Yenicə müstəqillik qazandığımız dövrlərdə ağsaqqallardan kommunist
rejimin İslama qarşı təzyiqlərini çox eşitmişik. Kommunist məmurların
İslam təqvimində mühüm günlər zamanı insanlara etdikləri zülmləri,
evlərə edilən NKVD basqınları təsəvvür etmiş, onlara lənətlər
göndərmişik. Və şükr edirdik ki, müstəqillik qazanmışıq və belə şeylər
keçmişdə qaldı.
Lakin son dövrlərdə Azərbaycanda baş verən hadisələr
bizə necə yanıldığımızı sübut etdi. Azan qadağası, məscid sökülmələri,
dindarlara qarşı təzyiqlər bizə üzünü görmədiyimiz NKVD-ni xatırlatdı.
Bir
dövlət məmuru ilə söhbətimi yazımda qeyd etmək istəyirəm. Bu məmurun
tez-tez "ədalət var, hökümət var, hər şey əladır" sözləri məni çox
narahat etmişdi.
Ona "sual verə bilərəmmi?" dedim.
Dedi: "Buyur".
Dedim: "Həqiqətən ədalətin olduğuna özün də inanırsanmı?".
Dedi: "İnanıram".
Dedim:
"Bilirsənmi ölkədə çox sayda İslamçılar, müsəlmanlar var? Onların,
demirəm telekanalları, həftədə bir dənə də olsun peşakar surətdə tərtib
edilən bir verilişləri yoxdur. Bu ədalətdimi?".
Dedi: "Bəli, indi onlara veriliş versək, sabah radio, telekanal istəyəcəklər".
Dedim: "Bəyəm onlar, yəni biz müsəlmanlar, dindarlar bu ölkənin bərabərhüquqlu vətəndaşı deyilikmi?".
Dedi: "Vətəndaşısız, amma olmaz!".
Dedim : "Niyə olmaz, əgər xalq istəyirsə, gərək verəsiniz".
Dedi: "İran, Turan....".
Dedim: "Yaxşı, bilirsənmi iki məscidi söküblər?".
Dedi: "Bilirəm".
Sonra o mənə sual verdi:"Bu məscid vəhabi məscididir? Yoxsa, nə məsələdir?".
Dedim: "Məscid, birincisi, Allah evidir. Amma xeyir, vəhabi məscidi deyil. Sadəcə məscidi qanunsuz tikili olaraq söküblər".
Susdu. Fikirə getdi.
Dedim: "Bilirsənmi dövlət məmurlarından biri məscidi göbələyə bənzədib?".
Dedi: "Nə göbələk?".
Dedim: "Məscidlərin sayı yağışdan sonrakı göbələklər kimi artıb" cümləsi sənə tanış deyil?".
Dedi: "Hə, bildim. Onun məsələsi...."
Dedim: "Bunlar ədalətdirmi?".
Dedi: "Nə isə...".
Dedim: "Yaxşı, bilirsənmi Naxçıvanda nələr baş verir?".
Gülərək dedi: "Daha o xandır da...".
Dedim: "Yaxşı. Bilirsənmi ki, Xırdalanda evi satanda müvafiq sənədi almaq istəyəndə 3-4 min manat pul tələb edirlər".
Dedi: "Belə şey ola bilməz!".
Dedim: "Sübut üçün filankəsdən soruş". Soruşdu və yanımda sükuta daldı.
Dedim: "Ədalətdirmi?".
Gülərək yenə dedi: "Xırdalandı da".
Dedim:
"Axı bu misallar 100-də biridir. Sənə "Qazax" desəm - deyəcəksən
"Qazaxdı", "Astara" desəm - deyəcəksən "Astaradı". Axı bu ölkə vahid
respublika deyil?".
Mənə baxıb susdu və elə bil bu sözləri demək istəyirdi: "Ağıllı ol! Ağrımayan başını ağrıtma!".
Bəli,
bizlərin ağrımayan başımızı ağrıdan bu cür şeylərdir. Bizi narahat edən
İslam Peyğəmbərinin vəfatı günü Şəhidlər Xiyabanına əkili qoymaq üçün
yürüş edənləri amansızcasına döyən polislərdir. Bizi narahat edən
məscidi sökmək istəyən məmurlardır. Bizi narahat edən dini dükanlara
girərək manekenin başından hicabı açan məmurların əlaltılarıdır. Bizi
narahat edən İmam məclisləri qurulan çadırları dağıdan hüquq mühafizə
orqanlarının əməkdaşlarıdır.
Biz demirik ki, "niyə Mossad
Azərbaycanda belə rahat hərəkət edir?". Demirik ki,"Yunanıstan adı ilə
niyə azərbaycanlı balalarını təlim üçün İsrailə göndərirsiniz?".
Demirik ki, "20 faiz torpaqları işğal altında olan bir ölkənin
nazirinin evi "Dom Sovet"ə niyə oxşayır?". Demirik ki, "niyə əli
fələstinli uşaqların qanına bulaşan Olmert Azərbaycana gəlir?". Demirik
ki, "keçmiş bar "pezəvəngi" Libermanı qardaş Türkiyəyə sərt mesajlar
verməyə nə cürətləndirdi?".
Bizim dediyimiz hələ ki, sadəcə budur:
"Bizim dinimizlə işiniz olmasın, bizim hüquqlarımızı kobud surətdə
pozmayın, məscidlərimizi sökməyin! Ən əsası - zülmdən əl çəkin!".
Hə,
son olaraq hədisi xatırladım, bəlkə biri hidayət olar bu hədislə:
"Davamlı zülm bəla nazil edər". Yəqin ki, hədisin şərhinə ehtiyac
yoxdur. Səddamların, hitlerlərin aqibəti göz qabağındadır...
|
