Deyəsən Azərbaycan bu dəfə müasir texniki inkişaflarına görə dünyada birincilər sırasında olan Yaponiya və Almaniya ilə rəqabət aparmaq istəyir. Niyə də rəqabət aparmasın? 10 ilin içində regionun lider ölkəsinə çevrilə bilirsə, deməli dünyada da bu liderliyi qazanmaq mümkündür. Belə ki, adını qeyd etdiyim ölkələr yeni mühafizə kameralarını nümayiş etdirdikləri sərgidə, Azərbaycan da yanğın söndürən balonlarını göstərdi. Sərginin Bakıda keçirilməsi gör neçəyə başa gəlib ki, odlar diyarını sözün əsl mənasında alovlandırıb. Bu mənada yanğın balonlarının işə düşməsi təbii hal kimi qəbul olunmalıdır.
Söhbət liderlik və rəqabətdən düşmüşkən, ölkəmiz bir çox sahələrdə artıq uğurlu nəticələrə imza atıb. Elə götürək bir neçə gün əvvəl təhsil naziri çox hörmətli Misir Mərdanov cənablarının təhsil sistemində qazanılan müvəffəqiyyəti ölkə ictimaiyyətinə açıqlamasını. Hörmətli nazir özündə güc tapıb, ictimaiyyət qarşısına çıxaraq bildirdi ki, uzun illər çalışdıqları məsələ artıq uğurlu həllini tapıb. Yəni təhsil müəssisələrinə hicablı xanımların buraxılmamasına axır ki, nail olublar. Misir müəllim bu istiqamətdə gecə-gündüz çalışdığını və yollar axtardığını da söylədi. Öz etirafına görə kimsə onu başa salıb ki, vahid məktəbli forması məsələnin ən obyektiv həllidir. O zaman heç kim səsini çıxarda bilməyəcək. Onsuz da yazıq millət ağzına su alıb sakitcə durub, çənəsini tərpətmir ki...
Bəli, bu, təhsilimizdə çox yeni nailiyyətdir, bəlkə də inqilabdır! Hələ özünü demokratiyanın beşiyi hesab edən Birləşmiş Ştatlar və Avropa belə qanun ortaya qoya bilməyib. Onların məktəbləri elə kökdədir ki, hərə bir cür geyinir. Amma bizdə hamı eyni forma geyinməli, eyni sumka götürməli və hətta eyni qələmyonandan istifadə etməlidir. Hələ eyni şeyləri də fikirləşməlidirlər, zavallı şagirdlər. Yoxsa nəinki sinif otağına, məktəbin darvazasına həsrət qalarlar. Buna ümumi formada təhsilimizin "eynilik nailiyyəti" də demək olar. Axı bizə təhsil lazım deyil. Neynirik dərsin səviyyəsini? Təhsilin keyfiyyəti kimi maraqlandırır? Bizi ancaq bir şey düşündürür, övladlarımızı diplomlu görmək, vəssalam.
Təhsilimizin uğurlu nailiyyətindən danışdıq. Görəsən bunu cəmiyyətimiz necə qəbul edir? Hicaba qarşı qoyulan qadağaya etiraz edəcəkmi bu cəmiyyət, yoxsa "yoldaş Mərdanovun əmridir" deyib duracaq? Görünən odur ki, Mərdanov cənabları həqiqətən qəhrəmanlıq edib. Amma təhsildə deyil, insanların dünya görüşündə. Bu cəmiyyət o qədər cılızlaşıb ki, iffətindən belə asanlıqla vaz keçir?..
Yox, inandırıcı deyil, axır ki, qəflət yuxusundan oyanıb kimliyinə qayıdacaq, yumruğunu bərk sıxıb, özündə güc tapacaq. Amma təəssüf ki, hələ uyumaqdadır... Hələ düşmənə yem olan bu məmləkəti yağıların dişindən saldıran yox! Hələ dərələr dibinə düşən milləti dağlar zirvəsinə qaldıran yox! Oyan, oyan Azərbaycan xalqı. Bu xəyanət millətimizə ünvanlanıb. Təkcə dindarlar mübarizə aparmalıdır deyənlər yanılırlar. Axı, qadının iffəti onun hicabındadır, qeyrətli və vətən sevgisi ilə doğulan igidləri də məhz iffətli analar dünyaya gətirir. Bu mənada hicaba deyil, vətənimizə uzanan çirkin əllərin kəsilməsi üçün birləşmək və mübarizəyə qalxmaq lazımdır. Yoxsa Azərbaycan adlı bir məmləkətin varlığı sual altına düşəcək!!!
Salam bəy, hicab Allahın əmridir. İnsanları dini və irqi, eləcədə milli mənsubiyyətinə görə bölənlərin, haqqa üsyan edənlərin "hicab" oyunu bir şeyi göstərir: artıq cəmiyyət intihar həddindədir. Hicaba üsyan Allaha düşmən kəsilməkdir. Allaha düşmən kəsilənlərə təkcə Firon və Nəmrudu misal gətirmək yetər. Cəmiyyətin intiharına gəldikdə isə bir şeyi unutmaq lazım deyil ki, intihar edən bəzən yanındakıları da özüylə birgə intihara sürükləyir, məhv edir. sığındığımız və tapındığımız Allah hər şeyi yaxşı görürür. Bədbəxtlərin "xoşbəxtlik" arzusu Allaha üsyan etməklə reallaşa bilməz. Bunun fərqində olmaq lazımdır. Sözsüz ki, Allah mərhəmətli və ədalətlidir. Bütün azadlıqlar onun iradəsi ilə müəyyən olunur.
Dizayn :Networkbil.net . 2009 FAKTXƏBƏR . Dərc olunan materilların mətninə görə, redaksiya heç bir məsuliyyət daşımır. Saytdakı materiallardan istifadə edərkən istinad zəruridir.
