Səbr edən və Qəhhar Allahın adı ilə.
Gözləmək həm yaxşı, həm də pis əməl ola bilər. Hədislərdə bildirilir ki, zalimlər, hətta vəzifəsinə əməl etməyən möminlər Qiyamətdə çox gözləyəcəklər. Hətta qeyd edilir ki, bu gözləmələr min illərlə ölçülür. Quranda gözləyənlərin ali məqamlıları haqqında isə bu ayə var: "Möminlərin içərisində Allaha etdikləri əhdə sadiq qalan kişilər vardır. Onlardan kimisi əhdini yerinə yetirib şəhid olmuş, kimisi də şəhid olmasını gözləyir. Onlar əhdlərini əsla dəyişdirməyiblər" (Əhzab surəsi, 23-cü ayə).
Artıq iki həftədir ki, dindarlar, xüsusilə möminlər Ali Məhkəmənin qərarını gözləməkdədirlər. Hansı qərar? Məscidinin sökülmə qərarına dair bu dəfə Ali Məhkəmə söz deməlidir. Lakin iki həftədir ki, məhkəmə təxirə düşür. Məhkəmənin təxirə düşməsini anlamaq olar. Lakin məhz öncə "Fatimeyi Zəhra" dini icmasının sədrinə ixtişaşlar haqqında xəbərdarlıq edilməsi, Ali Məhkəməyə tərəf üz tutan 40-a yaxın dindarın həbs edilməsi müəmmaya bənzəyir. Ancaq çox yaxşı olardı ki, dövlət qurumları ədalətli qərarla məhmənin sökülməməsini elan edərək adlarının sonuna "məscid sökənlər" damğasını vurmayaydılar. Əlbəttə ki, bu damğalar məscid sökülsə, mütləq vurulacaq və onlar müxtəlif olacaqdır.
1.Məscid sökənlər
2.Məscid sökülməsinə narahat olmayanlar
3.Məscid sökülməsinə narahat olanları qınayanlar
4.Məscid sökülməsinə göz yumanlar (dövlət rəsmiləri)
Axı biz dindarlar Azərbaycan respublikasının vətəndaşlarıyıq və digər qeyri-dindarlarla eyni hüquqa malikik. Bu təzyiqlər axı nəyə lazımdır? Təzyiqlərlə, məscid sökməklə, dindarı həbs etməklə nə əldə olunur? Və ya nə demək isyəyirsiniz? Əgər demək istəyirsinizsə "dindara Azərbaycanda hörmət etmirik!" - qəbul edirik, etməyin, hörmət gözləmirik, lakin heç olmasa Allahın atributlarına sayqı göstərin . Bəlkə kimlərəsə İslamın inkişafının qarşısını alacağıq sözünü vermisiniz? Rahat olun, bu əmr olubsa da, müəyyən dərəcədə icra olunub. Əgər dindarların telekanal və ya radio açmasına şərait yaradılmırsa, şəxsiyyət vəsiqələrində "hicablı şəkil olmaz!" deyilirsə, məscidlər sökülürsə, dindarlar "ixtişaşçı" adı ilə həbs olunursa - rahat olun, İslama nəfəs almağa imkan vermirsiniz, bunu biləsiniz. Bəlkə qərar vermiş şəxs azan qadağasının baş tutmadığını gördükdən sonra baş verənlərin mənliyinə toxunduğundan məscidin nəyin bahasına olursa olsun sökülməsi əmrini verib? Bəs əgər dinlə belə rəftar olunursa, yəhudilik din deyil məgər? Onların sinaqoqlarını sökmək istədikdə niyə onlara başqa yerdə sinaqoq tikilicəyini deyərək rahatladırsınız? İsraili belə çıxır ki, ölkə vətəndaşlarından daha üstün tutursunuz? Üstün tutmursunuzsa, niyə məscid sökülür, niyə möminlərə ikinci, hətta üçüncü dərəcəli vətəndaşlar kimi münasibət bəsləyirsiniz? Minlərlə məktublar, müraciətlər, etirazlar, narahat, gözü yaşlı möminlər - bunlara niyə etina edilmir? Vallah, müharibə başlasa ön cərgələri dindarlar dolduracaq. Çünki mömin ləkəsiz İslamın "Vətəni sevmək imandandır" hədisinə əməl edir. Çünki İslam yolunu gedənlər adi insanlardan daha çox şəhadət və mənlik prinsiplərini üstün tuturlar. Axı dindarlarla höküməti küsdürməklə kim nə qazanacaq? Şükr Allaha bizim Allahımız, Peyğəmbərimiz və İmamlarımız var. Və onların yanında olmaq bizim üçün şərəfdir. İndi möminlə əks-cəbhədə olanlara üzümü tutub deyirəm - sizin nəyiniz var? O qüdrət ki, fikirlərləşirsiniz, sizdə var, əslində Allahın qüdrətinin yanında "milçək vızıltısı" kimi bir şeydir. Ancaq yadınızda saxlayın - türklər yaxşı deyib: "Alma məzlumun ahını, çıxar ahəstə-ahəstə".
|
