Bilidiyimiz kimi ötən həftə İsrail səfirliyi qarşısında Beynəlxalq Qüds günü münasibətilə keçirilmiş etiraz aksiyasında saxlanılmış 8 nəfərə 8-15 günlük inzibati həbs cəzası verilmişdi. 8 günlük həbs cəzası alanlar arasında Azərbaycan İslam Partiyasının sədri Mövsüm Səmədov da var idi. Həbs cəzası başa çatan partiya sədrini qarşılamaq üçün müvəqqəti saxlama təcridxanasının qarşısına 300-ə yaxın ictimaiyyət nümayəndələri, o cümlədən Azərbaycanın digər bölgələrindən - Lənkəran, Astara, Gəncə, Quba, Xaçmaz və Bakı kəndlərindən inanclı insanlar gəlmişdi. Mən də öz jurnalist həmkarımla tədricxananın qarşısından reportaj hazırlamağa getmişdim. Partiya sədri azadlığa çıxdıqdan sonra isə ora toplaşan ictimaiyyət nümayəndələri və biz jurnalistlər polis təzyiqi ilə üzləşdik. Həmkarımın video kamerası əlindən alınıb sındırıldı və çox kobud şəkildə polis maşınına otuzduruldu. Mən isə hadisələri kənardan izləyirdim. Belə ki, bölgəyə 10-a yaxın polis maşını gəlmişdi. Polis ora yığışanları yerdən buğda dənləyirmiş kimi bir-bir dənləyirdi. Onlar tədricxananın qarşısına toplaşmış gəncləri vəhşicəsinə döyərək, polis maşınına otuzdururdular. Elə bu anda iki polis mənə yaxınlaşdı və kobudcasına "əəə burda niyə dayanmısan!", cavab olaraq dedim ki, mən jurnalistəm və reportaj hazırlayıram. Elə sözüm ağzımda qaldı. Azərbaycan polisinə xas şəkildə "nə jurnalist basın maşına bunu" -dedilər. Hər nə qədər etiraz etsəm də, faydası olmadı. Bizi Binəqədi rayonu 4-cü polis bölməsinə apardılar. Bölmədə iki jurnalist və 50-dən çox şəxs var idi. Polis bölməsində müxtəlif bölgələrdən gələn ictimaiyyət nümayəndələrinin mobil telefon nömrələrini götürdüm ki, sonra azadlığa çıxsam onların başına gələnləri yazım. Nə isə məni və həmkarımı qanunsuz olaraq 12 saat bölmədə saxladıqdan sonra 25 manat cərimə edərək azdlığa buraxdılar...
Azadlığa çıxandan sonra dünən və bu gün isə Gəncə şəhəri polis bölməsində işgəncələrə məruz qalan şəxslərlə əlaqə yarada bildim. Onların telefon söhbətləşməsini və Azərbaycan polsinin qeyri-qanuni addımlarını sizlərlə bölüşürəm. Belə ki, Gəncə şəhərinin Kəpəz və Nizami rayonlarında yerləşən polis bölmələrində saxlanılanlar, bölmədə olarkən polis əməkdaşları tərəfindən ağır bədən xəsarətləri alıblar. Onlar, "bizi hər birimizi ayrı-ayrı otaqlara salıb, döyürdülər. Hətta dostlarımızdan birini o qədər vurmuşdular ki, ayaq üstə dura bilmirdi. Bizə yemək gətirən yaxınlarımızdan pul, siqaret və qonaqlıq müqabilində onları bizlə görüşdürməyə razılaşırdılar" -deyə bildiridilər. Başqa bir Gəncə sakini ilə əlaqə saxladıqda isə bildirdi ki, "mən azyaşlı olduğum üçün məni az döydülər. Çox pis söyüşlərdən istifadə edirdilər. İçəridə olan qardaşlarımı çox vəhşicəsinə döyürdülər. Bizi axşam saatlarında evə buraxanda uşaqların çoxusu axsaya-axsaya yeriyirdilər. Bu isə onların necə döyüldüyünün nümunəsi idi. Bölmədə bizə dedilər ki, indi sizi buraxırıq amma yenə çağıracağıq"...
Son olaraq onu qeyd edim ki, Gəncədə və digər bölgələrdə sadə vətəndaşlara təzyiqlər davam edir. Amma mənim Azərbaycan polisinə başqa sözüm var. Siz asayiş keşikçisisiniz. Öz qədrinizi bilin. Bu cür kobudluqdan əl çəkin! Mən sizin insanlara qarşı necə davrandığınızı mitinqlərdə görmüşəm. Mülki geyimli insan sifətli zombilərin azad toplaşanlara necə divan tutduğunu isə hamımız görmüşük. Amma bu dəfə məsələ fərqli idi axı. Heç kim mitinq keçirmək istəmirdi. İnsanlar öz sevdiyi və məhəbbət bəslədiyi dostlarını qarşılamaq üçün uzun yol qət edib Bakıya gəlmişdilər. Onların arzusu ürəklərində qalmasa da, polis onlara Azərbaycanda qanunsuzluğun baş alıb getdiyini sübut etdi. Sübut etdi ki, Azərbaycanda jurnalisti də qanunsuz olaraq həbs etmək olar. Ola bilər sizə kimlərsə bu cür davranmağı əmr edir. Amma bu müvəqqəti dünyada 5 gün yaşayacaqsınız, onu da kişi kimi yaşayın. Başqasının diktəsi ilə yox.
Dizayn :Networkbil.net . 2009 FAKTXƏBƏR . Dərc olunan materilların mətninə görə, redaksiya heç bir məsuliyyət daşımır. Saytdakı materiallardan istifadə edərkən istinad zəruridir.
