Diqqət edin, bu cür saytlar heç zaman seçki saxtakarlığı ilə bağlı hüquq müdafiəçisi Novella Cəfəroğludan münasibət öyrənməzlər. Çünki Novella xanımın seçki saxtakarlığı ilə bağlı verəcəyi münasibət bu saytın "obyektivliyi" ilə uzlaşmaz. Qaldı ki, dərc olunan yazıda adını çəkmək istəmədiyim ikinci xanımın münasibətinə, onun kimliyi və İslam haqda olan fikirləri cəmiyyətə çoxdan məlumdur. Saytın qərəzli məlumat yaymasının digər tərəfi bundan ibarətdir ki, bu sayt heç zaman hicab haqda öz müsbət fikirlərini söyləmək istəyən kəslərin, bir dəfə də olsun münasibətini öyrənib dərc etməyib. Bu sahədə münasibəti isə ancaq konkret şəxslərdən, konkret göstəriş əsasında öyrənirlər.

Münasibətdə dərc edilən fikirlərə gəldikdə isə deməliyəm ki, hər iki xanımın gətirdiyi absurd dəlillərin süstlüyü məlumatlı insanlara bəllidir. Tənzilə xanım aksiyanın sifarişli olduğunu, hicabın inkişafın qarşısını aldığnı deyir. Görəsən heç bir sübut olmadan belə qərəzli fikirlər səsləndirmək, demokratik düşüncə tərzi ilə nə dərəcədə uzlaşır?! Görəsən fikir səsləndirdikdə fakta əsaslanmağı, sübut gətirməyi nə vaxtdan yaddan çıxarmışıq? Görəsən Tənzilə xanım nəyə görə hicaba qoyulan qadağanın sifarişli olmasını söyləmir? Əgər araşdırmadan boş ittiham atmaq belə asandırsa, o zaman biz Tənzilə xanımın da sifarişli olaraq belə fikrilər səsləndirdiyini rahatlıqla söyləyə bilərik. Özünü insan haqlarının müdafiəçisi kimi tanıtmaq istəyənlər, nəyə görə bu millətin özünə qayıdış rəmzi olan hicabı inkişafa zidd adlandırır? Axı inkişaf deyəndə belə insanlar nəyi nəzərdə tutur? Bu gün Azərbaycan təhsildə, elmi inkişafda, insan haqları sahəsində, korrupsiyada və digər başqa sahələrdə nəyə nail olub? Geriyə addımların səbəbi də hicabdırmı?! Hicab əqidədir. Kimisə əqidəsinə görə təhsildən məhrum etmək, həm vicdan haqlarına, həm də ibtidai insan haqlarına ziddir. Demokratik düşüncəyə malik olan, eyni zamanda beynəlxalq və ölkə qanunvericiliyindən xəbərdar olan məntiqli insan bunu asanlıqla çözə bilər.

Novella xanıma gəldikdə isə, onun bu kimi fikrilərinin "Deyerler.org" saytına söylədikləri fikirləri ilə üst-üstə düşmədiyi maraq doğurur. Bura Azərbaycandır Novella xanım. İnsanlar artıq tükü-tükdən ayırmağı yaxşı bacarır. Hazırda inanclı insanların təhsil alması ilə bağlı problem yaşanır. Və siz də bir hüquq müdafiəçisi kimi bunu gözəl bilirsiniz. Zatən "Deyerler" saytında da bunu söyləmisiniz. Hicab inancdır. İnancı isə kiminsə əlindən zorən almaq demokratiyaya həqarət və qanunazidd bir addımdır. Hüquq müdafiəçisi kimi Novella Cəfəroğlu olaraq sizin borcunuz tapdalanmış insanların haqlarını qorumaqdır məncə.