Amerika Əmək Nazirliyindən verilən məlumata görə, bu ölkədə işsizlərin sayı kəskin artıb və bu artım sürətlə davam edir. Mənbə buna əsas səbəb kimi düyada baş verən maliyyə böhranını göstərir. Məlumatda deyilir ki, işə götürülənlərin sayı, işdən çıxarılanların sayından düz beş-altı dəfə azdır. Belə gedərsə amerikalılar bu ölkənin vətəndaşlığından çıxıb, Avropa ilə Asiyanın düz ortasında yerləşən, zəngin neft yataqlarına malik olan və regionun ən aparıcı dövlətinə çevrilən odlar yurduna - Azərbaycana üz tutacaqlar. Çünki orada hər il təqribən yüz iyirmi, yüz əlli min yeni iş yeri açılır. Əhalinin sayını nəzərə alsaq, bu gedişlə yaxın vaxtlarda altı aylıq uşaqlardan başlayaraq hamı işlə təmin olunacaq. Ekspertlər praqnoz verirlər ki, bir müddətdən sonra yaş həddi üç aya da endirilə bilər. İşdən çıxarılma yaxud qovulma halları isə qeyd olunmur. Olunsaydı, Amerikadakı kimi saat 18:00-dan sonra küçələrdə insan əlindən tərpənmək olmazdı...

Azərbaycan Milli Məclisinin mətbuat xidmətindən verilən məlumata görə isə soyadların sonluqları dəyişdirilməlidir. Məlumatda bildirilir ki, bu vaxta qədər "ov", "yev" və sair sonluğuyla bitən soyadlar artıq milli şəkilçilərlə tamamlanmalıdırlar...

Fərqi özünüz deyin. Görün, Amerika iqtisadi və sosial-ictimai cəhətdən bizdən nə qədər geridədir. Azərbaycanda demək olar ki, bütün sosial problemlər həll olunub. Milli məclisdə də vaxt öldürmək üçün geniş müzakirə obyekti axtarırlar.

Hə, müzakirə demişkən, ötən həftə Azərbaycan Yazıçılar Birliyində keçirilən bir mükafatlandırma mərasimi yadıma düşdü. Orada bir neçə nəfərin müxtəlif nominasiyalar üzrə mükafatlandırılması nəzərdə tutulmuşdu. Görünür, bəzi dostlar bizi də bu mərasimdə görmək istəmişdilər...

Gənc yazarlar AYB-də Natəvan klubuna toplaşıb, həvəslə həyəcanlı anı - mükafatlandırmanı gözləyirdilər. Ancaq ayaq üstə, çoxu da barmaqlarının ucunda qalxıb, çıxış edənlərə baxmaq istəyirdi. Çünki ziyalılar və yazıçılar həmişə belə tribunalardan xalqa işıqlı gələcəyi göstəriblər. İndi isə təəssflə deməliyəm ki, sözügedən klub bir az başqa formada təmir olunmaqla, gələcəyə saçan işıq şölələrini azaldıb. Klubun ortasında geniş və bəzəkli dəyirmi masa yaratmaqla, qələm sahiblərinin bir yerə toplaşmalarına əngəl törədiblər, sanki!

Təqribən yeddi-səkkiz il əvvəl Bakıda böyük meydanlardan biri kimi tanınan "Qələbə" meydanına insanlar kütləvi şəkildə çıxıb, haqlı etirazlarını bildirirdilər. Bu kütlənin qarşısını almaq üçün o meydanın düz ortasında bir dairə yaradıb, gül-çiçəklə bəzədilər. Bununla da insanların haqq səslərini ucaltdıqları məkanı məhdudlaşdırdılar. AYB-nin üzvləri də başqalarından tam fərqli olaraq daha yaxşı düşünür və aydın sabahlara gedən yolu təyin edə bilirlər. Belə insanların bir yerə toplaşaraq fikir mübadiləsi aparmaları, düzgün olanı göstərmək və gənclərin sağlam ruhda tərbiyəsi deməkdir.