Onu bu cür heç görməmişdim. Həmişə optimistcəsinə hər kəsin kef və halı ilə maraqlanan dostum bu gün həmişəkindən fərqli idi. Maddi sıxıntılar azmış kimi, bu dəfə mənəvi böhran onu büsbütün bürümüşdü. Bu köşəmi "Mən Allahımı günbəgün unuduram, əlimi ona tərəf açmağa belə utanıram. Günahın qalınlığı bütün qəlbimi möhürləyib" deyən və hədsiz ümidsizliyə qapılmış bir dostuma həsr edirəm...Mənə nə qədər çətin olsa da! Həmişə gün kimi ətrafı nurlandıran dostumun indi gül kimi solmağının səbəbi nədir?! Sənə kim öz mənfi nəfəsini üfürdü ki sən bu cür soldun?! Dostum, elə bildin mən də səni atacam və halına görə mən də sənədən soyuyub sənə soyuq münasibət bəsləyəcəm?! Yox dostum, mən əsla səndən üzümü nihan etmərəm. Çünki məni bu cür ədəbləndirməyiblər. İndi sənin solmağına səbəb olan bu ümidsizlik bir vaxtlar mənə də üz vermişdir. Mən də sənin kimi solmuşdum. Hamıdan küsmüşdüm. Hamıdan narazı idim. Ətrafımdakı insanları görmürdüm. Çarəni özümə qapılmaqda görürdüm. Bir gecə özüm barədə çox fikirləşdim. Arxivimdə olan bütün məni oyada biləcək işıqları yandırmağa çalışdım. Allah rəhmətinə qovuşmuş tərbiyəçimin mənə qaranlığa düşəndə nə etməm barədə dedikləri nəsihətlər yadıma düşdü. O deyərdi: "Oğlum nə vaxt ümidsizlik sənə qələbə çalsa və hər şeydən, hər kəsdən ümidin kəsilsə dediklərimi yadına sal, ümid edirəm ki, o çıxılmaz divarlar arasından xilas olacaqsan. Ümidsizlik. Çox pis bir əməldir. Yaddan çıxarma ki, sənin Rəbbin hər şeyə qadirdir və səni həyatın bu qaranlıq imtahanından yalnız o xilas edə bilər". Necə? "Mən deyim, sən isə dinlə, dediklərimi ürəyinin bir kənarına həkk et. Unutma ki, aqil şəxs heç vaxt Allahdan ümidini kəsməz. Onun isti nəvazişindən bəhrələnər, bəşər vəfasızlığını unudar. Sənə tövsiyə etdiyim bu Dost hətta sən ananın bətnində də olanda səni düşünüb, sənin üçün lazım olan ruzini hazır edib. Səni tək qoymayıb. Sən dünyaya gələndə çox çarəsiz və gücsüz idin. O ananın qəlbinə sənin məhəbbətini saldı və pərvanə kimi səhərə kimi sənin başında fırlandı. Əgər sən də nə vaxt ümidsizliyə qapılsan düşün ki, Allah sənə üç qat zindan olan ana bətnində unutmadı, sənə kömək etdi, səni xəstəliklərdən qorudu, sənə ruzi verdi və bu dünyaya gətirdi, bir anda olsa səndən qəflət etmədi. Hər vaxt nəyə ehtiyacın oldusa sənin üçün hazır etdi. Bu köməklikləri sənə ondan istəmədiyin halda edirdi. Bizləri o qədər xətərələrdən qoruyub, xəstəliklrədən şəfa verib, problemlərimizi həll edib. İndi deyirsən həmin o vəfalı Dost səndən qafil olub, yoxsa xəsislik edir?! Yox əsla". "Əgər mənəvi tənəzzül və günahların çoxluğu səni ümidsizliyə doğru sürüklərsə, unutma, sənin Dostun həm sənin dirçəlişində və həm də tənəzzüldə olduğun zaman yanındadır. Onu sev! Çünki O səni sevib, seçib, dostların arasında hörmətli edib. Ümidsizlik səni gəncliyində yaxalayacaq və səni hər şeydən məhrum edəcək. Yaxşı dostlarından və bir fərd kimi formalaşmağından. Umutma ki, ümidsizlik özü keçmişdə etdiyin bütün günahlara və xətalara bərabərdir. Ümidsizlik sənə dediyim həqiqi Dostundan qırılmaqdır. Bu isə çarəsi olmayan bir bəladır. Heç vaxt onu unutma, ondan ümidini kəsmə bu sənin qırmızı xəttindir. Bütün günahlar bağışlanmağa məhkumdur. Ümidsizlikdən başqa". Belə dostum, ümidsiz qaranlıq gecədə qulaqlarımda cingildəyən bu nəsihətlər elə bil məni dərin bir yuxudan ayıltdı. Səhər tezdən qəlblərini qırdığım, əlaqəmi kəsdiyim bütün dostlarımı aradım-axtardım. Həyata yenidən atıldım. Özümü ona tərəf gedən karvana qoşdum. Daha insanlardan heç vaxt küsmədim, incimədim. Çünki, hamıda hansısa kiçik çatışmamazlıqlar olur. İnsanlar fərqlidir. Bəzən şəxsi maraqlarına, bəzən isə nəfsi istəklərinə görə dostlarını, hər şeylərini qurban verirlər.Bütün varlığımla Ona, həqiqi dostuma bağlandım. Elə bu səbədən hələ sənin yanındayam. Səni unutmamışam dostum. Narahat olma. Səninləyəm, səni unudacaq qədər səni az istəmirəm. Ümid edirəm ki, sən də həqiqi Dostun ətəyindən tutub ucalacaqsan. Qaranlıqlara qərq olmamaq ümidi ilə!
Allah yeganə varlıqdır ki,biz ondan qafil olanda,bizdən qafil olmaz,Onu unutsaq bizi əslən unutmazvə ən başlıcası başqalarına ümid bəsləyib kömək gözlədiyimiz anda yalnız Allah bizə aglımıza gəlməyən yerdən kömək edər.Bu cür Allahı olan şəxs daha niyə ümidsizliyə qapansın
Dizayn :Networkbil.net . 2009 FAKTXƏBƏR . Dərc olunan materilların mətninə görə, redaksiya heç bir məsuliyyət daşımır. Saytdakı materiallardan istifadə edərkən istinad zəruridir.
