İtaliyanın Venesiya şəhərində iyun ayının əvvəlindən açılan növbəti dünya Təsviri İncəsənət Sərgisində baş verənlər Avropa mətbuatında fəal müzakirəyə səbəb olub. Söhbət Azərbaycanın Milli pavilyonunda sərgiyə qoyulan rəssam Aydan Salahovanın əsərlərindən gedir.
Avropanın bir çox tanınmış qəzetlərində az qala manşet xəbəri kimi verilən bu məsələ senzura kimi dəyərləndirilsə də, əslində söhbətin mənəviyyatdan getdiyini hər kəs bilir. Məlumatda qeyd olunur ki, iyunun 1-i pavilyona gələn Azərbaycan prezidenti İlham Əliyev Salahovanın iki əsərini bəyənməyərək tənqid edib və bundan sonra həmin əsərlərin üstü örtülüb.
Britaniya mətbuatı yazır ki, İlham Əliyevin bəyənmədiyi əsərlərdən biri kataloqda "Gəlin" adı ilə qeyd olunur və yalnız əlləri görünən qara çadralı müsəlman qadınını əks etdirir. "Qara daş" adlı digər əsər isə Məkkədəki qara daşın interpretasiyasıdır.
Maraqlıdır, görəsən Heydər Əliyev mükafatçısı, dinlərarası sülhün möhkəmləndirilməsində xidmətlərinə görə "III dərəcəli Şöhrət və Şərəf" ordeni ilə təltif olunan Rusiya İncəsənət Akademiyasının vitse-prezidenti Tahir Salahovun qızı Aydan Salahova o cür gəlini harada görüb? Guya Azərbaycanı təmsil edən birinin belə bir əsərlə Azərbaycanı Avropaya necə tanıtmaq istəyir? Əslində Salahovanın biabırçı əsərləri tək bununla bitmir. O, incəsənət azadlığı adı altında əslində İslam dinini açıq-aşkar təhqir yolunu tutub. Onun sərgidə nümayiş olunan səviyyəsiz əsərlərindən biri də, dünya müsəlmanlarının qibləgahı, müqəddəs Kəbə evinin bir küncündə bərklidilmiş "Qara daş"ı qadının cinsiyyət orqanı kimi təqdim etməsinin özü belə səviyyəsizlik nümunəsidir. Amma onun İslam dinini təhqir edən əl işləri təkcə bununla bitmir. Aydan Salahovanın şəxsi veb səhifəsində və sərgidə nümayiş etdirdiyi, müsəlman qadınını, məscidi təhqir edən şəkilləri, sadəcə bu şəxsin İslama necə nifrət etdiyinin bariz nümunəsidir. Məhz İslama bu cür nifrətin səbəbidir ki, Qərb mətbuatı da onun əsərlərindəki təhqirləri görməzlikdən gəlib onların "qismən" nəyəsə oxşadığını yazıb.
Məsələnin qəribə olan tərəflərindən biri isə, Salahovanın Azərbaycanda yaşamayıb Azərbaycanı təmsil etməsidir. Görəsən bizim Mədəniyyət və Turizm Nazirliyimiz nə işlə məşğuldur ki, Azərbaycanı Azərbaycanda yaşayan deyil, Moskvada yaşayan təmsil edir? Azərbaycanı təmsil edəcək kimsəmiz yoxdurmu? Yetişdirə bilmirikmi? Dinlərarası sülhün möhkəmləndirilməsində xidmətlərinə görə "III dərəcəli Şöhrət və Şərəf" ordeni alan bir şəxsin qızının dinimizi təhqir edərək bizi təmsil etməsi nəyimizə gərəkdir?  Görəsən nə vaxta kimi müstəqil Azərbaycanımızın adı "incəsənət azadlığı" və ya hansısa "azadlıq" adı altında səviyyəsizlik siyahısında gedəcək?
Deyəsən bizdə azadlıq elə bu cür ölçülür. İncəsənət azadlığı adı altında İslam təhqir olunur, söz azadlığı adı altında İslam təhqir olunur, təhsil almaq hüququ bir kənara atılaraq, insanların dini seçim azadlğı tapdalanıb hicab azadlığı əlindən alınır, əlindən alınmış hüquqlarının bərpası üçün söz söyləmək azadlığın əlindən alınır, xanımlarımızın əsl Azərbaycan xanımı kimi, milli adət-ənənələrimizə layiq şəkildə geyinməsi azadlığın pozulması kimi dəyərləndirilir və sair və ilaxır. Bütün bunların qarşılığında isə soyunmaq azadlıq sayılır, gecə səhərədək barlarda qışqırmaq, içib küçələrdə əcaib siqnallarla səhərədək insanların istirahət hüququnu pozmaq, fahişəlik azadlıq sayılır, mavilərə hüquq tanınır, təbliğ olunur, hər gün televiziya ekranlarından bizə əxlaq, mənəviyyat dərsi keçirlər. Bütün bunlar azadlıq sayılır. Əgər bu kriteriyalardan biri səndə yoxdursa, demək sən köləsən. Ən qısası, əgər İslama hər hansı bir bağlılığın varsa, sən köləsən, sənin azdlığın yoxdur.
Amma Rüstəm Behrudi demiş,

Azadlıq - Bakıda
Gecələr sağ-solu
Fahişələrlə dolu
Gedib dənizə dirənən
Ən uzun bir küçənin adıdır.