Bu dünya durduqca xeyir də, şər də duracaq. Yaxşı da, pis də olacaq. Təbii ki, müəyyən olunmuş bir zamana qədər. Odur ki, mən öz növbəmdə Hacı İlqar İbrahimoğlunun adından istifadə edib gündəmə gəlmək istəyən və İslamın yüksəlişi faktoru qarşısında aciz qalan biçarələrə tək bir söz "ərz" etmək istəyərdim. Düzdür ki, Hacı İlqar İbrahimoğlu "kosmonavt" yetişdirmir, ancaq ən azından gələcəkdə arzusu kosmonavt olmaq olan yüzlərlə şagird və tələbənin təhsil və təlim hüququnun bərpası üçün əlindən gələni edir. Aya belə uça biləcək mənəvi cəhətdən zəngin insanlar yetişdirir. İnsan haqlarının sadiq müdafiəçisi haqda ürəkbulandırıcı fikr söyləyənlər nədənsə bunu görməzdən gəliblər. Əgər, sözünüz varsa, söz deyin. Daha suyu bulandırıb insanların fikrini çaşdırmaqla nə özünüzü, nə də bizləri yormayın. Ölkə daxili və xarici bütün təşkilat və qrumlar dəfələrlə Hacı İlqar İbrahimoğlunun insan hüquqları və azadlıqları uğrundan apardığı şücaətli mübarizəsini təqdir etmişlər. Hacı İlqarın kimliyindən və xüsusən də onun təhsilindən narahat olanlar gərək heç olmasa bu məsələni unutmayaydılar.

Azan isə həqiqətən həqiqət yolunu azanların dərdli yeridir. Azan səsindən narahat olanlar, görəsən niyə Azan müqabilində Üzeyir Hacıbəylinin "Koroğlu" üvertürasını qoyurlar. Məgər Üzeyir bəy İslami dəyərləri inkar edirdi?! Azərbaycanın şərəfli və igidliklə dolu tarixi İslamdan və dindən kənar olmamışdır. Babəki xürrəmi adlandırıb dinsiz və əqidəsiz göstərməklə nəyə nail olmaq istəyirsiz ki?! İslam dini bütün gözəllik və insanpərvərliyi ilə Azərbaycan xalqının canına hava və su kimi yayıldı. Bunun üçün nə qılınc, nə də ki nizə lazım oldu. Babəkin mübarizəsi isə əsl qəhrəmanlıq və ədatləsevərlik mübarizəsi oldu. Babək İslama və onun dəyərlərinə qarşı yox, zalım xəlifə və zülmkar əyanlara qarşı çıxırdı. Əgər Babək İslamdankənar bir şəxs olsa idi, tarixi Təbəri Bəzz qalasının alındığı gün qaladan Azan səsinin gəlməsindən yazmazdı. Bəzz qalasını atəşpərstlərin tapınağı kimi təqdim etməyə çalışanlar, təbii ki, sonda məscdilərdən Azanın verilməsinə də qarşı çıxacaqlar.

Babək haqq dinin haqpərəst tərəfdarı kimi məzlumların hüquqlarının müdafiəsinə qalxdı. Necə ki, bunu dövrümüzün Babək və Koroğluları edir. Hacı İlqar İbrahimoğlu kimliyi və şəxsiyyəti bir hüquq müdafiəçisi kimi tarixin şərəfli səhifəsində özünə yer alacaq və insanların qəlbində bir azadlıq və ədalətsevər mübariz kimi yaşayacaq.