Mübarək Ramazan ayına qədəm qoyduq. Dünya sevinir. Hamı bir-birini təbrik edir: Allah qəbul eləsin; Bayramın mübarək; Allah əvəzini versin.

Nə gözəl sözlərdir, deyilmi? Amma gəlin görək bu gözəlliyi necə yaşayırıq, necə qarşılayırıq və ya bizə bu nuraniyyəti necə yaşadırlar.

Adətim üzrə dünən axşam Türkiyə telekanallarında xəbərləri izləyirdim. Doğrusu ürəyim açıldı. Hər gün 1 saat olan xəbərlər Mübarək Ramazan ayı münasibətilə 1 saat 15 dəqiqə davam etdi. Və bu xəbərlərin də tam 45 dəqiqəsi Ramazan ayına həsr edilmişdi. Bütün Türkiyə ərazisindən birbaşa olaraq yayım verilirdi. Şəhərbəşəhər, kənbəkənd insanlardan Ramazan ayı barədə fikirlər öyrənilir, təbriklər səsləndirilirdi. Yəni, əhalisinin böyük əksəriyyətinin müsəlman olduğu bir ölkədə əslində Ramazan coşqusu bu cür olmalıdır.

Ümumiyyətlə isə xəbərlər proqramı ərzində bir dənə də olsun bayağı xəbər verilmədi.

Xəbərlər proqramı isə bu sözlərlə bitdi: Artıq azan vaxtıdır, Allah oruc və namazlarınızı qəbul etsin!

Və bu xəbərlər o telekanallarda verilirdi ki, daxil olduqları Holdinqin azından 50 faiz səhm payı yəhudilərə məxsusdur.

Bundan əlavə, bu il qardaş Türkiyədə Bələdiyyələrdə "Alo İftar" xətti də açılıb ki, bu xidmətlə imkansız ailələrə iftar üçün yemək verilir.

Amma gəlin görək bizim ölkədə vəziyyət necədir.

Xalqımızın böyük əksəriyyətinin müsəlman olduğu şəkk-şübhəsizdir. Buna baxmayaraq, elə şərait yaradılıb ki, sanki biz Ermənistanda yaşayırıq və ölkənin də əhalisinin 99 faizi xristiandır. Ramazan ayı ərəfəsində ölkəmizdə ilk dəfə olaraq əxlaqsızlığın yayılmasna təkan olaraq pivə festivalı keçirildi. Əvvəlki illər isə gözəllik müsabiqəsi keçirilirdi. Ramazan ayında əvvəllər heç olmasa bir telekanalda gün ərzində mənəvi-əxlaqi verilişlər verilirdisə, indi bu da yoxa çıxıb. Telekanallarımız obaşdan zamanı ancaq lüt-üryanların kliplərini yayınlamaqda yarışa giriblər. İftar vaxtındansa danışmağa dəyməz.

Hələ bu azmış kimi, indi də Ramazan ayında dünyanın ən əxlaqsız televiziya kanallarından olan MTVnin Azərbaycan nümayəndəliyi də açılacaq və kanalın rəsmi təqdimatı keçiriləcək. Özü də ölkəmizdə dindar bir qəsəbə kimi ad çıxarmış Nardaranda. Əslində bu MTV yox, Murdar TV-dir ki, cəmiyyətimizin son zamanlar əxlaqsızlaşmasında, murdarlaşmasında fəaliyyət göstərən bəzi telekanallarımıza bir az da təkan verəcək, dəstək göstərəcək.

Bəlkə kimdəsə bunlar "Nə olsun?" deyə sual da doğuracaq. Amma olan odur ki, daim Türkiyənin bayağı şou proqramlarını özlərinə ideal kimi qəbul etmiş televiziyalarımız görəsən niyə indi Ramazan ayı ilə bağlı verilişlərin sayında qardaş ölkənin televiziyaları ilə rəqabət aparmırlar? Niyə insanların necə oruc tutması, bu ayın fəzilətləri barədə proqramlarında geniş yer ayırmırlar? Sadəcə bir xəbər verdilər: Bu gün Ramazan ayıdır. Bu xəbərin müddəti isə bir neçə dəqiqədən o yana keçmədi.

Bələdiyyələrimizin Türkiyəli həmkarlarının yolu ilə getməsindən isə danışmağa dəyməz. Çünki bizim bələdiyyələr heç onlara ayrılan dövlət vəsaitini belə düzgün xərcləmirlər, o ki qaldı imkansızlara pulsuz yemək servisi edələr.

Bu sadalananlar onu göstərir ki, Azərbaycan kimi bir müsəlman ölkəsində maraqları olan beynəlxalq güclər, əvvəl ölkənin mənəviyyatını ayaqlar altına atıb tapdalamaq, daha sonra isə mənəviyyatını itirmiş bir cəmiyyəti öz maraqları çərçivəsində istiqamətləndirməkdir.