...onu da deyim ki, bu il fevral bir az tərs davrandı. Gələr-gəlməz qar, çovğun və tufanla insanları qorxuya salıb, əsl qışın necə keçəcəyini göstərdi. Bax elə burada deyiblər: "Böyüyün ətəyi gen olar". Böyük çilə bu günkü vəziyyəti yaxşı başa düşüb, günlərini mülayimliklə yola versə də...

Bunlar təbiətin şıltaqlığı və bizim isə qışa hazır olmamağımızdan irəli gəlir. Hə, axır ki, fevralın tən yarısına gəlib çıxdıq. Bu həm də çoxlarının səbirsizliklə gözlədikləri "sevgililər günü"dür, axı.

Təqvim ilimiz belə günlərlə - bayram tarixlərilə doludur. Amma hər xüsusi qeyd olunan gün özündə milli-mənəvi dəyərlərimizi əks etdirməlidir. İnsafən, bir neçəsi istisna olmaqla, hamısı dəyərli və faydalı əsaslara söykənir.

İki gün sonra ölkəmizdə "sevgililər günü" qeyd olunacaq. Gənclər bu gündən istifadə edib, ürək qızdıraraq, "sevirəm" sözünü dedikləri qızları görüş yerlərinə dəvət edib, onlara gül-çiçəklər və ətriyyat bağışlayıb, restoranlara aparacaqlar. Nə bilim, sonra hansı fəsadlar baş verəcək. Onu özünüz daha yaxşı bilirsiniz.

Əvvəlcə yaxşı olar ki, bu günün tarixcəsinə balaca işarə edək. Sonar hansı məqsədlərlə və kimlərin xeyirinə hesablanmış olduğunu qeyd edəcəyik.

Məlum olduğu kimi, Valentin - "Sevgililər günü"nün tarixi kökləri qədim Roma imperiyasına - b.e.ə. IV əsrdə Romada qeyd olunan çobanların tanrısı Faur Luperk bayramına, digər bir ifadə ilə Qurd Bayramına gedib çıxır.

Rəvayətdə deyilir ki, hər il fevral ayının 14-də gənc romalılar tanrı Qurdun yaşadığı güman edilən bir mağaranın qarşısında toplanardılar. Mağaranın yaxınlığında küpün içərisində qız adları yazılmış kiçik lövhələr olurdu. Gənc oğlanlar həmin küpdən hansı qızın adı olan lövhəni çəksə, həmin qızla növbəti ilin fevral ayının 14-dək istənilən formada intim həyat yaşayırdılar.

Tarixi mənbələrdə qeyd olunur ki, bu adət heç də xristian din xadimlərinin xoşuna gəlmirdi. Buna görə, Roma kilsəsi rəsmi şəxslərə müraciət edərək onların cəzalandırılmalarını tələb edir. Bu zaman Romanı öz sərt qanunları ilə imperator II Klavdi idarə edirdi. Onun üçün ən böyük problem ordusunda əsgər çatışmazlığı idi. O, bunun əsas səbəbini romalı gənclərin öz sevgi həyatlarını və ailələrini tərk etmək istəməməsində görürdü. Bu səbəbdən II Klavdi Romadakı bütün evlilikləri və nişan mərasimlərini ləğv edir. II Klavdinin hakimiyyəti zamanı yaşayan rahib Valentin isə gizli şəkildə digər rahib Marius ilə birlikdə gəncləri evləndirməyə davam edirdi. Nəticədə bir müddət sonra bundan xəbər tutan Klavdi Valentini həbs edir və döyülərək öldürülməsini əmr edir. Bu, bizim eranıın 270-ci ildə baş vermişdi. Belə ki, hadisədən 226 il sonra, yəni 496-cı ildə Papa Qelasi Valentini təltif etmək üçün həmin günə dini libas geyindirilərək, Valentinin öldürüldüyü fevralın 14-cü gününü "Müqəddəs Valentin günü" elan edir.

Göründüyü kimi, bu günün və hadisənin müsəlmanlara heç bir dəxli yoxdur. Qədim Roma əhalisi açıq şəkildə yol verdiyi fahişəliyə qanuni don geyindirmiş və bu günün xatirəsi "sevgililər" günü kimi dövrümüzə qədər gəlib çıxıb.

Əsası pozğunluqla qoyulan "gün" ilahi əxlaqa köklənən bir ümmətə - müsəlmanlara açıq düşmənçilikdən başqa bir şey deyil.

Yuxarıda qeyd etdiyimiz kimi bu günün adətlərinə uyğun cavanlarımız hərəkət edir. Qazanan tərəf restoranlar, gül-çiçək və parfum satanlar, itirən isə bizik. Mənəviyyatımızı, gəncliyimizi, gələcəyimizi və ən asası insanlığımızı bayram adı ilə itiririk!..