güc hesab edir. Heç bir rəqib tanımayan iqtidar müxalifəti zəiflikdə suçlamaqdan da əl çəkmir. Əksər resursları əlində toplayan hakim partiya Seçki Məcəlləsini də öz xeyirinə dəyişməklə tam silahlanmış halda əliyalın müxalifəti deyəsən bu dəfə də üstələyəcək. Müxalif düşərgə də "son nəfəslərinə qədər döyüşmək" prinsipini əsas götürüb kəsicilik qabiliyyətini itirmiş qılınclarıyla döyüşə hazır olduqlarını deyirlər. Belə ki, birmənalı olaraq partiyalar bələdiyyə seçkilərinə qatılacaqlarından danışırlar. Bircə qatılmayan Azərbaycan Respublikasının vətəndaşlarıdır. Onlar heç seçki haqqında düşünmürlər də. Çünki çoxu hər şeyin əvvəlcədən həll olunduğunu anlayıb vaxt sərf etmir, böyük əksəriyyət də axşama bir tikə çörək gətirəcəyi haqda düşünür...