Son zamanlar regionda atmosferin dəyişildiyini bəzi həssas şəxslər hiss edirlər. Onların dediklərinə görə, havanın tez-tez tutulub-açılması regiona qərbdən daxil olan soyuq hava kütləsindən sonra baş verib. Məlumatın daha maraqlı yeri odur ki, hava kütləsi ancaq qərb küləyi vasitəsilə parçalanıb, qeyri-sabit şərait yaradır...

Bu günlərdə isə elektron poçtuma yeni bir məlumat daxil olub. Xəbəri bir neçə təşkilat göndərib ki, narahat olmayım, yaxın aylarda hava mülayim keçəcək. Bəzi hallarda isə həzin meh də əsəcək. Birmənalı olaraq, soyuqdan danışmağa dəyməz. Bir sözlə regionda nisbi sabitlik hökm sürməkdədir. Axı, deyəsən qərb küləyi elə özlərinə tərəf yan alıb...

Bax indi-indi qafama girir ki, neçə illərdir Qarabağımız niyə soyuqdan buz bağlayıb? Ay sənə qurban, gedin öz elinizdə bu küləyi əsdirin də. Qoyun biz də qonşuluğumuzu edək, yavaş-yavaş buzlarımızı əridək. Öz aramızdır, havaların qızmasından da yaman qorxuram, arvad-uşağı evə yığışdırmaq lazımdır axı.

Söz qonşudan düşəndə, konunun başına bir az fırlanmağı borc bildim: Əməl əqidədən və niyyətdən doğur. Əqidə isə məntiq və elmə əsaslanmalıdır. Daha doğrusu ilahi vəhyə köklənən əqidə ən düzgünüdür. Bizim əqidəmiz də İslam dininə bağlılığıyla seçilir. İslamın qonşuya verdiyi haqqı heç bir ideologiya ortaya qoya bilməyib və bilməz. Belə ki, Müqəddəs İslam Peyğəmbəri Həzrət Məhəmməd (s) buyurur: "Qonşunun halını bilmədən yatan şəxs müsəlman deyi". Müsəlmanlardan bir neçə şəxs haqqında soruşacaqlar. Ailə tərkibindən sonra qonşu gəlir. Qonşu müsəlman olarsa ikinci bir vəzifə əlavə olunur. Bu məfhum çox geniş mənanı ifadə etməklə, insanların mehriban, təhlükəsiz və rahat yaşamalarını təmin edir. Qonşularımızın əksəriyyətinin müsəlman olmaları, bir tərəfdən bəxtimizin üzümüzə gülməyindən xəbər verir- onlardan heç bir təhlükə filan gəlməz. Başqa tərəfdən isə işimizi çətinləşdirir- həm qonşu, həm də müsəlman olmaları bonumuzun yükünü bir az da çoxaldır.

Bu külək-filan gedəndən sonra deyəsən beton divarlar sadə "setka" çəpərlərlə əvəz olunacaq. Artıq qəlbimizdə və qərbimizdə yerləşən qonşumuz gediş-gəlişi ikitərəfli, cənub qonşumuz isə birtərəfli vizasız reyimə keçirdi.

Manesef, belə  gedişlər qərb küləyinin təsirində cücərən qidalarla ət-qan bağlayanlar tərəfindən qısqanclıqla qarşılanır. Yazının sonunda onlara kiçik xatırlatma etmək yerinə düşər. Qonşularımızla gediş-gəlişin vizasız rejimə keçirilməsindən ilk qazanan tərəf sıravi vətəndaşlar olacaq. Çünki, tarix boyu bu xalqlar eyni regionda və oxşar adət-ənənələrlə yaşayıblar. Ən azı müsəlmanlıqları və qonşuluq prinsipləri onları bir-birlərinə daha da dərındən bağlayır. Bu baxımdan gediş-gəlişin asanlaşdırılması müsbət nəticələr verəcək. Həm maddi tərəfdən həm də vaxt baxımından vətəndaşlar çox əziyyət çəkirdilər. Məsələn, cənuba gedən hər bir şəxs qırx dörd manat viza, on səkkiz manat isə analiz üçün ödəməli olurdu. Bundan əlavə son zamanlar xüsusi qayda tətbiq edilmişdi. Həftənin birinci günü qadınlar tələb olunan sənədləri təqdim etməli, dördüncü gün vizanı almalı, beşinci gün isə kişilər sənədləri verib, növbəti həftənin ikinci günü götürməli idilər. Bu da xüsusən rayonlardan gələnlər və ailəvi getmək istəyənlər üçün çətinliklər yaradırdı. Viza reyiminin aradan götürülməsi, belə problemlərin birdəfəlik həlli deməkdir.

Yeri gəlmişkən, təhlükəsizlik baxımından da narahat olmayın. Sərhəd keçid məntəqələrinin səmərəli fəaliyyətlərini qiymətləndirmək lazımdır. Onlar tam güclərilə nəzarəti gücləndirib, vətəndaşların rahatlıqları üçün əllərindən gələni əsirgəməməyə and içiblər. Biz də qonşularımıza sədaqətli olacağımıza AND İÇİRİK!