"Allahın məscidlərində Onun (Allahın) adının çəkilməsinə maneçilik törədənlərdən və onların xarab edilməsinə (dağılmasına) çalışanlardan daha zalım kim ola bilər? Halbuki onlar oraya (məscidlərə) ancaq qorxa-qorxa girməli idilər. Onları dünyada rüsvayçılıq, axirətdə isə böyük əzab gözləyir!" (Bəqərə surəsi-114)

Son günlər xalqımızın qara tarix səhifəsinə bir səhifə də əlavə olundu. İslam mədəniyyət mərkəzi adı almış Bakı şəhərində daha bir məscidin sökülməsinə haqsız hökm verildi. Vəzifəsindən və kimliyindən asılı olmayaraq, hər bir müsəlmana vacibdir ki, Allah evinin uçurdulması və məscidə olunan bu böyük ehtiramsızlığın qarşısını alsın! Ümumiyyətlə, məscid haqqında bir neçə məsələni diqqətə çatdırmaq yerinə düşər:

1.Tarixdə məscid sökmək və cəzası:  İslam tarixinə nəzər saldıqda Peyğəmbərimizin (s) Fil ilində doğulduğu qeyd olunur. Fil ilinin tarixdə İlahi möcüzə ilə əlaqəsi var və Qurani-Kərimdə bu haqda "Fil surəsi� də nazil olmuşdur.  Hadisə belə nəql olunur ki, "o ildə Yəmənin xristian padşahı, Əbrəhə ibni Səbah Əşrəm, Kəbə evini dağıtmağı qərara alır və qoşunlarını fillərlə təchiz edir. Bu xəbər hər tərəfə yayılır. Məkkə əhli müqavimət göstərməkdən aciz qalır və hamı şəhəri tərk edir. Şəhərdə təkcə, Peyğəmbərimizin (s) babası Əbdul-Müttəlib qalır. O da, vəziyyəti belə gördükdə, Kəbə divarına söykənib belə dua oxuyur: "İlahi! Hər kəs öz varını müdafiə edir. Sən də, cəlal məzhərin olan bu Kəbə evini müdafiə elə!  İmkan vermə ki, bu qoşun öz xaçları və .. ilə Sənin müqəddəs evinə toxunsunlar və onun ehtiramını aradan aparsınlar! İlahi! Bu mənim nəzərimdir amma, Sən nə istəsən, o da olacaq!" Xülasə, Məkkə şəhərini və xüsusilə, Kəbə evini cahil və nadan hökmdardan hifz etməkdən ötrü Allah-taala, Əbabil quşlarını, dimdiklərində və caynaqlarında xırda və kəsici daşla Əbrəhənin qoşununa hücum etməsini əmr edir. Tarixdə var ki, o qoşundan bir nəfər də sağ qalmır." Qurani-Kərimdə Allah-taala Fil surəsində hadisəni belə bəyan edir: "(Ya Peyğəmbər!) Məgər Rəbbinin fil sahiblərinə (Kəbəni dağıtmaq üçün fillərlə Məkkənin üstünə gələn Əbrəhə ordusuna) nələr etdiyini görmədinmi?!  Məgər (Rəbbin) onların hiyləsini boşa çıxartmadımı?! Onların üstünə qatar-qatar quşlar (əbabil quşları) göndərdi. (O quşlar) onlara bişmiş gildən düzəlmiş (möhkəm xırda) daşlar atırdı. (Rəbbin) onları (həşərat tərəfindən) yeyilmiş əkin yarpağına (saman çöpünə) döndərdi!" (Fil surəsi)

Ölkəmizdə Əbrəhə qoşunu yoxdur, biz də bir müsəlman xalqı olaraq o qədər də zəif deyilik ki, gözümüzün önündə Allah evini dağıtsınlar və biz də tamaşa edək. Deməli, Əbabil quşlarının ölkəmizə gəlməsindən ötrü şəhərdən çıxmağa da dəyməz. Bəs, hamılıqla məscidi, ibadətgah yerimizi, hamımızın səcdəgah yerimizi və ən başlıcası, xalqımızın bir müsəlman kimi ən müqəddəs bildiyi bir məkanı dağıtmaq və ehtiramsızlıq etmək istəyənlərin qarşısını almaq hamının borcudur.

2. Allah-taala məscid sökəni daha zalım kimi tanıtdırır:  İbn Əbbasdan əvvəldə qeyd etdiyimiz ayənin nazil olması haqqında nəql olunur ki, Məkkə müşrikləri müsəlmanların Məscidul-Həramda ibadət etmələrinə mane olur və onlara əziyyət verirdilər. (Zəkavəti, Əsbabun-nuzul, 1-ci cild, səh-25). İmam Sadiq (ə)-dan hədis var ki, bu ayə təkcə nazil olduğu zaman və məkana aid deyil, Qiyamətə qədər bütün zaman və məkanlara aiddir. Hər kəs Allah-taalanın yer üzündə məscidini haqsız dağıtsa daha zalımdır. Məscidin müqəddəs bir məkan olub özünəməxsus əhkamı olması, bu mövzuda daha məsuliyyətli olmamızı tələb edir. O cümlədən, şəriətə görə məscidi nəcis etmək haramdır və əgər məscid nəcis olarsa tez təmizlənməlidir. Qüsullu halda məsciddə dayanmaq olmaz, adət halında olan qadınlar məscidə girə bilməzlər, məscidə ehtiramsızlıq və kafirlərin ora daxil olması haramdır. Məsciddə mənasız söz danışmaq və yatmaq xoşagəlməzdir, məsciddə dünya sözü danışmaq və qeybət olmaz həmçinin, məsciddə ucadan danışmaq, qışqırmaq və nağıl danışmaq olmaz və sair....

Məsciddə ibadət olunur. Məscid hər bir müsəlmanın qəlbi kimi paklıq simvoludur. Məscidi sökmək, müsəlmanın qəlbinə zərbə vurmaqdır. O səbəbdən məscidi xarab etmək istəyənlər �daha zalım� kimi adlanır. Əlbəttə, məscid sökən imansız zalımlar bu mənaları dərk etmək qüdrətində deyillər.  Ona görə də belə bir hökmü müsəlman xalqının mənəviyyatını nəzərə almadan veriblər. Yoxsa, heç bir müsəlman ölkəsində belə haqsız hökmü verməzlər. Məscidi sökmək bir növ insanları dinsizliyə tərəf dəvət etməkdir. Ona görə də bu çirikn əməlin həm dünyada, həm də Axirətdə ağır cəzaları var. Məscid o qədər müqəddəs sayılır ki, orda oturmaq özü savab sayılır. Məsciddə qılınan namaz evdə tək qılınan namazlardan dəfələrlə üstündür. Məsciddə olunan duanı Allah-taala daha tez qəbul edir və sair kimi bəyənilmiş əməllər çoxdur.

3. Məscid, müsəlman xalqımızın mənəvi hüququdur;  Bu cəhətdən dövlətin ən başlıca vəzifəsi xalqın istər mənəvi, istərsə də maddi hüquqlarını təmin etməkdir. Əgər xalqın mənəvi hüquqları pozulursa onda dövlət öz vəzifəsini və andını yeninə yetirmir. Qanunda oxuyuruq: "Maddə 12. Dövlətin ali məqsədi; 1. İnsan və vətəndaş hüquqlarının və azadlıqlarının, Azərbaycan Respublikasının vətəndaşlarına layiqli həyat səviyyəsinin təmin edilməsi dövlətin ali məqsədidir." ( Azərbaycan Konstitusiyası). Çox təssüflər olsun ki, biz bu gün Azərbaycan müsəlman xalqının başına açılan bu müsibətlərin əksəriyyətində dövlətin başda olmasını görürük.

4. Məscidin fəzilətləri: Amma məscidin fəziləti haqqında onu qeyd etmək lazımdır ki, məscid Allah evi adlanır. Doğrudur ki, hər yer və bütün varlıq aləmi Allah-taalanındır. Amma, xüsusi məkanların Allaha nisbət verilməsi o məkanın məxsus müqəddəsliyinə və paklığına işarədir. Qurani-Kərimdə məscid kəlməsi 28 dəfə gəlmiş, onlardan 22 dəfəsi tək, iki dəfəsi isə cəm formasında işlənmişdir. Ən çox Məscidül-Həram (Kəbə) nəzərdə tutulan kəlmələr daha çoxdur. İslam Peyğəmbərinin (s)  meracı da məsciddən başlanmışdır. Bir sözlə, Quranda məscid insanın öz Allahı ilə razi-niyaz etdiyi bir müqəddəs məkan kimi qələmə verilir. Belə bir məkanın dağıdılması ən böyük günahlardan biri sayılır. İmam Sadiq (əleyhissalam)-dan nəql olunur ki, "İslam Peyğəmbəri (s) Cəbraildən soruşdu: Allah yanında ən məhbub məkan haradır? Cavab verdi: "Məscid." Və Allah-taalanın yanında ən sevimli bəndə məscidə əvvəl girib, axırda çıxandır. (Mirzə Cavad Mələki Təbrizi, Əl-Müraqibat). Məscidin o qədər müqəddəsliyi var ki, İslam Peyğəmbərindən  (s)  nəql olunur ki, Həzrət buyurur: "Hər kəs məsciddə bir işıq yandırsa, ərşi ilahini həml edən mələklər nə qədər ki, o işıq yanır, o şəxsdən ötrü dua və bağışlanmaq istəyərlər."

Digər bir mənbədə o Həzrətdən nəql olunur ki, buyrur: " Məscid hər bir təqva əhlinin evidir".

Məscidin məqamı o qədər yüksəkdir ki, İslam Peyğəmbəri (s)  hədislərdən birində buyurur: "Səhər və axşam məscidə getmək, Allah yolunda cihad kimi sayılır."

Sonda bütün deyilənlərdən nəticə alırıq ki, hər bir müsəlmanın ürəyini qana çevirən məscid haqqındakı bu haqsız hökm, tezliklə aradan götürülməli və bu işi təşkil edənlər əvvəl, Allah-taalanın dərgahında tövbə etməli, daha sonra isə Azərbaycanın müsəlman xalqının adına daxildə və xaricdə ağır zərbə vurduqlarına görə üzr istəməlidirlər.