Hal-hazırda dünyada bir səs eşidilir, o da Amerikanın səsidir. Nə qədər dünyada insan haqlarından danışılıb, bu yöndə çeşidli təşkilatlar yaransa da, ancaq yenə də yeganə eşidilən səs Amerikanın səsidir. Bu səs o dərəcədə güclüdür ki, nəinki Amerika və onun tərəfdaşlarının törətdiyi cinayətlərin ücbatından fəryad edən insanların səsini üstələyir, hətta dünyada olan 200-dən artıq ölkənin səsini belə boğmağa qadirdir. Təkcə İkinci dünya müharibsəindən bu tərəfə Amerikanın dünyanın müxtəlif  bölgələrində, müxtəlif ad və bəhanələrlə müdaxilə edərək milyonlarla insanın qanına bais olması, daha doğru desək soyqrım törətməsi müəyyən qədər məlumatlı insanlara gün kimi aydındır. Bu ölkə hətta insan haqlarını qoruyan təşkilat kimi tanınan BMT-də nə dərəcədə qeyri-demokratik üsullardan istifadə edərək ümumbəşəri konvensiyaları tapdamağı belə hamıya bəllidir. Demokratiyanın əsas prinsiplərindən hesab edilən əksəriyyətin üstünlüyü prinsipi, nə qədər gülünc görsənsə də, elə "demokratiya carçısı" olan Amerika tərəfindən "VETO" hüququ ilə açıq-aşkar tapdalanır, ancaq yenə Amerikanın səsi bütün səsləri üstəliyir. Biz bunun Azərbaycanda da şahidiyik. Azərbaycan hər zaman öz qanuni və milli hüquqi olan Qarabağ torpaqlarını geri almaq barədə ciddi addım atmaq istədikdə, Amerika tez əl-ayağa düşərək, öz ermənipərəst xislətini aşkar edib, Azərbaycanın bu yöndə ciddi addım atacağı təqdirdə Qarabağın müstəqilliyini tanıyacağını ilə hədələyir. Bunlara baxmayaraq, Amerikanın radio və himayə etdiyi saytları Azərbaycanda açıq şəkildə fəaliyyət göstərir və öz "səsi"-ni aşkar surətdə Azərbaycan qanunvericiliyinə nə qədər zidd olsa da, yenədə ucaldır.

Bu günlər İraqda parlament seçkilərinə hazırlıq işləri gedir. Ancaq dünyanın hər yerində olduğu kimi Amerikanın bu ölkədəki müdaxilələri də iraqlıları dinc buraxmır. Vaxtilə Səddama və onun "BƏƏS" partiyasını diktator yığıncağı adlandıran və elə bu adla da onlara hücum çəkib əslində isə İraqı işğal və viran edən Amerika, indi isə bu partiyanın üzvlərini himayə etməklə yanaşı İraq hökümətində və seçkilərdə mütləq iştirak etmələrini istəyir, əks təqdirdə Amerika hökümətinin bu seçkiləri legitim tanımayacağı ilə hədələyib.

Amerika prezidenti müavini Co Bayden artıq bir neçə gündür ki, köçünü İraqa salıb və İraq höküməti və xalqı ilə demək olar əlbəyaxadır. Məqsəd isə yenə Amerikanın maraqları və "səsi"-dir.