Yola salmaqda olduğumuz ilin tamamına bir neçə gündən çox vaxt qalmayıb. Əslində əvvəlkilər kimi 2009-cu ilin də hardan gəlib, hardan getməsi adama yuxu kimi gəlir. Aylar ötüşüb, günlər bir-birini izlədikcə ilin başa çatmasını səbirsizliklə gözləyirik. İntizarını çəkdiyimiz aylar və günlər bizə nisbətən sevinc bəxş edib, qəlblərimizi aram etsə də, cismimizi son mənzilə tərəf sürükləyir...

Axirətdən danışıb, cənnət-cəhənnəmi xatırlatmaqla, sizi qorxutmaq fikrində deyiləm. Lakin yola saldığımız hər bir günün ömür səhifəmizə necə həkk olunması bizi düşündürməlidir. Beləliklə, həvəslə gözlədiyim anların arxasınca hansı xatirələrlə baxacağım həmişə qafamı məşğul edib.

Elə redaksiyada kompüter arxasında oturub özümdə bu cür söz-söhbətləri götür-qoy edib, düşündüyüm zaman həmkarlarımdan biri içəri girib, Qafqaz Müsəlmanları İdarəsinin (QMİ) məhərrəm ayının başlanması münasibətilə fətva verdiyini dedi: "Bu il matəm dekabrın 18-i başlayır, aşura da 27-i olacaq".

Hə, onu da deyim ki, yola salmaqda olduğumuz ildə ölkəmizdə QMİ-ni təmsil edən şəxslər o qədər də yaddaqalan işlərə imza atmayıblar. Hətta, sözügedən quruma aid olan məsələlərin heç biri həllini tapmadığı üçün, bir neçə dəfə də şəxsən özüm onları tənqid etmişəm.

Məncə, 2009-cu ilin Bakı İslam Mədəniyyətinin Paytaxtı olmasını xatırlatmaq lazım deyil. Çünki bu hadisəni böyük bir nailiyyət hesab edənlər az qalırlar ki, barmaqlarını millətin gözünə soxsunlar. Elə bil Qarabağı işğaldan azad edib, qaçqınları doğma yurd-yuvalarına qaytarıblar. Bir tərəfdən də ilin başa çatmasına sevinirəm ki, daha hara çatdı Bakının paytaxt olduğundan başımız keçəllənməyəcək. Bundan əlavə deyirəm, bəlkə də ibadət evlərinin-məscidlərin canı dincəldi. Onlar hər gecə sübhə qədər dua edirlər ki, hansısa məmurun qəzəbinə tuş gəlməsinlər. Yoxsa qanunsuz tikildikləri haqda bir arayış hazırlayıb, küllərini başlarına ələyərlər...

İslam mədəniyyəti paytaxtından danışmaq fikrim-zadım yoxdur. Son zamanlar əli qələm tutanlar arasında bu haqda yazha-yazdır. Əşşi, heç onları da qınamıram, ələrindən bir kəlmə yazıb etiraz etməkdən başqa nə gəlir ki?!

Məlumatı eşidəndə bir az sevinsəm də bu çox çəkmədi. Çünki Qazilər Şurasında baş qazi kimi Dini Qurumlarla İş üzrə Dövlət Komitəsinin sədri Hidayət Orucov cənabları oturmuşdu. Ay balam, Hidayət hara, dini mövzu haqqında fətva vermək hara? Görünür bunlar ya yerlərini səhv salıblar, ya da kələfin ucunu itiriblər. Söz Hidayət müəllimdən düşmüşkən, bir neçə gün əvvəl ANS telekanalında müsahibə verən bu cənab bildirdi ki, bizim öz dinimiz var. Azərbaycan məscid sökən deyil, məscid tikən dövlətdir. Hidayət müəllim sizi İrəvan Teatrında rəbhər işlədiyiniz dövrdən tanıyırıq. Onu da qəbul edirik ki, həyatda dinsiz məxluq yoxdur (?). Hərə bir şeyə baş əyir. Sizin də müqəddəs İslam dininə tam səmimi qulluq etməyiniz bizdə zərrə qədər şübhə yaratmır. Amma öz aramızdır, bir-birinin ardınca bir neçə məscidin sökülməsinə kimin göstəriş verməsini hamıdan yaxşı siz bilirsiniz!