Can bizim, canan bizim, qurban bizim, ehsan bizim

Yurd bizim, məskən bizim, talan olan xırman bizim. 

Pulla satdıq torpağı, pulla geri almaq gərək!

Hər  şeyi pul həll edirsə şükr ola imkan bizim. 

Qonşunun halın görüb biz bağı borc verdik ona,

qoy özün tutsun bir az can dostumuz-Vartan bizim! 

Döndü  odlar yurdumuz şou ilə modlar yurduna,

nəymə lazım qarə torpaq, gül kimi ekran bizim. 

Yevrovijında bizim qız öylə şey göstərdi ki,

Ar etdim söyləyim - "bu qız ilə oğlan bizim!" 

Erməniysə çıxdı nazla oynayıb "can-can" - dedi.

Söylədi - "əslində hətta Azəri-baycan bizim!" 

Gördü düşmən bal üçün abır-həyadan keçmişik,

Al götür, bir bal sizin olsun, təki meydan bizim! 

Kamila, on yeddi il yaddan kömək etdik tələb,

Dərd bizimdirsə  gərək ancaq ola dərman bizim!