Ünsiyyətdə olduğum tənha qadınlardan biri mənə "...işlədiyim idarədə maksimum dərəcədə tənha ana olduğumu gizlətməyə çalışıram. Yalnız belə olduqda qarşı cinsin nümayəndələri mənə qadın gözü ilə baxırlar. İnsanın tənha qadın olduğunu biləndə isə...". Bu gün bu sözlər həyatımızın reallığı olub. Bu yazıda mən heç də uzun-uzadı fikirlər və zorakılığın növlərini sadalamaq fikrində deyiləm. Məqsədim sırf insani tərəfdən və insanlarımızın real vəziyyətini anlatmaqdır. Son günlər qadınlara qarşı gündəlik günümüzdə gördüyüm müxtəlif alçaldıcı hərəkətlər məni son dərəcə məyus edir. Qəzetlərin "iş axtarışı" bölmələrində açıq-aşkar qadınların təhqir olunmasına yol açacaq elanları gördükdə, idarələrdə idarə müdirləri tərəfindən psixologiyası azacıq zəif və tənha olan qadınları cinsi münasibətə təhrik etmək kimi xəbərləri eşidəndə, televiziya və küçə reklamlarımda qadınların heyvana daha yaxın obrazda və pozada çəkildikləri təsvirləri seyr etdikdə, avtobus dayanacağında marşrut gözləyən yeniyetmələri qızları belə yoldan çıxarmağa çalışan "maşınlı"ları müşahidə etdikdə, iş yerlərində qadınların əməyinin ucuz alınmasını gördükdə, kafe və restoranlarda çörək pulu dalıyca gedən qadınların necə fahişəliyə cəlb edilməsi barədə məlumatlar əldə etdikcə düşünürəm ki, biz ya insanlığımızı itirmişik, ya da itirməyə doğru gedirik. Biz deyəndə, mən tək kişi cinsindən olanları nəzərdə tutmuram, bəzən qadınlara zorakılığın istənilən formasına məruz qalmağa şərait yaradan insanlar elə məhz qadın cinsindən olanlar olur. İnsan alverlərinə məruz qalanların həyat hekayəsi də bunu təsdiq etmiş olar. Dövlət hər bir vətəndaşını qorumalıdır. İstər təhlükə kişi cinsindən olandan gəlsin, istər qadın. Məhz bu cəhətdən sosial planda qadınların müdafiəsi gücləndirilməlidir. Xüsusi ilə tənha qadınlara dövlət dəstəyi artırılmalıdır. Çünki, maddi və mənəvi cəhətdən özünü kasıb hiss edən kəs istənilən növ pozğunluğa cəlb edilə və zorakılığın hər bir formasına məruz qala bilər. Müdafiə edilməmiş planda qalmaq da əslində buna şərait yaratmış olur. Bu gün "tənha ana" statusu beyinə gəldikdə insanımız tərəfindən həqiqətən tənha və həyatını yenidən qura biləcək qadın başa düşülməlidir. Tənhalıq insanın alçaldılmasına, zorakılığa məruz qalmasına səbəb olmamalıdır.

Xülasə, mənim fikir və hisslərim son zamanlar bu gerçəkliklər tərəfindən zorakılığa məruz qalır. Həyatın hər addımında bu real gerçəkliklərlə rastlaşmaq günümüzün aktuallığıdır. Mən bu gündəm ilə yaşamaq istəmirəm. Azərbaycan xanımının zəngin mənəvi-mədəni tarixi olub və qadına, əslində bir növ anaya olan hörmət və izzət tarix boyu yüksək tutulub. Əgər hər bir insanımız bu işdə öz sosial məsuliyyətini dərk etsə və öz humanist dəyərlərini heyvani dəyərlərə dəyişməsə vəziyyət xeyli "insanpərvər"ləşər.