Milli Məclisə keçiriləcək seçkilərə 24 saatdan az vaxt qalıb. Artıq bu gün saat 08:00-dan etibarən deputatlığa namizədlərin təbliğat və təşviqat kompaniyaları dayandırılıb. Bu vaxtdan başlayaraq seçkiqabağı təbliğat və təşviqatla məşğul olmaq Seçki Məcəlləsinə tələblərinə əsasən qadağandır. Sabah saat 08:00-da isə parlament seçki marafonuna start veriləcək. Seçkilərdə 125 dairə üzrə 690 namizəd mübarizə aparacaq. Seçkiləri qeydiyyatdan keçən 48 mindən artıq müşahidəçi izləyəcək. Onlardan 1024 beynəlxalq müşahidəçilərdir. Ən böyük beynəlxalq müşahidə missiyaları Müstəqil Dövlətlər Birliyi, ATƏT-in Demokratik Təsisatlar və İnsan Hüquqları Bürosu, Avropa Seçki Müşahidə Akademiyası, ATƏT-in və Avropa Şurasının Parlament Assambleyalardır.

Bütün bunlara baxmayaraq, mən Azərbaycan Respublikasının vətəndaşı olaraq yaşadığım dairədən kimə səs verəcəyimi hələ də müəyyən edə bilməmişəm. Çünki səsverməyəqədərki təbliğat və təşviqat kompaniyası zamanı əvvəlki illərdən fərqli olaraq yolların çəkilməsi, obyektlərin tikilməsi və ya seçicilərə pulların paylanmasını açıq-aşkar görməmişəm. Müşahidə etdiyim seçki prosesləri zamanı namizədlərin öz seçicilərinə necə pullar verdiyini gördüyüm üçün, builki seçkilər mənə bir az qəribə gəlir. Ola bilər ki, buna səbəb namizədlərin əvvəlki illərdən praktika toplayaraq, indi aşkar səhvlərə yol verməməsidir. Bundan əlavə İTV kanalında namizədlərin biri-birinə qarşı ifadə etdiyi fikirləri gördükcə, seçkilərdə iştirak etmək mənim üçün ürəkbulandırıcı hala çevrilib. Çünki seçəcəyim namizədlərin iç üzünü görüb, onların deputat olmaq üçün bir-birinə necə təhqir etdiyini müşahidə edib və bundan əlavə əvvəlki illərdə deputat olmuş insanların indi nə edəcəyini fikirləşib seçkilərdə iştirak etmək mənə xeyli ağır gəlir. Hər hansı bir deputatın öz namizədi üçün edəcəyi ən böyük hallardan biri budur ki, həmin millət vəkili öz dairəsində ədaləti bərpa etsin. Dairəsində ədalətsizliyə son qoysun, rüşvətin, narkomaniyanın, hərc-mərcliyin kökünün kəsilməsində böyük pay sahibi olsun. Lakin mən öz dairəmdən olan namizədlərimə baxdıqda onların arasında elə bir insanı görmürəm. Bəlkə də günah məndədir ki, gözlərim yaxşı görmür. Bəlkə də günah namizədlərdədir ki, onlar görünməz hala çevriliblər. Amma görünən bir şey var ki, mənim dairəmdə təhsildə problem, polisdə qanunsuzluq, səhiyyədə rüşvət hələ də mövcuddur. Və heç kim bu problemlərin həll olunması üçün nə bir söz deyir, nə də bir addım atır və ya bunları etməyi fikirləşir. Namizədlər sadəcə insanların heysiyyatı ilə oynayaraq, onların ümidlərini puça çevirərək deputat olmaq arzusundadır. Elə bir namizəd yoxdur ki, o məhz seçicilərini fikirləşsin və dairənin problemlərinin həll edilməsində köklü işlər görsün.  İndi mən Azərbaycan xalqına səslənərək soruşmaq istərdim ki, namizədlərin qalib gəlmək üçün saxta namizəd yaradaraq seçkidə iştirak etməsini görərək, hökumət və qeyri-hökumət təşkilatlarının qucağına düşərək onlardan alınan maliyyə hesabına seçkidə iştirak etdiyini müşahidə edərək, seçicilərinin və dairəsinin vəziyyəti ilə əslində heç maraqlanmayan namizədlərdən kimə səs verim?