Əlsiz, ayaqsız, əllərin, ayaqların yetmədiyi göylərin pak, müqəddəs qoynunda nəcib, xeyirxah bir ruh dolaşmada, "Orda bir yol var uzaqlarda" göynərtili soraqlarla haqqa sadiq can sirdaşım, mövlam mənim  haqq evinə qovuşmada.

Qovuşmadadır könül yarın bağçasına, çiçək-çiçək ulduz gözlər gəl-gəl deyir, qucaq açır qərib yollar yolçusuna. Gəl-gəl deyir Tanrı üzlü mavi göylər. Get, yolun açıq olsun, gör nə zamandır göylər sənin yolunu gözlər. Yolunu gözlər göy üzü, intəhasızlıqlar,  gözlər səni yer üzündən incik düşən məsum, yalqız ruhlar. Get, qonağı ol, saqisi mələklər olan ay-ulduzla bəzənmiş məclislərin, Allah hüzurundadır məqamı nəfsi təmiz, müqəddəslərin.

Sarmış buludları qulac-qulac qollarına, yer adamı olammadın bəy əfəndim, salam olsun sənin haqq nurundan şölə saçan yollarına. Yer adamı olmağın işi çətin, yerdə pisliklər, yamanlıqlar çox, yer keçib naşı əllərə, yerdə Allah bəndəsinə aman yox. Aman yoxdur yerdə yer qurduna, çay balığına, satılır yer bazarında insan itdən ucuz bahalığına. Yer, quyruğu uzun dünyanı pardaqlayıb, sökənlərin, yerdə sənin nə işin, mələklər ağuşudur yeri tərəzisi düz çəkən kişilərin. Ələkləyəcək ələyində yaxşı-yamanı, iynəsi gözündən əyri sapları keçirən fələklər, qəm yemə, bəy əfəndim, xoş müjdəni səndən əvvəl yetirər göylərə xeyir-şər dəftərini yazan fələklər.   

Necədir, bəy əfəndim, zamana buraxıb hər  işi, zamansızlaşmaq, əl götürüb faniliklərdən, qəm nəğməsini küləklər pıçıldayan uca göylərdə əbədi kamansızlaşmaq. Necədir, hər yaranışın son mənzili, o uca  göylərin halı, yermi, göymü yaxşı, yoxsa bir aldanışdır insanın göylərə can atan şirin xəyalı?  Cənnət qoxulu çiçəklər ruha qida verirmi orada, dan şəfəqli səhərlər çiçəklər üstünə təzə-tər şehin sərirmi orada. Varmı oralarda bölgüsü aparılan ağlar, qaralar, sızıldarmı yenə sinənə dağı çəkilmiş sağalmaz yaralar. Səsi batmış Təbriz necə görünür oradan, Şuşaya əlin çatırmı, söylə, göy adamı, göylər sənin ürəyinə yatırmı?

Ürəyinə yatırmı ruhunun səmalarında pərvaz etdiyi mas-mavi göy qübbələr, yaraşırmı sənə Tanrıdan boyuna biçilmiş ulduz düyməli, ay naxışlı səmavi cübbələr. Necə qarşıladı səni könül həmdəmlərin, nazlı mələklər, üzündən utandımı sənin qara bəxtimizə tasın quran fələklər. Yaşıl işartılı nişanələr  qoyulubmu yolunu getməyə zülmətlərin, ixtiyarı zalımlar əlində deyil ki, yerdə hər tikəsinə tələ qurulan, ilahi nemətlərin. Nizamı necə qurulub göylər səltənətinin, orada ay ulduz işinə qarışmır ki, yaşamır ki, göylər yer rəzalətini, haqqı yeyilən haqsızlıqla barışmır ki. Sağ, sol, yolun o üzü, bu üzü varmı, kəsir burda əyri düzü, kişi olmaq, düzü demək orda işə yarıyarmı?

Göy üzü təmiz ayna kimi, ləkə götürməz, alar  sevdiklərini qoynuna, onu göy üzündən ötürməz. Arındırar mavi, göy sularda, heyran qalar paklığına  onun öz suyunda çimizdirdiyi  sular da. "Xoş gəldin" deyər ona  göylər yaraşığı ruh pərilər, aman allah, nə xoşbəxtlik, göy çadırlar içində sənə laylasını mələklər oxuyan bir yer sərilə. Qapısı taybatay açıla üzünə özgür aləmlərin, heyranı olasan köksü azadlıq eşqi ilə əbədi döyünənlərin. Hər gecən ayrı bir gecə ola, ala səni dövrəsinə ay, ulduz gözəllər, ax necə olar. Şikəstə, "Qara gilə"   oxuya sənə səhərlərə açılan qara gecələr, uyu qardaşım, uyu, ora bir səadət bağçası, yetər inşallah hər arzun  yerinə, ruhun  yalnız orda dincələr.