Son zamanlar cəmiyyətimizə elə bil nəsə olub. Artıq bəzi insanların hərəkət və əməllərindən iyrənirəm, onların bu əməllərini rədd edirəm. Hər gün səhər baxıram ki, xəbər kanallarında və agentliklərində müzakirə olunacaq xəbərlər iqtisadi və siyasi xəbərlər olmaq əvəzinə, təcavüz və intihar xəbərləri olur. Məsələn, "ərini başqası ilə aldatdı, baltalandı", "16 yaşlı qız təcavüzə məruz qaldı", " öz qardaşı qızını zorladı" və ya "qardaş bacısını zorladı", "qadın özünü 16-cı mərtəbədən atdı", "iki uşaq anası intihar etdi" və sair xəbərləri oxumaqdan yıpranmışam. Fikirləşirəm ki, ya mən yaşlanıram və bu tip hadisələrə qarşı dözümüm azalır, ya da Azərbaycan xalqı təcavüzkar və intihara meylli xalqa çevrilir.
Amma təcavüz və qadını alçaltmaq mədəniyyətinin bu cür adi hal alması insanı ümidsiz edir. Ölkəmizin hər guşəsindən uşaq və qadın təcavüzü xəbərləri gəlir. Amma məni əsl düşündürən nəsnə bu təcavüzkarlara verilən cəzadır. Məsələn bir qrup insan bir qıza davamlı təcavüz edir və məhkəmə qızın razılığı var deyə, günahkarlara yalnız qısa müddətli həbs cəzası verir və ya məhkəmədən azadlığa buraxılır. Siz deyin, mən necə ümidsizliyə qapılmayım?
Elə bil cəmiyyət sönüb, hər hansı bir şeyə qarşı etiraz etmir. Etiraz edəndə də, adını qanunsuzluq qoyub onu elə yerindəcə boğurlar. Ən əhəmiyyətli olan da vətəndaşın, xalqın fikirləri və məsələyə münasibətidir. Yəni cəmiyyət təcavüzü qarşı çıxarsa, təcavüz edən insanlara sərt reaksiya versə, onlarla "iyrənc məxluqlar" kimi davransa, bu davranışlar qanunlardan da təsirli olar. Amma cəmiyyətimiz deyəsən bu xəbərlərə adi bir xəbər kimi baxır. Əgər cəmiyyətimiz təcavüz və intihar xəbərlərinə yaxşı baxırsa, onda mənim deməyə sözüm yoxdur. Axı qadın yüksək məqamlı məxluqdur. Axı onun cəmiyyətdə daha mühüm vəzifələri var. Onu bu cür alçaldanlar niyə cəmiyyətdə azad gəzməlidirlər. Cəmiyyət gərək bu hadisələrə biganə qalmasın, yoxsa nəticəsi çox ağır olacaq. Biz gərək bu yolda əlimizdən gələn mübarizəni edək. Övladlarımızın və həyat yoldaşımızın xəbərlərdən necə təsirlənəcəyi barədə düşünək.
Dostlar, gəlin birlikdə təcavüzə və intihara hər dillə yox deyək.
"Təcavüzə və intihara kəskin şəkildə nifrət edirəm"! "Təcavüzü ticarət obyektinə çevirənləri rədd edirəm"! ""Dişi it quyruq yelləməsə" fikrində olanları rədd edirəm"! "Qadın kişinin əlinin çirkidir" fikrində olanları rədd edirəm"! "Əşi intihar edir, etsin də mənə nə deyənləri rədd edirəm"! "Qadını öz əmlakına çevirənlərə nifrət edirəm"! "Təcavüzü qəbul edənlər cəmiyyətdən qovulsunlar"! "Təcavüz edənlərə ağır cəzalar tətbiq olunsun"! "Təcavüzə məruz qalan xanımlara maddi və mənəvi dəstək göstərilsin"! "Təcavüzlə razılaşan qadınları rədd edirəm"!
Əziz xalqımız, mən iyrənirəm və rədd edirəm, bu əməlləri şərəfsizlik adlandırıram. Sizi də eyni duyğuları bütün həyatınıza yaymağa dəvət edirəm. Gəlin birlikdə bu mübarizəyə qoşulaq. Sağlam, pak gələcək və gənclik naminə.
Dizayn :Networkbil.net . 2009 FAKTXƏBƏR . Dərc olunan materilların mətninə görə, redaksiya heç bir məsuliyyət daşımır. Saytdakı materiallardan istifadə edərkən istinad zəruridir.
