Azərbaycanda xalqla hakimiyyət arasında uçurum günü-gündən dərinləşir. Bu uçurum demək olar ki, hər bir sahədə özünü aşkar şəkildə nümayiş etdirməkdədir. Azərbaycanda zindanda kasıb yatır, əsgərliyə isə kasıb gedir, zindana imkansızlar düşür, canını vətən yolunda kasıb balası fəda edir. Məmur və nazir balaları isə Qəbələdə 1 milyon dollarlıq ayını kəsib, onun kababını sifariş verir.

Doğrudan da adam belə xəbərləri eşidəndə və bu kimi özbaşınalıqları, haqsızlıqları müşahidə edəndə, əsəbdən ruhu dağılır. Axı niyə tarixdən dərs almırıq. Tarixdə öz gücünə güvənib insanlara divan tutanların bu  gün halını müşahidə etmirikmi?! Bu gün Allahın onları necə yoğun boyunlarını, zorlu güclərini, danışan yalan dillərini torpaqlar altına salıb çürütdüyünü müşahidə etmirikmi?! Bu gün haqsız məhkəmə qərarı verənlər, sabah Uca Yaradanın məhkəməsinin qarşısında cavab verəcəklərinə inanmırlarmı?! Görünür bu inamsızlıqdan doğan bir haldır ki, bizi uçuruma aparmaqdadır. Amma başa düşmürlər ki, cəmiyyətmizi səadətə çatdıran ən mühüm amil, elə bu inam ola bilər. Yoxsa bu haqsızlıqlardan yaxa qurtarmaq çətin olacaq.

***

Təxminən 6 ay bundan öncə - 13 fevral 2010-cu il tarixində bir qrup dindar, İslam Peyğəmbərinin vəfatı ildönümüylə əlaqədar, tam dinc şəkildə, əllərində gül çələngi ilə qan yaddaşımızın səhifələrini özündə əks etdirən Şəhidlər Xiyabanını ziyarət istəyində olmuşdular. Bəlkə də onlar, Azərbaycan hökumətinin yazılmayan qanunlarından xəbərsiz imişlər. Xəbərləri yox imiş ki, yeni "qanuna" görə, Şəhidlər Xiyabanına yürüş etmək qadağandır və buna görə, səni döyüb məhkəməyə verərlər. Ziyarətçilərə əvvəlcə yürüşə icazə verilir sonra isə onları münasib bir yerə çəkib, əllərindən gül çələngini alıb, darmadağın edib, özlərini isə amansızcasına döyürlər.

Yenə həmişəki kimi, bizdə döyülən məhkum olduğundan, onlardan da 5 nəfəri barədə xüsusi ittiham irəli sürüldü, cinayət işi açıldı. Nəticədə isə 3-nə 4 il yarım, 2-nə isə 4 il iş kəsildi.

Cinayətləri isə Şəhidlər Xiyabanını ziyarət idi.

Bu Azərbaycanın bugünkü durumudur.

Mənim məqsədim xalqı xəbərdar etməkdir ki, Şəhidlər Xiyabanını ziyarət etmək istəsəz, ehtiyatlı olun.

Hələ bir neçə gün öncə, Azərbaycanın yenicə şəhid olmuş igid oğlu, şəhid Mübariz İbrahimovun ailəsini ziyarət etməyə gedən bir dəstə Gəncə sakininin, geri qayıdarkən polis tərəfindən saxlanılaraq bölməyə aparılmasını və orada təhqir edilib, "nə şəhidbazlıqdır" deyənlərdən danışmıram.

Nə isə... Adam bilmir nədən danışsın, necə danışsın ki, sənin haqq səsini eşidib, bir az insafa gəlsinlər. Bir az Allahı və onun məxluqunu da yada salsınlar. Axı ay insafsızlar, siz də insansız, siz də AZƏRBAYCANLISINIZ?!

Qorxun şəhid ruhundan! Qorxun ədalət divanından! Bu dünyanın zindanı müddətlədir, sonu var. O biri dünyanın, haqq dünyasının müddəti yoxdur, haqqın cəzası həmişəlikdir!