Çox acınacaqlı haldır ki, bəzi hallarda heç bir səbəb olmadan düşməni öz içərimizdə axtarırıq. Əslində bunun özü də bir düşmənçilikdir. Yəqin elə buna görədir ki, ağrılı yerimiz olan Qarabağ problemi neçə illərdir həll edilməmiş qalır. Əsl düşmən isə bundan istifadə edib problemin içərisindən yeni-yeni problem çıxarır, bizim nankorluğumuzdan və korluğumuzdan faydalanırlar. Bu mənada ``torpaqlarımız satıldı`` ifadəsinin tez-tez işlənməsi çox zərərli tendensiyadır. Düşmənimizi birdəfəlik tanımalı, maska altında gizlənmiş xislətinə bələd olmalıyıq. Amma təəssüf ki, hər şeyə ``cibimizin gözü`` ilə baxmağımızdandır, ya nədəndirsə, ölkəmizdə baş verən hadisələri qəsdən başqa cür yozur, necə deyərlər, düşmən dəyirmanına su tökürük...
İsrail prezidenti Şimon Peresin Bakıya səfərindən sonra bəzi mətbuat orqanları bu səfərə etiraz edənlərin məqsədləri ilə bağlı heç bir fakta söykənmədən, əsaslandırılmamış ``dəlillər`` gətirməyə, bununla ictimaiyyəti çaşdırmağa çalışırlar. Guya əhalinin mömin təbəqəsinin, o cümlədən Nardaran əhalisinin, yaxud hansısa digər kəsimin, müxtəlif ictimai-siyasi qurumların Peresin gəlişinə etirazı hansısa başqa ölkənin sifarişidir. Maraqlı cəhət həm də bundan ibarətdir ki, etirazçılar qaragüruh adlandırılır. Ancaq çox təəssüf ki, belə fikirləşənlər istər mətbuat vasitəsilə, istərsə də mitinqlərdə dəfələrlə lap elə hakimiyyətin siyasətinə etiraz ediblər. Yəni onlar fərqindədirlərmi ki, eyni məntiqlə özlərini də qaragüruhçu adlandırmış olurlar?
Yəqin ki, qardaş Türkiyənin hörmətli baş naziri Rəcəb Tayyib Ərdoğanın Davos forumunda Ş.Pereslə məlum mübahisəsi, ona xitabən ``siz adam öldürməyi yaxşı bacarırsınız`` deməsi heç kəsin, o cümlədən etirazçıları qaragüruhçu adlandıranların da yadından çıxmayıb. Yəni belə çıxır ki, Ərdoğan hansısa ölkənin sifarişini yerinə yetirir, ona səs verib hakimiyyətə gətirən on milyonlarla Türkiyə vətəndaşı isə qaragüruhçudur? Əlbəttə, yox. Bir də ki, kiminsə ölkəmizə gəlişinə etiraz etmək nəyə görə başqa ölkə ilə əlaqələndirilməlidir? Yaxud hansısa ölkədə baş verənlərə, ora kimlərinsə gəlib getməsini burda etirazla qarşılamamaq nədən ciddi qəbahət sayılmalıdır? Və ya qəbahət sayılırsa, onda bütün bunlara görə böyük bir kəsimi qaragüruh adlandıranlar bunu etmədikləri üçün özlərini necə, ittihama layiq bilirlərmi? Əgər belə deyilsə, onda nədən özlərinə rəva bilmədiklərini, başqalarına rəva görürlər?
Bəli, bu gün əhalinin böyük bir kəsimi ``dostluqdan``, ``kirvəlik`` siyasətindən dəm vura-vura torpaqlarımızı zəbt edən ermənini, erməni faşizmini lənətlədiyi kimi, sionizm siyasətini də haqlı olaraq ittiham edir. Ən azı ona görə ki, onlar üzdə dostluqdan danışsalar da, Qarabağ müharibəsinin qızğın çağında öz ölkələrində 1500 erməniyə hərbi təlim keçib Qarabağa göndəriblər. Dünyada fəaliyyət göstərən yəhudi lobbisi həmişə erməni lobbisinə, PKK terror təşkilatına yardım göstərib. Bu rejimin Qəzzada törətdiyi misli görünməmiş qanlı olay da onun müsəlmanlara münasibətinin göstəricisidir. Hətta yəhudi xalqı və İsrail zabitlərinin özü buna görə sionizmə ciddi şəkildə etirazını bildirir.
Sionist rejimin başçısına etiraz edənlər əslində bununla onların, Qərb dövlətlərinin, Amerikanın Azərbaycanda apardığı ikili siyasətinə, milli mentalitetimizə zidd mədəniyyətlərinin ölkəmizə gətirilməsinə, Qarabağla bağlı ermənipərəst siyasətlərinə qarşı çıxırlar. Çünki həmin
Qərb, ABŞ hökuməti, sionist rejim yaxşı başa düşür ki, bir xalqın mənəviyyatına, dininə zərbə vurmaqla onun sərvətlərini rahatca daşıyıb aparmaq olar. Ona görə də mətbuata yol tapır, iradəsi zəif adamları arayıb-axtarır, maliyyələşdirib onların vasitəsilə mənəviyyatımıza, dinimizə qara yaxır, bu dəyərlərin qorunması uğrunda mübarizə aparanlara böhtan atırlar. Belələri başa düşməlidirlər ki, düşmənlərimizin məqsədi öz əlimizlə özümüzü baltalamaq, bu yolla xalqımızı düşmənə qarşı mübarizədən çəkindirməkdir. Çünki necə deyərlər, sapı özümüzdən olan baltanın yarası sağalmır...
|
