Təvəqqe eləyirəm ki, bu yazdıqlarımı elə tez-tez və tələsə-tələsə oxuyasız ki, guya, daldan sel gəlib sizi basacaqdır və əgər mümkün olsa, bunu oxuduqda gözlərinizi bərəldib, ağzınızı köpüklədin. Amma heç də təəccüblənməyin, yazarın adı Üzeyir Hacıbəyli yox, Cavid İmamoğludur. Ancaq "biriləri" vardır ki, tarixi satirik, dramaturq və publisistlərinin köşə və məqalələrini olduğunu kimi "kopi-past" edərək öz adlarına çıxarır və bunu hətta böyük "qəhrəmanlıq" bilirlər. Araya çox hörmətli İlqar İbrahimoğlu, Şahin Həsənlinin adını salmaq ilə "biriləri" öz piar kompaniyaları üçün bu isimlərdən geniş istifadə edirlər. Yaxın gələcəkdə biz bu sırada xalqımızın digər dəyərli oğul və qızlarının adını görəcəyik.
Tarixdə vardır ki, qədim yunan filosoflarından "dəli filosof" adında bir şəxs özünə "şöhrət" qazanmaq üçün bir gün götürüb, ən gözəl və müqəddəs bir ibadətgaha od vurub yandırmışdı. İndi bu bizim "birisi" yoldaşımız, dəxi, özünə əbədi bir ad qoyub getmək üçün istəyir ki, müsəlmanlar arasında iğtişaş salıb, fitnəkarlıq etsin. İmam Hüseyndən (ə) belə Hacı İlqar İbrahimoğluya qədər hər kəsin adından istifadə edir ki, bircə adı gündəmdə qalsın. Amma mənim ağlım kəsmir ki, "birisi" yoldaşım bu yolda muradına çatıb, əbədi bir şöhrət qazansın. Çünki, "biriləri"nin qorxduğu müsəlman və mömin camaat dilsiz, cansız bir ibadətgah deyildir ki, ona od vurulduqda özünü qurumağa alovı olmasın. Məmləkətimiz neftlə zəngin bir məmləkət olduğu kimi, müsəlmanların da qələmi məntiqli və hikmətli sözlərlə itilənibdir. Ona görə "birisi" dostumuza məsləhət görərdik ki, nahaq yerə "ispiçkasını" korlamasın, burda "neft" nə qədər çox olsa da pajar eləyə bilməyəcəkdir. Bəlkə ola bilsin ki, öz üstünə od düşə! Dəxi, Facebookdakı bir iki nəfəri çıxmaq şərti ilə o odu söndürən tapılmaz. Vəssalam!
|
