Xəbər verildiyi kimi ərzaq məhsulları ciddi şəkildə bahalaşacaq. Çünki, təbii fəlakətlər və normadan artıq yağıntılar kənd təsərrüfatını iflic vəziyyətə salıb. Ona görə də ərzaq məhsullarının istehsalı bir neçə dəfə azalıb. Nəhayət çox tutqun və vahiməli bahalaşma dalğası dünyanı bürümək üzrədir. Amma narahat olmayın,  bu məlumatın zərrə qədər bizə dəxli yoxdur. Əslində biz bahalaşmanın qarşısını vaxtında almışıq. Yəni Azərbaycanda mövcud hakimiyyət əlindən gələni edib, bütün tədbirləri həyata keçirdib ki, qiymət artımı reallaşmasın. Afərin belə idarəçiliyə...

Elə bu zaman təqribən 2 il əvvəl - 2008-ci il dünyanı cənginə alan, çox böyük şirkətləri diz çökdürən və sair bu kimi işlərə imza atan beynəlxalq iqtisadi böhran yadıma düşdü. Onda da misli görünməyə maliyyə uçrumu ölkəmizdən yan keçmişdi. Əlbəttə bu, bizim daim həyata keçirdiyimiz qabaqlayıcı tədbirlərin nəticəsidir.

Bundan əlavə digər ölkələrdə pul verib əvəzinə təhsil mənimsənilirsə, Azərbaycanda tam əksinədir, para verib təhsildən yayınılır. Yaxud, başqa ölkələrdə vətəni qorumaq şərəf və baş ucalığı sayılırsa, bizdə hərbi xidmət kimlərinsə əlindən yaxa qurtarmaqdır. Ya ildə bir neçə min para tərləməlisən, ya da gedib, min bir əzaba qatlaşıb, gələnə qədər evdəkilərin yediyini zəhər etməlisən.

 Həə, zəhər demişkən, bu yaxınlarda ordumuzun güzaranı, vətən keşiyində duran əsgərlərimizin vəziyyəti ilə yaxından tanış oldum. Dostlardan biri mənə zəng vurub dedi ki, bacıoğlunu həbs ediblər gəl gedək. Səbəbini də bildirdi. Sən demə, bacıoğlu üç ay əvvəl təlxis olunub. Gəlib evdən aldadıb aparıblar ki, gedək bir izahat yaz, sonra qayıdıb gələrsən. Bu adla aparıb 332.2.3 maddəsi ilə haqqında cinayət işi qaldıraraq, həbs qətimkan tədbiri seçiblər. Gedib müstəntiqi tapdıq. Bizə elə dil tökdü ki, mən əvvəlcə bacıoğlunun həqiqi günahkar olduğunu zənn etdim. Nəhayət bəlli oldu ki, başqa bir əsgər xidmət apardığı zaman postda yatıb. Bunlar da gəlib ona deyiblər ki, niyə yatırsan? Bunu bilən komandir əsgərləri yanına çağırıb onların böyük cinayət törətdiklərini xatırladıb və bildirib ki, siz yatan əsgərə təzyiq göstərmisiniz, o da özünü öldürə bilərdi. Əgər valideynlərinizə desəniz, onların da əlləri ciblərində olsa, yatan yoldaşınız əbədi yatmaq eşqindən vaz keçəcək. Yoxsa, sizin özünüzü bir neçə illik yatmağa göndərəcəyik. Komandir cəld tərpənib. Yatan əsgərdən döyülməsi ilə bağlı izahat alır. Sonrası da belə.

Xatırladım ki, hadisə olan vaxt bacıoğlunun təlxis olunma əmri verildiyi üçün onu evə buraxır və sonradan cinayətə cəlb etmək fikrinə düşürlər. Belə də oldu. Hərbi məhkəməyə qədər qaldırılan dırnaqarsı cinayət işi iki gəncin ya həbs olunması, ya da 4-5 min manat tərləmələri ilə nəticələnməlidir. Nə isə gedib, işi aparan məhkəmə ilə görüşdük. O da ciddi cinayətin törəndiyindən söz açdı. Bizim üçün cinayət məcəlləsini açıb əsl hüquq dərsi keçməyə başladı. Belə asanlıqla uşağı qurtara bilməyəcəyimizi görüb bazarlığa keçdik. O, bizə dəqiq məbləğ deməyib, köməkçisinin hüzuruna yolladı. Köməkçisi də bir neçə dəfə nazirliyə zəng etmək bəhanəsi ilə hakimin yanına girdikdən sonar bu cinayətin yuyulması üçün 4 min manatın zərurili olduğunu dedi. Nə bilim filan qədər prokuror, filan qədər müstəntiq, filan qədər yuxarı, çox cüzi miqdarda da buradakılara çatacaq. Hakim sizə hörmət edib öz payını istəmir. Biz də, gedin həbs edin, bu qədər pulumuz yoxdur, deyib otaqdan çıxdıq. Yenidən prokurorluğa qayıdanda çox həyasız ifadənin şahidi olduq. "Bəli, Mübariz sağ qayıtsaydı, onu da həbs edəcəkdik". Bu sözü prokuror, övladını əsgər kimi vətənin keşiyində durmağa göndərən valideynə deyirdi. Sən demə, onlar da eyni acını yaşadıqları üçün prokurora deyiblər: "Siz milli qəhrəman Mübariz İbrahimov sağ qayıtsaydı, onu da həbs edəcəkdiniz?"

Artıq prokurorun cavabını eşitdiniz. Bu cavab həm də qürürla danışdığımız milli ordumuzun vəziyyətini şərh edir. Nə yaxşı, nə yaxşı ki, şəhid oldun, sağ qayıtmadın, Mübariz İbrahimov. Adlı-sanlı hamının qəlbində yaşayaraq, torpaqda çürümək. heç kimin yadına düşmədən həbsdə çürüməkdən daha yaxşıdır. Allah ruhunu şad etsin!