"(Ya Rəsulum!) Mömin qadınlara de ki, gözlərini haram buyurulmuş şeylərdən çevirsinlər (naməhrəmə baxmasınlar), ayıb yerlərini (zinadan) qorusunlar (və ya örtülü saxlasınlar); öz-özlüyündə görünən (əl, üz) istisna olmaqla, zinətlərini (zinət yerləri olan boyun, boğaz, qol, ayaq və s. naməhrəmə) göstərməsinlər; baş örtüklərini yaxalarının üstünə çəksinlər (boyunları və sinələri görünməsin); zinət yerlərini ... başqasına (naməhrəmə) göstərməsinlər; gizlətdikləri bəzək şeylərini (xalxallarını) göstərmək üçün ayaqlarını (yerə və ya bir-birinə) vurmasınlar. Ey möminlər! Hamınız Allaha tövbə edin ki, nicat tapasınız!" (Nur surəsi 31)
Mənfur kommunist rejimi dağıldıqdan sonra müsəlman Azərbaycan xalqının intizarı bu idi, yenidən müstəqillik tapmış Vətənimizdə, təzə dövlətçiliyimizdə dövlətçilik məsuliyyətini öhdəsinə alanlar artıq xalqın dərdini və mənəvi-maddi çətinliklərini nəzərə alıb tam müstəqilliklə müsəlmançılıq və xalqımızın min illərdən bəri bizə gəlib çatan, milli-mənəvi adətlərimizi nəzərə almaqla inkişafa tərəf hərəkətə keçəcəyik. Sən demə bu müsəlman xalqın başın hələ çox oyunlar açılacaqmış. Əvvəlcə azan sonra məscid və daha sonra örpək və s...
Bu günlərdə mətbuatda təhsil nazirliyinin örpək haqqındakı açıqlamaları bütün qeyrətli müsəlman xalqımızı, düşmən müqabilində və əsirlikdə belə örpəklərini başından açmayan ana-bacılarımızı son dərəcədə qəzəbləndirib və təəccübləndirib.
Qəzəbləndirib o mənada ki, bəzi dövlət məmurları vəzifə tapan kimi özlərini keçmişdəki Misir fironları kimi Allah hesab edir və bəziləri isə özlərini Allahdan da yuxarı məqamda hiss edirlər. Təbii ki, belə halətlər tarixdə çox olub. Müqəddəs kitabımız Quranda belə oxuyuruq: "(Firon dedi:) Həqiqətən, mən sizin ən uca Rəbbinizəm!" (Naziyat surəsi 24). Bəziləri hətta, özlərini məsxərəyə qoyub Allahı göydə axtarmaq fikrinə də düşüblər. Bu haqda da müqəddəs Qurani-Kərimdə xəbər verilir: "Firon (istehza ilə) dedi: "Ey əyanlar! Mən sizin üçün özümdən başqa bir tanrı olduğunu bilmirəm. Ey Haman! Mənim üçün od qalayıb palçıqdan kərpic bişir və bir qüllə tikdir ki, (ora qalxıb) bəlkə, Musanın tanrısına tamaşa edim. Axı mən onu, həqiqətən, yalançı sayıram! (Qəsəs surəsi 38).
Bütün buna bənzər hadisələri Allah-taala Quranda ona görə nəql edir ki, kimliyindən və məqamından asılı olmayaraq, tarix boyu çoxları Allahın göndərdiyi peyğəmbərlərə və dinə qarşı var qüvvələri ilə mübarizə və müharibə aparıblar, amma heç biri öz hədəflərinə çata bilməyib, nəticədə isə tarixdə özlərinə ilk növbədə, Allah-taalanın qəzəbini, dünya və axirətdə əzab və lənətini qazanıblar. Bu haqda müqəddəs kitabımız Quranda oxuyuruq: "Allah da onu (fironu və onun kimiləri) axirət və dünya əzabına giriftar etdi." (Naziat surəsi 25) Başqa bir ayədə yenə oxuyuruq: "(Biz) Bu dünyada onlara lənət damğası vurduq (hamı onlara lənət oxuyar), Qiyamət günü isə onlar çirkin (iyrənc, Allahın rəhmətindən kənar edilmiş) kimsələr olacaqlar." (Qəsəs surəsi 42) Və nəhayət, bu haqda yena də müqəddəs Quranda oxuyuruq: "Şübhəsiz ki, bunda (Allahdan) qorxan kimsələr üçün ibrət dərsi vardır." (Naziat surəsi 26)
Amma, örpək haqqında belə açıqlama qeyrətli müsəlman xalqımızı təəccübləndirdi ona görə ki, əvvəla bizimlə müsəlman və qeyri-müsəlman qonşu ölkələrində xüsusilə, Rusiya kimi qeyri-müsəlman bir ölkədə örpək azad olan halda bizdə nəyə görə belə bir problem olmalıdır?! İkincisi, görəsən Misir Mərdanov kimiləri xalqımızın min illik İslami və milli-mənəvi adətini qadağan etməyə səbəb nə olub, kimin sifarişi olub və bu işə hansı ixtiyarla cürət edib? Müsəlman xalqın məktəbli və ali savadlı ana bacılarının örpəyini başından açıb yerə atmaq dövlət məmurunun və nazirinin işidi, yoxsa bu məsələ, müsəlman xalqın Allah-taalaya olan imanı və mənəvi etiqadıdır? Üçüncüsü, ölkəmizdə müharibə gedən bir vaxtda, vətən, din və qeyrət müharibəsi olan bir vəziyyətdə, müsəlman xalqın etiqadını möhkəmlətmək və hamının bir düşmənə tərəf birləşməyə şiddətlə ehtiyac olduğu zamanda, Misir Mərdanovu müsəlman xalqı, dövlətlə qarşı-qarşıya qoyub yeni bir cəbhə açamağa məcbur edən bir qanunun tətbiq olunmasına kim məcbur edib?
Vətənimizin bu ağır şəraitində müsəlman xalqın təhsil nazirliyindən intizarı bu idi ki, müsəlman xalq üçün müqəddəs İslam dinin tərbiyəvi və mədəni göstərişlərindən o cümlədən, örpək və əxlaqi proqramlardan və mənəvi dəyərlərindən məktəblərdə istifadə edilməsi üçün xüsusi proqramlar təşkil edəcək, yeniyetmə, cavan oğlan və qız məktəblilərimizi milli-mənəvi ruhiyyədə böyüyüb təhsil almalarına şərait yaradacaqlar.
Bu gün Misir Mərdanov kimilər bilməlidirlər ki, hətta bu qanun tank və top gücünə tətbiq olunsa belə, xalqımızın qeyrətli və namuslu müsəlmanları öz qız övlad, ana və bacılarının örpəklərini başından açmayacaq və Allah-taalanın müqəddəs Quranda buyurduğu qanununa və əqidə azadlıqlarına əməl edəcəklər!
|
