Bir neçə saat əvvəl "məmurlar" bizi qarşıdan gələn Qurban bayramı münasibətilə təbrik etdilər. Belə ki, 2 saylı Bakı İqtisad Məhkəməsinin Fatimeyi-Zəhra (s.ə.) məscidinin sökülməsi haqda qərarı Apellyasiya məhkəməsi tərəfindən qüvvədə saxlanıldı. Çox qəribədir və çox ürək ağrıdıcıdır, elə deyilmi? Axı niyə, məscidin sökülməsi reallaşmalıdır? Ancaq mənə elə gəlir ki, bu bir məscidin sökülməsi məsələsi deyil. Məscidi göbələk sayanlar qalibmi oldular? Yox, belə deyil. Belə düşünənlər yanılırlar. Çünki, Allah Təalanın kəlamlarının toplusu olan Qurani Kərimin Maidə surəsinin 56-cı ayəsində belə qeyd edilir
وَمَنْ يَتَوَلَّ اللَّهَ وَرَسُولَهُ وَالَّذِينَ ءَامَنُوا فَإِنَّ حِزْبَ اللَّهِ هُمُ الْغَالِبُونَ
Hər kəs Allahı, Onun Peyğəmbərlərini və iman gətirənləri özünə dost tutarsa, (hər iki dünyada işləri yaxşı gedər). Şübhəsiz ki, qələbə çalanlar məhz Allahın Hizbidir(dəstəsi).
Bu məmurlara deyən lazım İslami atributlarla və ya məscidlərin sökülməsi nəyinə lazımdır? Onsuzda Azərbaycanda çox insanlar 50-60 və nadir hallarda 70 yaşa kimi yaşayır. Düzdü orta yaş kişilərdə 69, qadınlarda isə 72 götürülüb. ABŞ-ın Mərkəzi Kəşfiyyat İdarəsinin saytında isə Azərbaycan üçün orta yaş həddi 66 götürülüb. Yəni sözümün canı budur ki, onsuzda hamımızın ayağı o tərəfdədir.
Firon özünü Allah adlandırırdı, axırı nə oldu? Yəzid İslam Peyğəmbərinin əziz nəvəsi İmam Hüseyni qətlə yetirdi, onun axırı nə oldu? Hitlerlər, Pəhləvilər, Düvaliyelər, Pinoçetlər, Stalinlər, Səddamlar, bir sözlə bütləşdirilmiş liderlər axırları nə oldu? Onlar tarixə necə düşüblər? Diktator, qəddar və zalım kimi. Bunların bəzilərinin qara həyat səhifələrini vərəqləmək istəyirəm. Səddam Hüseyn-elə də uzaq keçmişdə olmayan bir diktator, yüz minlərlə insanın qətlinin sifarişçisi, hətta insanları canlı olaraq divarlara hörmək qərarını vermiş bir cani, bir gecədə yüzlərlə İslam aliminin qətlinə fərman vermiş zəmanəsinin Yezidi.
Səddam İraqın çox tanınmış və elə bu zəmanəsinin yezidi tərəfindən şəhid edilmiş Ayətullah Məhəmməd Baqir Sədrə bir məktub yazır. Məktubda o zalımların həmişəki metodlarından gözəl istifadə edir. Əvvəl ona mükafatlar, əgər qəbul etməsə isə həbs və öldürüləcəyi ilə hədələyir. Şəhid Sədrin cavabı isə onun məqamını bir daha sübut edir, zalım diktatora isə sarsıdıcı zərbə vurur. Bu məktubdan bir neçə cümləni sizin nəzərinizə çatdırmaq istəyirəm. Yazımın sonunda isə linkə tıklayıb məktubun tam mətnini oxuya bilərsiniz.
"Mən sizin ağıllı olduğunuzu zənn edirdim. Sizlər açıq sözləri belə, inkar edirsiniz. Sizə lazım olan sözü söylədim və nəsihət etdim. Əgər Qiyamətə inanırsınızsa və həqiqətə çatmaq istəyirsinizsə, məni dinləyin. Sizlər pozğunluq xəstəliyi ilə xəstələnmisiniz və öldükdən sonra diriləcəyinizi unutmayın. Allaha qarşı döyüş açmısınız: Allah vəlilərini (alimlər) nəzarətə götürür, ən kiçik bir zənnə söykənərək, eynilə cahiliyyət dövründəki atalarınız kimi onları öldürürsünüz. Ölkəmizin əsərlərini dağıdırsınız. Siz, eynilə bir quru odun parçası, heç bir sözün təsir etmədiyi daş kimisiniz. Tağutlara tapınırsınız, fironların nəvəsisiniz. Məni ölümləmi hədələyib, qorxudacağınızı zənn edirsiniz?! Ölüm haqdır və hamımız ölümü dadacağıq. Zalımların əliylə öldürülmək Allahın xalis qullarına olan bir ikramı deyilmi?
Sizin məndən razı olmanızı da gözləmirəm. Haqqı batiləmi satmağımı gözləyirsiniz? Allaha itaəti buraxıb, sizəmi itaət edim? Sizi razı edib, Onumu qəzəbləndirim? Bilin sizin vəziyyətiniz dəyişəcək və Allah sizləri zəlil edəcək, olanları sizə müsəllət edəcək və məğlubiyyətə uğrayanların vəziyyətinə düşəcəksiniz. Heç hesablamadığınız ağrıları dadacaq, bəlalara mübtəla olacaqsınız və hər biriniz çöllərə dağılacaq, səltənətiniz darmadağın olub, çəkmələr altına alınacaqsınız.
Sizlər başqa şəhərlərə köç, diyarlarınız, mallarınız parça-parça olacaq və gözlərinizi açdığınızda xalqın sizi lənətlədiyini görəcəksiniz. Tarix səhifələrində quru bir ləkə olaraq xatırlanacaqsınız!...
Gördüyünüz kimi, bu cavab vaxtilə Həzrət Əbülfəzl Abbasın Şimrə verdiyi cavabın təsiri ilə verilən bir cavabdır. Həqiqətən böyük İraq aliminin dedikləri hamısı düz çıxdı. Necə demişdi, elə də oldu. Yəqin çoxları Səddamın ABŞ əsgərlərinin ayaqları altında dünyaya təqdim edildiyi fotosunu görmüsünüz. Hə son sözümdə budur, məscidlərin sökülməsini əmrini verənlər heç şübhəmiz yoxdur ki, sizin də sonunuz belə olacaq!
|
