Tanrım,

Əvvəlin hökmü səndə,

Sonun qərarı

Öz ixtiyarındadır.

Ədalət ölçüsü hər yerə yetən ən böyük sultanlıq

Sənin diyarındadır.

Sənsən varlıqların bağlı  qapısını üzümüzə açdıran.   

Zülmət qaranlıqlardan aləmlərə daim nur saçdıran.

Hikməti səndədir yerin, göyün də,

Ədalət səninlə bərqərar olacaq nizami pozulmuş yer üzündə.

Tanrım,

Ən böyük mükafatın bu dünyada şərəflə yaşamaq haqqımız,

Cəzan olacaq bizə, cəhənnəm dolu əzabımız.

Orada,

O ilahi aləmlərdə ağlar, qaralar olmayacaq,

Nə sultanlıq, nə şahlıq  kimsənin başına öz çətirini salmayacaq.

Götürüləcək aradan mənsəb, şöhrət fərqləri,

Dagıdacaq hökmun sənin şeytan nəfsi ilə qurğusu qurulan

bəndləri, sərhədləri.

Orada sərhədlənən yaxşı ilə yamanın yeri olacaq,

Ora, zamandan qopub zamansızlaşan

İnsan ruhunun əbədi məskən yeri olacaq.  

Tanrım,

Göy adamı olmağın yerdən gələr xoş  niyyətli sorağı.

Yanar, insanın, yerdə közün qurduğu, göydən bəxtinə

işıq salan çırağı.

Tanrım,

Xoş əməllərdən üzü dönüb insanın,

Ürəklərə işıq salan közü sönüb insanın.

Bərələr qurulub ovçusu naşı,

Bitmir insanın insanla  nifrin, savaşı.

Uşaq bilmir, qoca bilmir, kəsir, doğrayır, əlində Habil baltası,  

Bu, nə biçim insan,

Gəzdirir sinəsində qatil damğası?

Ya qurdur həşri-qiyamətini,

Ya bir də anlat insana bəşəri əlamətini.

Tanrım,

Ruhunun təmiz sular üzündə  gəzib dolaşdığı,

Dərgahına yetməkçün bizə  kamillik yolu açdığın,

dünyanın gül üzünü pozdular,

Məhəbbətə  yazdırdığın ünvanı,

xeyrin tərs üzünə yozdular.

Tanrım, son hesabdan əvvəl gəlməzsənmi?

Enməzsənmi,

Ruhların dara çəkildiyi,

Bəxt aynasına insanın qara üzlərdən qara çəkildiyi,

şeytan üzlü bizim yerlərə?

Qılıncını  çəkməzsənmi, ədalət qatilləri zalımlar başına?

Baxmazsanmı, məzlumların axıdılan göz yaşına?

Yetmədimi Tanrım, zülmün ərşə dirənən

Nuh tufanının zamanı?

Hər şeyin sonu sənə bəlli, bəs nə zaman qurulacaq

sondan əvvvəlki

ədalətin divanı? 

Tanrım,

Bu dunyada nahaq haqqa o qədər qarışdı,

Məzlum zalımın zülmü ilə o qədər barışdı,

Hec bilmədik yaxşı nədir yaman nə,

Yaxşı belə olurmuşsa,

Pisliklərdən hər gün dərimizə  təpilən saman nə? 

Nə  imiş  yer üzündə haqqı  deyən sözə güllə?

Atırlar burada haqqa baxan gözə güllə.

Biri qiyamətdən can qurtaran tövbəsinə,

Biri cənnət qapısndakı növbəsinə  arxayın.

De, kim saldı içi günah dolu yer adamını

o dünyasından arxayın?  

Tanrım,

Xəmirini acı yoğurduğun,

İnsanını hər varlıqdan uca doğurduğun

bu dünyanın binasını

təzədən qurmaq gərək.

Musanın  əsası ilə yolunu açdırdığın,

Qismətini `seçilmiş`lərə yazdırdığın,

Zamanında `siondur` deyə saya sayılmayan,

Öz qövmünün başına gətirilən müsibətlərdən

hələ  də ayılmayan,

Milyonlarla insanının cəllad sobalarında

diri-diri yandırılmasına

millətlərin

göz yaşı axıtdığı,

Fəqət bu gün qan gölündə boğdurulan körpələrin

fəryadına

özlərinin biganə qaldığı

İsrail oğullarını

Yer üzünü qana sürükləyən sərsəm  əməllərindən

durdurmaq gərək.

Bu qədər şərlə yetməz kimsə dərgahına,

Tanrım,

İnsanı şərdən xilas etmək,

İnsanı insan zülmündən

qurtarmaq gərək,

qurtarmaq gərək.