Yenidən ilahi bir səs, can və ruhumuzu böyük bir ziyafətə çağırıb, aktual həyatdan bizi gözəl həqiqətə yönəldir. Bu gözəl səs, mübarək və kəramətli bir ayın gəlişini vəd edir. Ramazan ayı hər zamanki kimi, rəhmət və bərəkətiylə birlikdə gəlib çatıb.
Ey insanlar gəlin və böyük mənəvi yarışa qatılın. Bu yarışda hər kəs mükafatlandırılacaq, əməyinin qarşılığını tapacaq. Ey qardaşlar gəlin, Uca Allahın nemət dolu süfrəsinə oturub, ilahi rəhmətlə özümüzü zənginləşdirək. Allahım sənə şükrlər olsun ki, yenidən bu qiymətli ayın varlıq ləzzətini bizlərə daddırdın. Keçmiş zamanlara baxdığımızda zamanın tez axıb getdiyini görürük. Gəlib-keçən zaman axışında gəncliyi orta yaşa, orta yaşı da qocalığa çatdırırıq. Həqiqətən gəlib keçən günlərdə nələr əldə etdik, həyatımızın qiymətli sərmayəsinə hansı təcrübə və zənginlikləri əlavə etdik. Boş qayğılar və həyatın narahatlıqları ruhumuzu danlayır. Lakin bu günlərdə və bənzər saatların müəyyən anlarında bir parlaq nur cilvəsi özünü göstərir. Ramazan günlərindəki fürsətlər çox məhduddur. Lakin eyni halda bu günlər və anlar bizlərə yeni güc və nəfəs qazandıran anlardır. Çünki ramazanın ayında insanlıq və Allaha bəndəlik dəyərlərini yenidən canlandırırıq. İslam peyğəmbəri Həzrət Məhəmməd (s), ramazan ayını, Allahın ayı və səma qapılarının açıldığı ay olaraq xarakterizə edir. Ramazan ayındakı ibadət, insanının bədəni və ruhunu, ən uca əxlaqi və mənəvi dəyərlərlə alışdırıb möhkəmləndirir. Oruc, insana şirin və fərahlı anlar yaşadır. Lakin bu mənəvi ləzzətlərə çatma, şüurlu və faydalı bir səy tələb edir. Əlbəttə bəzi şəxslər, ramazan ayında baş verənlərdən xəbərsiz olaraq bu aydakı nemətlərdən məhrum olurlar. Rəsulullah (s) belə buyurur: "Ey insanlar, Allahın ayı olan ramazan ayı, bərəkət və rəhmət ayıdır. Allah yanında ən yaxşı ay ramazan ayıdır. Bu ayın gündüzləri ən yaxşı gündüzlər, gecələri də ən gözəl gecələrdir. Sizlər bu ayda Allahın qonağı olub, ilahi ziyafətə çağırılmısınız. Sizlərin ramazan ayındakı nəfəsləriniz təsbehdir. Yuxularınız ibadət, əməlləriniz qəbul edilmiş, dualarınız da qəbul edilmişdir. Pak niyyətlərlə Allahı yad edin, Allahdan oruc tutmaq və Quranı tilavət etmək tofiqatını sizlərə əta etməsini istəyin." Həzrət Əli (ə) mübarək ramazan ayı haqqında belə buyurur: Ramazan sizə müqəddəs olsun. Bu ayda çoxlu istiğfar diləyib, dua edin. Çünki Allaha dua və münacatda olmaq bəlaları sizdən uzaqlaşdırar. İstiğfar və tövbə etmək isə günahları aradan aparar. Ziyan uğrayan şəxs, bu ayda ilahi rəhmət məhrum qalan şəxsdir. Ramazan ayındakı aclıq və susuzluq anlarıyla qiyamət günündəki aclıq və susuzluğu anın və düşünün. Yoxsul və yolda qalanlara sədəqə verin. Böyüklərə hörmət edin və kiçiklərə sevgi və məhəbbətlə yanaşın. Kim ramazan ayında gözəl əxlaqlı olsa qiyamət günü çox asan sırat körpüsündən keçəcək. Ramazan ayında cənnət qapıları açılar. Bu qapıların bağlanmamasını Allahdan diləyin. Bu ayda cəhənnəm qapıları bağlanar. Bu qapıların açılmamasını da Allahdan diləyin. Subhanə rabbikə rabbil izzəti əmma
yəsifun, vəssalamu ələl-mursəlin vəlhəmdulillahi rabbil-aləmin.
Dizayn :Networkbil.net . 2009 FAKTXƏBƏR . Dərc olunan materilların mətninə görə, redaksiya heç bir məsuliyyət daşımır. Saytdakı materiallardan istifadə edərkən istinad zəruridir.
