Son vaxtlar İslam düşmənləri aldıqları məvaciblər müqabilində həddən artıq yollarını azmaqlarından əlavə, özlərindən təzə kəşflər də etməyə başlayıblar. Maraqlısı budur ki, 14 əsrdən çox bir müddətdə bütün İslam düşmənlərinin və dünya alimlərinin tapmadıqları və cürət edib dillərinə gətirə bilmədikləri bir mövzunu "ALMAÇILAR" dillərinə gətirmiş və özlərini gülünc vəziyyətə qoyaraq, həm dünyada və həm də axirət aləmində özlərinə zülm etmişlər.

Nə isə, onlar belə bir iddia ediblər ki, guya "Quranda uyğunsuzluq var!" Yaxşı olardı ki, onlar əvvəlcə bu fikri öz sponsorlarına verib azca fikirləşəydilər, bəlkə də ağılları başına gəlib belə bir iddia etmək fikrinə düşməzdilər. Çünki, belə planlar çoxdan təcrübədən çıxıb və nəticə verməyib. Amma axurlarının dolu olmasına görə, belə bir yalan və iftiraya əl atmışlar.

İslam düşmənləri ilk gündən Quranın müqabilində vəhşətə düşmüş və Quranın ecazkarlığını etiraf edə bilməsələr də, onu inkar da edə bilməyiblər. Sonda vəhşətlərini gizlədə bilməyərək, Quranı sehr, İslam Peyğəmbərini (s) isə sehrbaz adlandırıblar. Bu da onların acizliklərini nişan verir, Quranda bu haqda oxuyruq: "O (Quran barəsində) fikirləşdi və (orada deyilənləri öz ürəyində) ölçüb-biçdi. 19. Ölüm olsun ona! Necə ölçdü-biçdi?! (Peyğəmbərə sehrbaz dedi).  20. Yenə də ölüm olsun ona! Necə ölçdü-biçdi?! 21. Sonra (qövmünün üzünə) baxdı. 22. Sonra üz-gözünü turşutdu, qaşqabağını tökdü. 23. Sonra da (imandan) üz çevirdi, (Peyğəmbərə tabe olmağa) təkəbbür göstərdi. 24. Və dedi: "Bu (sehrbazlardan) öyrənilən sehrdən başqa bir şey deyildir!" ("Müddəssir" surəsi 18-24)

Quran haqqında aylarla fikirləşib tədqiqat apardıqdan sonra heç bir bəhanə tapa bilməyən Vəlid ibn Müğeyrə, o zaman ərəb dil ədəbiyyatını ən yüksək səviyyədə bilən və zəmanəsinin dil alimlərindən biri, özü də ərəb idi. Amma bu gün millət və xalqının etiqadına zərrə qədər də ehtiram qoymayan və Qurana irad tutanlar, ərəb dilinin zənginliyndən xəbərləri olmadıqları halda, Qurana irad tuturlar. Onsuz da 1400 ildən çoxdur ki, İslam düşmənləri çalışırlar ki, bu işi görsünlər amma, bacarmırlar və bacara da bilməyəcəklər.

Quranda bu haqda beş yerdə xüsusi aylər vardır: "1. "Əgər bəndəmizə (Muhəmmədə) nazil etdiyimizə (Qurana) şəkkiniz varsa, siz də (fəsahətdə və bəlağətdə) ona bənzər bir surə gətirin və əgər ("bu, bəşər kəlamıdır" sözünü) doğru deyirsinizsə, onda Allahdan savayı (bütün) şahidlərinizi (bütlərinizi, şair və alimlərinizi bu işdə köməyə) çağırın!" (Bəqərə surəsi 23)  2." (Ya Peyğəmbərim!) De: "Əgər insanlar və cinlər bir yerə yığışıb bu Qurana bənzər bir şey gətirmək üçün bir-birinə kömək etsələr, yenə də ona bənzərini gətirə bilməzlər". (İsra surəsi 88)  3. "Yoxsa: "(Peyğəmbər) onu özündən uydurdu!" - deyirlər. De: "Əgər doğru deyirsinizsə, ona (Qurana) bənzər bir surə gətirin və Allahdan başqa, kimə gücünüz çatırsa, onu da (köməyə) çağırın!" (Yunis surəsi 37) 4."Yoxsa (müşriklər): "Onu (Quranı) özündən uydurdu!" - deyirlər. (Onlara) de: "Əgər doğru deyirsinizsə, onun kimi özünüzdən on surə uydurub gətirin və (bu işdə) Allahdan başqa, kimi bacarırsınızsa, onu da köməyə çağırın."  5. "Əgər doğru deyirlərsə, qoy onlar bunun (bu Quran) kimi bir kəlam gətirsinlər!" ("Tur" surəsi 34)

Bütün bu ayələr nişan verir ki, Qiyamətə qədər heç kim Qurana bənzər bir mənalı kitab və hətta ona bənzər bir kəlam da gətirə bilməzlər.   

İradın özü: 1. Fussulət surəsi, 9-cu ayə: Söylə onlara məgər sizin yer üzünü 2 gün ərzində yaradan Allaha şübhəniz varmı?  2) Fussulət surəsi, 10-cu ayə: O, məsrəf edənlərin ehtiyacı qədər yer üzündə dağlar, yeməklər və nemətlər yaratdı. Bu yaradılış 4 gün vaxt apardı. 3) Fussulət surəsi, 11 və 12-ci ayələr: Sonra göyləri yaratmağa başladı... Onları yeddi göy olaraq 2 gündə yaratdı...

Hesabat: 2 gün yerin yaranması + 4 gün dağlarla nemətlərin yaranması + 2 gün göylərin yaranması = 8 gün!

Əvvəla onu da qeyd edək ki, Quran ayələrinin mənasını hər insan başa düşə bilməz. Bundan ötrü xüsusi iman və elm lazımdır. Amma yerin və göylərin yaranması haqqında ayələrdə təkid olunmuş altı gün (yaxud, altı zaman çərçivəsi) tamamilə doğru və bu ayələrdə heç bir uyğunsuzluq yoxdur. Məqalə sahibinin anlaya bilmədiyi məsələ, "Fussilət" surəsinin 10-cu ayəsinin mənasını özü başa düşməməsi olub  elə sanıb ki "nə isə təzə bir şey kəşf edib". Allah-taala cahillərin iradından pak və münəzzəhdir.

İzah: Bu ayənin mənasını iki yolla izah etmək olar və hər iki yolla verilmiş izahla anlaşılmazlıq tamamilə aradan qalxır:

1) Ayədə, Allah-taala ümumiyyətlə yer və göylərin yaranışına dəxli olmayan tamamilə ayrı bir yaranışa işarə edir və buyrur: O, məsrəf edənlərin ehtiyacı qədər yer üzündə dağlar, yeməklər və nemətlər yaratdı. Bu yaradılış 4 gün vaxt apardı." "Dörd gündə" məqsəd isə ilin dörd fəsli nəzərdə tutulur. Yəni, Allah-taala yer və göyləri və onların arasındakıları altı gündə yaratdıqdan sonra varlıq aləmində olan yaranmışların ruzilərini və ehtiyacı olanları (dağlar, yeməklər və nemətlər isə ayrıca olaraq) dörd gündə (yəni, dörd fəsildə) yaratdı. Bəs belə bir yaradılışın ümumiyyətlə yer, göylər və onların arasındakıların yaranması gününün sayının heç bir dəxli yoxdur və ayrıca bir yaradılışdır.

2) "Fussilət" surəsinin 10-cu ayəsindəki "Bu yaradılış 4 gün vaxt apardı" ifadəsi əslində  9-cu ayədə gələn "yer üzünü 2 gün ərzində yaradan..." cümləsinə bağlıdır. Yəni, əslində ayələr ardıcıl batini mənada belə oxunur ("Fussilət" surəsi 9) "Söylə onlara məgər sizin yer üzünü 2 gün ərzində yaradan Allaha şübhəniz varmı? ("Fussilət" suərsi 10-cu ayə) O, məsrəf edənlərin ehtiyacı qədər yer üzündə dağlar, yeməklər və nemətlər yaratdı. Bu yaradılış  (yəni, yerin özünün yaradılışı və məsrəf edənlərin ehtiyacı qədər yer üzündə dağlar, yeməklər və nemətlərin yaradılışı cəmisi birlikdə)  4 gün vaxt apardı.

Bununla da, Qurana irad edənlərin ağızlarına möhür vurulmuş olur və heç bir Quran ayəsinə, heç bir irad qarşıya çıxmır.