Bu gün dünyaca məşhur, tanınmış cinayətkarlarından biri Azərbaycana rəsmi səfərə gəlib. Bəli, məhz cinayətkar. Amma naməlum qalan odur ki, nəyə görə cinayətkara, işğalçıya qarşı ikili standartlarla yanaşılır?! Əgər bu siyasətdə məqsəd ədalətə, Fələstində tökülən kimsəsiz uşaqların qanına göz yummaq, ölkəni təhlükəli bir işğalçıya və onların əsl himayədarı olan beynəlxalq sionizmin güdazına verməkdirsə, onda bunun adını siyasət yox, yaxşıdır olar ki, rəzalət qoyaq. Belə olan halda nəyə görə, başqa ölkələri Qarabağ məsələsinə ikili standartlarla yanaşmada suçlayırıq. Görəsən altmış il durmadan qan töküb, soyqırım aparan, işğalçılıq siyasəti yürüdən birinin Azərbaycana rəsmi səfər etməsi, Fələstində, eyni zamanda Azərbaycanımızın dilbər guşəsi Qarabağın işğalı zamanı qanları tökülmüş şəhidlərin qanına təhqir sayılmırmı?

Özlərini Azərbaycanın qeyrətli oğulları kimi göstərən bəzi media vasitələrinin başçıları və telekanalların rəhbərləri belə bir işğalçını ifşa etmək əvəzinə, belə zülmkarlara qarşı çıxan insanları suçlamaqdan belə çəkinmədilər. Axı nə zamandan zülmkara etiraz sifarişli olur, zülmkarı müdafiə etmək isə sifarişsiz? Bunların hansı sifarişə oxşayır? Bunlar bir daha Azərbaycanda fəaliyyət göstərən Kütləvi İnformasiya Vasitələrinin kimlərə qulluq etmələrini sübut edən faktlardır.

Bu gün (9 fevral) Bakının demək olar ki, əksər hissəsi zülmətə qərq olmuşdu. Bakı tıxaclarla tam iflic vəziyyətə düşmüşdü. Hər şey bir-birinə dəymişdi. Bəlkə də bunların hamısı, bu cinayətkar rejimin sonda Azərbaycana hansı "töhfə" verəcəyindən xəbər verirdi.