Yazının adını oxuyub yəqin ki əksəriyyətiniz Azərbaycan Müdafiə Sənayesi Nazirliyinin ABŞ-ın "Petriot" raketlərinə oxşar silah istehsal edəcəyini düşündünüz. Amma gərək bağışlayasınız, bu belə deyil. Yazının adını bu cür seçməyimə səbəb, artıq neçə gündür ölkədə hökm sürən hicab tüğyanına dəstək verən həmkarlarımın özlərini patriot kimi qələmə verərək, doğal haqlarını qorumaq üçün ayaqlanan insanları aşağılamasıdır. Əslində onlar PATRİOT deyil, elə "PETRİOT"dur və üzərilərində MADE İN AZERBAİJAN yazılmasına baxmayaraq, işğalçı qaniçən bir rejimin - Amerikanın illərdir üzərlərində sərf etdikləri gərgin əmək sayəsində hər yerdə onların maraqlarını qoruyan MADE İN USA holoqramlı "PETRİOT" bombalarıdır ki var.

Şəxsi tanışlığım olmasa da, aradabir tədbirlərdə gördüyüm "voanews" əməkdaşı Fərhad Tapdıqoğlunu yaxşı tanıyıram. Onun sadəcə bir xəbərçi olduğunu düşünürdüm. Amma bir neçə gün əvvəl saytların birində yayımlanmış yazısını gördükdə, fikirləri ilə tanış olmaq qərarına gəldim. Düzü yazını oxumağıma səbəblərdən biri kimi "İmam üçün ağlayanda, bir az da Yezid üçün də ağlamaq lazımdır" başlığı oldu. Təəccüblənmədim. Çünki, müsəlman ola-ola Kərbəla səhrasında qətlə yetirilən 9 aylıq körpəyə deyil, İslam üçün ailəsini qurban verməyə hazır olan, İslam yolunda şəhidlik mərtəbəsinə yüksələn İmam Hüseynə deyil, Qarabağda, Fələstində, İraqda, Əfqanıstanda qətliam edilənlərə deyil, Yezidə ağlamaq üçün gərək Yezid xislətli olasan. Zatən bu xislətin formalaşması üçün elə Amerikanın çörəyini yeyib də, onun ağzı ilə qətliamı ört-basdır etmək yetərlidir.   

Yaxşı, gəlin görək, nədən yazıb bu Tapdıq bəy, nədən narahat olub(lar)? Sən demə, Azərbaycanda dövlət məktəbləri dünyəvidir. Bəh-bəh-bəh. Nə gözəl, nə pakizə. Hələ bir də din də dövlətdən ayrıymış. Tapdıq bəy, (xahiş edirəm, sənin kimi düşünən insanlara, o cümlədən komsomol Misirə də bu sözləri yetirəsən. Onların məndə əlaqə vasitələri yoxdur, yoxsa özüm şəxsən deyərdim. Sizin sıx əlaqənizin olmasına isə ona görə əminəm ki, sözləriniz bir mərkəzdə hazırlanıb ötürülür və başlayırsınız tutuquşu kimi hər gün ardıcıllıqla ötməyə - A.M ) görəsən sən, dövlət başçısı İlham Əliyev dövlət hesabına məscidləri təmir etdirəndə niyə dinin dövlətdən ayrı olduğunu söyləmirdin? Yaxşı, bu dövlətdən ayrı olan dinin başqa bir nümayəndələrinin - yəhudilərin başlarında kipa ilə məktəbə daxil olmasını niyə görmürsən? Yox, məncə görürsən, sadəcə dilin möhürlənib. Tapdıq bəy, yəqin sənə də maraqlı olar, görəsən din dövlətdən ayrıdırsa, komsomol Misir dövlət idarəsində stolunun üstündə Qurani-Kərim kitabını hansı əsasla saxlayır? Bəs buna nə ad verək? Məncə din dövlətdən ayrı deyil. Çünki dinin dövlətdən ayrı olduğunu sübut etməyə çalışmaq, dindən başqa da bir dinin olduğunu isbat etməyə cəhd deməkdir. İslamda isə özündən din icad edənlər kafir hesab olunur. Çətin ki Azərbaycanda belə bir adı üstünə götürən ola.

Sonra bizim həmkar, yazır ki, Azərbaycan qanunvericiliyinə və dini fəlsəfəyə görə, insanlar yalnız həddi-buluğa çatdıqdan və ictimai münasibətləri dərk etdikdən sonra baxışlarını müəyyən edə bilər. Burada da Tapdıq bəyin şaltay-baltay vurduğu açıq nəzərə çarpır. Tapdıq bəy, yaşınız çox olmasaydı, deyərdim ki, Misir müəllimin nazir olduğu vaxtda orta məktəbi bitirmisiniz. Maraqlıdır, siz həddi-buluğ vaxtı deyəndə nəyi nəzərdə tutursunuz? Sizin yaşda olan insanı, yoxsa orta məktəbdə sizin oxumadığınız "Anatomiya" dərsində insanların yetkinlik yaşına nə vaxt çatmasıyla bağlı deyilənləri?   

Bütün bunlardan sonra Tapdıq bəyin, əslində bu yazını ona sifariş edənlərin, qarın ağrılarının səbəbi bəlli olur. Sən demə, Tapdıq bəy narahat imiş ki, dindarlar öz hüquqlarını qorumaq üçün onun ağalarının daim toplantı keçirdiyi ən bahalı oteldə toplanıb, bu sifarişin sionizmdən, qaniçən, işğalçı rejimlərdən gəldiyini bəyanlayıblar. Və bu toplantı siyasi xarakterlidir. Bah-bah. Nə gözəl tapıntı, adə tez bunun adını Nobelçilərin siyahısına saldırın. Tapdıq bəy, bəyəm siyasətlə məşğul olmaq qranta Qarabağı satanlara aiddir ancaq? Bax, yazının bu yerində bir şeyi düz yazmısan - "aparıcı siyasi partiyalar belə, yuxarıların tapşırığı olmadan bir neçə yüz adamı bir yerə toplamaq bacarığı nümayiş etdirə bilmir." Bax buna əhsən. Özündə qeyd etdiyin kimi, onlar ancaq tapşırıqla oturub-durular. İstər müxalifət, istərsə də iqtidar partiyaları. Amma bir şeyi yadından çıxarırsan, dindarlar siyasət üçün deyil, namus-qeyrətlərinə edilən hücumlar üçün ayağa qalxıblar. İnsanın namus-qeyrətini qoruması üçün tapşırıq almağa ehtiyac yoxdur. Qarabağ kimi namusumuzu 2003-cü ildə ABŞ səfirliyində kimlərin satdığını sən məndən yaxşı tanıyırsan. Amma dindarların bir nümayəndəsi kimi Seyid Mübariz İmam Hüseyn məktəbindən dərs aldığını, namusunu qorumaq üçün tapşırıq gözləməyə ehtiyac olmadığını göstərdi.  

Tapdıq bəy, işlədiyin media orqanının yardımı ilə dünyanın əksər Avropa ölkələrində olmusan. Maraqlıdır, "dünyəvi məktəb siyasəti" dedikdə sən nəyi nəzərdə tutursan? Saytımızın dünənki yayımında bəzi Qərb dövlətlərinin təhsil nazirlərinin hicabla bağlı fikirlərini oxucuların ixtiyarına vermişdik. Onlar yekdilliklə hicabın təhsil sisteminə heç bir ziyanı olmadığını bəyanlayırdılar. Əksər Avropa ölkələrində nəinki hicabla təhsil ocağına daxil olmaq, hətta pasporta belə şəkil çəkdirmək olar. Bundan əlavə, təhsil ocaqlarının dini mübahisə mərkəzinə çevrilə biləcəyi narahatçılığını yazmısan. Nədən qorxursan belə? İslamın bütün dinlərdən üstün olduğunu bilib, daim mübahisələrdən qalib çıxdığından, beləliklə də İslama üz çevirənlərin sayının artmasından, yoxsa təhsil alanların mübahisə və müzakirələr nəticəsində daha da savadlanacağından?
Sonra dindarların "məktəblərdə hicab" şüarını israrla müdafiə etdiyi halda, bunun əksinə olaraq, vətəndaş cəmiyyətinin liderlərinin, hüquq müdafiəçilərinin, ziyalıların, hətta hökumətin susduğunu yazırsan. Sənə and verirəm, ağladığın o Yezidin goruna, vətəndaş cəmiyyətinin liderləri, hüquq müdafiəçiləri, ziyalılar deyəndə kimləri nəzərdə tutursan. Bu məsələ qalxandan FaktXeber.com və Deyerler.org saytı kifayət qədər vətəndaş cəmiyyətinin liderlərinin, hüquq müdafiəçilərinin, ziyalıların problemi pisləyən münasibətlərini dərc edib. Ki, onları sən də yaxşı tanıyırsan. Bu şəxslər sırasına Rauf Arifoğlu, Qənimət Zahid, Asim Mollazadə, Pənah Hüseyn, Fazil Qəzənfəroğlu, Ərəstun Oruclu, Hikmət Hacızadə, Leyla Yunus, İqbal Ağazadə, İsa Qəmbər, Əli Kərimli və onlarla sair və ilaxırlar var. Hökumətin nümayəndələri isə "Fatı qalx, Fatı otur" üslubu ilə iş görürlər. Kimin nə həddi var deyə ki, Azərbaycan Respublikasının filan maddəsində hər bir vətəndaşın təhsil almaq hüququ var və dövlət də onu təmin etməyə borcludur.

Sonra bir gün Azərbaycanda da İrandakı, İraqdakı, Əfqanıstandakı, Pakistandakı kimi "fanat bombaları"nın partlayacağına işarə edirsən. Tapdıq bəy, İslamın əlifbasının "əlif"indən xəbəriniz olmadı üçün deyim ki, İslamda, onun müqəddəs kitabı Qurani-Kərimində "bir insanı öldürən, bütün insanlığı öldürmüş kimidir" deyə yazılıb. İslama üz tutanlar, namaz qılan, oruc tutan insan, intiharın, adam öldürməyin cəhənnəm əzabına düçar olacağını çox gözəl anlayır. Sən özün də gözəl bilirsən ki, sadaladığın ölkələrdə özlərini partladanlar vəhhabi əqidəsinin nümayəndələridir və onun da başında zəmanənin Yezidi - Barak Obamanın prezidenti olduğu Amerika və onun kəşfiyyat orqanı olan CİA durub. Yalan deyirəmsə, Allah mənə lənət etsin.        
İslamın heç bir kitabında yazılmayıb ki, özünü partladan cənnətə düşəcək. Bəli, düşmənlə mübarizəyə çağırış edilib, amma üzbəüz vuruşmağa. Daha məscid, metro, avtobus, təyyarə, bina partladıb günahsız insan öldürməyə yox. Yazılmayıb ki, amerikalıların içində olduğu avtobusu partlat, cənnətə düşəcəksən. Yazılmayıb ki, bir ABŞ əsgəri öləcək deyə, təyyarəni partlat, cənnətə düşəcəksən. Bunun belə olacağını düşünmək belə ağılsızlıqdır. Amma sənə bu yazını sifariş edənlərin ortaya çıxan kəşfiyyat sənədlərində şiə məscidi partladıb günahı sünnünün, sünnü məscidi partladıb günahı şiənin, təyyarə, bina, kilsə partladıb günahı müsəlmanın üstünə yıxmaq var. Yalan deyirəmsə, Allah mənə lənət etsin.

Tapdıq bəy yazının sonunu bu cür bitirir: "Hər halda dindarların öz dediyi kimi, imam üçün ağlayanda, bir az da yezid üçün ağlamaq lazımdır. Şeyx Nəsrullahlara ziyalılar cavab verməyəndə, kefli İsgəndərlər cavab verir. Amma, deyəsən, bizim cəmiyyətin kefli İsgəndərləri də yoxdur..."

Görəsən Tapdıq bəy "Yezidə ağlayan dindar" deyəndə kimi nəzərdə tutur? Yəqin ki, ona elmi ateizmdən dərs keçib, bu cür səviyyəsiz atalar sözü qondaranları. Çünki ağlı başında olan, namaz qılıb, oruc tutan dindar heç vaxt Yezidə ağlamaz. Yezidə ağlayanı da Yezid qismində görər. O ki qaldı Şeyx Nəsrullah məsələsinə. Çox fikirləşdim, bu qisimdə sən və sənin kimilərdən başqasını görmədim, İslamı aşağıladığınız, gözdən salmaq istədiyiniz, özünüzün İslam adına qondardığınızı bizə yedirtməyə çalışdığınız üçün. Cəmiyyətimizin kefli isgəndərləri də var. İnanmırsan? İstəyirsən yazının əvvəlinə qayıt, yaxşı-yaxşı bax.

Görmürsən, "Kefli İsgəndəri"?!