Bir müddət öncə Somalidə aclıqdan ölənlər üçün yardım karvanları başladı. Hamı əlindən gələn yardımları etdi. Kimi 5 manat, kimi 10 manat. Yardım edən dövlətlər də yox deyildi. Milyonlarla dollar, ərzaq göndərildi.

Yardımlardan sonra isə məlum oldu ki, sən demə Afrikadakı BMT anbarları aclıqdan əvvəl də ağzına kimi dolu imiş, sadəcə müəyyən maraqlar naminə bu yardımlar insanlara çatdırılmayıb.

Çox qəribə bir vəziyyət yaranmışdı. Hamı Afrika üçün ağlayırdı. Elə bu gün də ağlayır. Çünki Afrika dünyanın ən zəngin qitəsi olmasına baxmayaraq, bu qitənin xalqı bir içim suya, gündəlik qidaya möhtacdır.

Gəlin baxaq görək Afrikanın nəyi var.

Cənubi Afrika Respublikasında, Zimbabvedə almaz, CAR, Qana, Mali və Konqoda qızıl, demək olar ki, əksər ölkələrində neft, Qvineya və Qanada boksit, şimal sahillərində fosfor, maqnezium, dəmir, sink, Namibiyada uran yataqları mövcuddur. Əlavə olaraq onu da qeyd etmək lazımdır ki, bu yataqlar zəngin yataqlardır.

Amma bu qitə acdır.

Çünki zəngindir. Zəngi olduğu üçün də imperialist güclər bu ölkələrin demək olar ki,  hər birində vətən müharibəsi adlanan nifaq toxumu səpiblər. Və başlarını öz problemləri ilə məşğul ediblər. Bu problemlərdən isə məharətlə yararlanırlar, daşıyıb aparırlar bir ucdan məzlumun malını. Heç pay da vermirlər sahiblərinə. Ki, acından ölməsinlər. Zatən acından ölmələri, bir-birini qırmaları daha sərfəlidir. Ölkələr boş qalanda sərvəti talamaq daha rahatdır axı.

Amma Afrikanın səfalətində diqqətdən qaçan bir məqam da var. O məqamsa ondan ibarətdir ki, imperialist güclərin nəzarətində olan və milyardlarla dollarlıq büdcəyə malik şirkətlər - "Microsoft", "Apple", "Coca-Cola", "McDonalds", "Mercedes", "Nokia" və sair və ilaxırlar bu acından ölənlər üçün tüklərini belə tərpətmədilər. Bəlkə siz eşitmisiniz bu cür şirkətlərin hansısa acından ölən Afrika ölkəsinə yardım etməsini? Lap elə hələ də səfalət içində olan somalililərə 100 milyarddan aşağı olmayan büdcələrindən 100 milyon ayırdıqlarını? Hansı ki, onların ən az tanınmışının təkcə reklam büdcəsi illik olaraq 500 milyondan aşağı deyil.

Dünyada yüz milyonlar bu gün həm də bu şirkətlərdən birinin - "Apple"nin yaradıcısı Stiv Cobsun ölümünə göz yaşı axıdır. Yəni qəribə bir paradoks yaranıb. 1 nəfər ölür yüz milyonlar ağlayır, amma 1 milyon ölür stiv cobslar ağlamır.