2009-cu il Bakının İslam mədəniyyətinin paytaxtı seçilməsi müsəlman və ən azı bir vətəndaş kimi bizi sevindirməyə bilməz. Bundan əlavə beynəlxalq konfransların və siyasi görüşlərin Bakıda keçirilməsini heç də təsadüfü hesab etmirik. Bəzi əhəmiyyətli idman yarışlarının paytaxtımızda təşkili də daim diqqət mərkəzində olub. Qeyd etməliyik ki, bu sadaladığımiz hallar ölkəmizin dünyada daha da geniş tanınmasına xidmət edir.
Amma sən demə, Bakı şəhəri müqəddəs İslam dininə qollarını açıb onu isti qucağına səslədiyi vaxt dinin bəzi zəruri məsələlərini tam ögeyliklə qarşılayacaqmış. Əslində bəzi neqativ halların baş verməsi bizə belə söyləməyə əsas verir.  İlk öncə dinin əsaslarına qarşı qoyulan qadağalar ölkəmizdə dindar müsəlmanların bədbinləşməsi ilə nəticələndi desək, səhvə yol vermərik. Daha doğrusu, ölkəmiz İislam dövlətləri arasında öz yerini müəyyənləşdirmək istədiyi vaxt dinimizin qadına verdiyi hüquqların zorla alınması xəbəri təntənəli açılışlar haqqında bəzi şubhələr yaradır.
Tərəddüdsüz-filansız deyə bilərik ki, dünyanın hər yerində müsəlman qadını dedikdə hicablı və sifətindən başqa örtülü vəziyyətdə olan bir xanım nəzərə gəlir. Hicab məfhumu dinin əsas qaydalarından və ən doğma terminlərindən hesab olunur. Şəriət qaydalarına uyğun desək, hicab dinin qadına verdiyi dəyər və hüquqdur. Həzrəti Muhəmməd (s) buyurur: �Həya gözəldir, qadında isə daha gözəldir�. Hicab isə insanın həyasının və dəyərinin göstəricisidir. Təəssüflə deməliyik ki, ölkəmizdə belə bir vəziyyətdə hicaba qarşı mübarizə heç də başa düşüləsi deyil. Hicabın mahiyyəti, vacib olunma səbəbləri və qadına verdiyi dəyər haqqında kifayət qədər deyilib və çox saylı kitablar nəşr olunub. Bu yazının həcmini nəzərə alaraq ancaq hicabın qadın şəxsiyyətinə verdiyi dəyər haqqında bir neçə cümlə yazmaqla kifayətlənirəm. Bu barədə Allah-Təala �Əraf� surəsinin 22-ci ayəsində buyurur: ".....(Adəm və Həvva) ağacın meyvəsindən daddıqda ayıb yerləri (gözlərinə) göründü. Onlar Cənnət (ağaclarının) yarpaqlarından (dərib) ayıb yerlərinin üstünü örtməyə başladılar...."

Dünyanın hər yerində geyim deyilən anlayış qəbul olunur. Amma onun forması milli adət-ənənələrə və insanların mənsub olduqları dinlərə bağlıdır. Kişi və qadın geyim fərqində onların fizioloji quruluşları da öz təsirini göstərməlidir. Anlamalıyıq ki, hicab qadınla kişi arasında sərhəddir. Yadda saxlamalıyıq ki, hicabdan lazımi səviyyədə istifadə etməyən cəmiyyət tüğyankar şəhvətin xətərli aqibətindən yaxa qurtara bilməyəcək. Nəticədə, həmişə təlatümlü dənizin dərin dalğalarında qərq olacaq.
Müsəlman cəmiyyətini hicabsızlığa tərəf sürükləmək bizi ciddi narahat etməlidir. Çünki ictimaiyyətin ümumi xəstəliyi kimi xarakterizə olunan çılpaqlıq hər birimizin qapısını döyüb yaxamızdan sallana bilər.
İslam Mədəniyyəti paytaxtında hicaba qarşı təpkilər günü-gündən çoxalıb ictimai hal almaqdadır. Bakıdan başlayıb müxtəlif rayon və şəhərlərə nüfüz edən hicab problemi əhatə dairəsini genişləndirir.
Ali, orta ixtisas və orta məktəblərdə müsəlman qızlarının hüquqlarının açıq-açığına pozulması və qadınlara qarşı zorakılıq hallarının artması son zamanlar tez-tez müşahidə olunur. Xatırladaq ki, məlum çətinlik ölkəmizin bir sıra rayonlarında �Qax, Yevlax, Zərdab, Neftçala, Quba və Lənkəranda yaşanıb. İndi isə bunun davamı olaraq Şirvan (Əli Bayramlı) şəhərində özünü göstərir. Adıçəkilən şəhərdən verilən məlumatlara görə, İcra Hakimiyyəti tərəfindən bəzi nümayəndələr məktəblərə gəlib hicablı xanımların baş örtüklərini məcburi və kobudluqla açır və onları təhqir edib sinif otaqlarından uzaqlaşdırırlar. Bununla da insanları təhsil alma hüququndan məhrum edirlər.
Görünür, ölkə başçısının müəyyən tədbirlərdə söylədiyi fikirlər hələ də bəzi özbaşına məmurlara təsir etmir.  Ya da belə narazılıqlarla xalqı prezidentin daxili siyasətiylə üz-üzə qoyub çirkin niyyətlərinə çatmağa çalışırlar. Ümid edirik ki, Bakının İslam Mədəniyyəti paytaxtı olması nəzərə alınaraq belə problemlər tezliklə öz həllini tapacaq.