Qədir-Xum bayramı dinin Kamillik bayramıdır. İlk öncə bütün müsəlmanları bu bayram münasibətilə təbrik edirəm. Məhərrəm ayı da yaxınlaşır. Bu o deməkdir ki, İmam Huseynin (ə) dostları əzaya qərq olacaqlar. Lakin yalnız əzadarlıq etmək İmam Huseynçi (ə) deməkdir? Yalnızca qara geyib, sinə vurmaqla hər şey həll olsaydı, İmam Zaman (ə.f) niyə zühur etsin ki? Bəli, bu əzadarlıq Məhərrəmi yaşatmaqdı. Ancaq İmam Huseynin (ə) hədəflərinin heç olmasa 10 faizi xalqa başa salınmasa, bu əzadarlıqların faydası yoxdur. Bunu mən yox, Şəhid Mütəhərri deyir.
Öz günümüzə nəzər salaq. Məscid sökülməsi baş tutmadıqdan sonra, planlı hiyləsi keçmişdən cızılan hicab qadağası gündəmə gəldi. Misir Mərdanov hicabla bağlı açıq-aşkar öz mövqeyini önə çəkdi. Düzdü, vaxtilə Misir müəllim "hicab qadağası yoxdur" demişdi. Ancaq onun dediklərini deyiriksə, hamısını demək lazımdır. O "əgər ictimayyət vahid məktəbli formasının hər məktəbdə özünə uyğun surətdə olmasını dəstəkləsə və məktəblilərin 80, 90 faizi qərara riayət edərsə, onda məcburi qərar qəbul ediləcək, o zaman məktəbə hicabla gəlmək sualının cavabı mənfi olacaq" demişdi. Bu nə deməkdir? Bu o deməkdir ki, Misir Mərdanov "hicabla məktəbə gəlmək qadağandır!" sözünü özünəuyğun surətdə deyir. Bəlkə məscidlər söküləndə hansısa məmur dedi ki, "məscid söküləcək"? Məmurlar deyirdi: "Bu məscid deyil, qanunsuz tikilidir. Qanunsuz tikililər söküləcəkdir!".
Bizim mentalitetdə, görürük ki, şəxsi qeyrət məsələsilə bir az ehtiyatlı olunmalıdır. Misir müəllimin açıq-aşkaq "hicab qadağandır!" deməməsinin bir səbəbi də budur. Qeyrətin uzun müddət dəyərsiz təqdim edilməsi səbəblərinin üstü indi açılır. Görürük ki, televiziyalarda "qeyrət" Qərb dəyərlərinə ziddir, bir aktyorun "mən həyat yoldaşımı xəyanətindən sonra bağışlamışam" deməsi və bunun reklam roliki kimi xalqa yeridilməsinin arxasında bu cür qadağalar zamanı "neynəyək, hökümətlə hökümətlik edək? Hicabsız gedər məktəbə" kimi ideologiyaların quraşdırılması dururmuş. Lakin qeyrət Allahın verdiyi şeydir ki, bu hər kəsə verilsə də, hər kəsdə qalmaz.
Beləliklə, Azərbaycanın möminləri həm dini qeyrət, həm də ki, şəxsi qeyrətlərinin müdafiəsini düşünməlidirlər.
Yuxarıda Məhərrəmdən boş yerə söz açmadım. İmam Huseyn (ə) açıq-aşkar deyir: "Adi vaxtlarda namaz qılanların sayı çox olar. Elə ki, imtahanlar başladı, möminlərin sayı azalar". Digər yerdə isə, İmam Huseyn (ə) buyurur: "Mənim kimilər, heç vaxt Yezid kimilərə beyət etməz!". Bəli, günümüzdə İslam əleyhinə atılan hər bir addım, verilən hər bir qərar, Yezidi xatırladır. Məscidin müdafiəsinə qalxan, hicabın qeyrətini çəkən hər bir mömin isə, İmam Huseynə (ə) bənzəməyə çalışır və bu addımları ilə İmam Huseynin (ə) dediyi beyət məsələsini davranışıyla sübut edir.
Son olaraq Misir müəllimin timsalında hər bir məmura demək istəyirəm ki, İslam oyun-oyuncaq deyil. Məktəbli formasını fikirləşəndə, hicabı ora daxil etməmisinizsə, daxil etməyiniz gərəkdir. Həm də ki, ictimaiyyət deyəndə YAP-ımı düşünürsüz? Biz əgər Azərbaycan vətəndaşıyıqsa, onda biz də bu ictimaiyyətin bir üzvüyük. Və bizim də haqqımızı tanımalısınız. Qərar qəbul edəndə hansısa məmurların və xarici amillərin deyil, xalqın nəzəri öyrənilməlidir. Bu nəzər nə vaxt öyrənildi?
Bəli, lazım gələndə, qərarlar dəyişilməlidir. İstər şifahi olsun, istər yazılı.
QMİ rəsmisi Hacı Fuadın dediyi kimi, "hicablı uşaqları məktəbdən çıxaranlar milləti dövlətə qarşı qaldıranlardır. Bu təxribatdır". Hər halda, bu fikirlə biz də razıyıq.
|
