İngilislərin sözü olmasın - "islamonline". İslamın qloballaşma qarşısında ayrıseçkiliyə məruz qalacağını əslində 3 il bundan öncə təxmin etmişdim. Çünki, avropalılar qloballaşma prosesində İslamın bütünlüklə Avropanı cənginə alacağından bərk narahat idi. Bu narahatlıq hissi ilk dəfə Fransadakı hicab qadağası ilə biruzə edilmişdi. Daha sonra Almaniyada məscidlərlə bağlı qadağalar, İngiltərədə məlum terror aktlarından sonra müsəlmanlara qarşı kəskin rəftar, Danimarkadakı karikatura olayı və s. İndi avropalı mütəxəssislər bu sualı özlərini tez-tez verirlər, "biz kimik?", "kökümüz hardan gəlir?", "gələcəyimiz necə olacaq?".  Cavab isə istənilən halda onlara fobiyalı gəlir. Belə ki, son statiksikaya nəzər salaq görərik ki, dünyada hər dörd şəxsdən biri müsəlmandır. Yəni, bir kimlik olaraq dünyadakı insanlar müsəlman olur. Bunun ən çox payı isə təbii ki, xristian bloku sayılan Avropaya düşür. Siyasi dairələr bunu İslamın Qərb dünyasına qarşı "Furqan" yürüşü kimi dəyərləndirir və "xaç yürüşünə" cavab olaraq qiymətləndirirlər. Çarəsizlik qarşısında qalanlar isə ən axrıncı variantlara belə əl atmaqdan çəkinmirlər. Belə ki, insanlar arasında radikal millətçilik, nasist fikrləri təbliğ etməklə bir növ "Furqan" yürüşünün qarşısına sədd çəkmək istəyirlər. Son belə addımı İsveçrə sağçıları atdı və ölkədə minarə qadağasına nail oldu. Ekspertlər son iki həftəyə qədər insanların böyük bir qisminin minarə qadağasına yox deyəcəyini bildirirdilər. Ancaq, son iki həftədə sağçı millətçilərin insanlar arasında ifratçı meyilləri gücləndirməsi ilə referendumda "minarələr olmasın" deyənlər üstünlük təşkil etdi. Bu artıq açıq-aşkar islamafobiyadır və demokratik dəyərlərdən uzaq bir haldır. Halbuki, demokratiyaya tərif verən fəlsəfəşünas və mütəfəkkirlərin böyük əksəriyyəti mənşəcə isveçrəli olub. Beləliklə, son referendumdan sonra dünyadakı kimlik mübarizəsinin mərkəzi İsveçrə oldu. İndi islamafobiya və islamaviva tərəfdarları əvvəlkindən fərqli şəkildə, açıq-aşkar üz-üzədir. Əslində bu vəziyyət indiki şəraitdə Qərb dairələrinin mənafeyinə xidmət edir. Çünki, bu "biz kimik" sualına veriləcək ən yaxşı cavab ola bilər. Artıq, oxşar referendumun Amsterdamda da keçiriləcəyi bildirilir. İndi hər şey müsəlmanların bundan sonra atacaqları addımlardan aslıdır. "Hər cür ayrıseçkiliyə yox" şüarını Qərbin "demokratlar"ına tez-tez xatırlamaq lazımdır. Çünki, bütün bu fobiyaların arxasında ağız dolusu demokratik dəyərlərdən danışan siyasi dairələr durur.