"O olmasın, bu olsun" kinokomediyasının ləzzətli bir yeri var. Soltan
bəy qızı Gülnaz xanımı Məşədi İbada verməsi münasibətilə evində məclis
qurur. İzdivac şərəfinə tost deyən qəzetçi Rza bəy gözlənilmədən
söhbətin mövzusunu dəyişərək, bu yeni qohumluğun səbəbini
aydınlaşdırmağa çalışır. Personaj məclisdəkilərə üzünü tutub Soltan
bəyin cavan, gözəl qızı Məşədi İbada niyə ərə verdiyini sual eləyib
deyir ki, bəlkə puluna görə? Dərhal deyir ki, xeyr, Soltan bəy elə də
pulgir adam deyil. Vəzifə məsələsinə gəldikdə isə bu da özünü
doğrultmur. Çünki Soltan bəy müflisləşsə də, bəy titulu daşıyır. Təzə
bəyin yaraşıq-filanı da yoxdur, qoca kişidir, üstəlik də kifir. Onda
bəs Məşədi İbadın nəyi Soltan bəyin xoşuna gəlib?
Qəzetçi Rza bəy: bax, biz burda şərab içirik, Məşədi İbad isə bir
kənarda əyləşib çay içir. Soltan bəy gözəl-göyçək qızını ona görə
Məşədi İbada ərə verir ki, o, əsl MÜSƏLMANdır. Ancaq məclisdəkilərin
bic-bic qımışmağından bilinir ki, heç kim Rza bəyin sözünə inanmır.
Qohumluğa bircə səbəb var, o da təzə bəyin puludur.
Türkiyə-Ermənistan sərhədlərinin açılma məsələsi gündəmə gələn kimi
qəzetçi Rza bəyin sualları eynilə mənim də qafamda fırlanmağa başladı.
Ünlü siyasətçi Abdulla Gül dəfələrlə deyib: "Sərhədlərin açılması
Qarabağdan keçir.
Açığını deyim ki, bir şeydən şübhələnməyə başlamışam. Türk rəsmiləri
bütün çıxışlarında Qarabağ terminindən çox istifadə edirlər. Deyəsən,
arkadaş dediyimiz türklər bizim başımızı firlada-fırlada, gözümüzə kül
üfürə-üfürə erməni dığaları ilə əməlli-başlı kirvəliyə başlayacaqlar.
Türkiyə ilə Ermənistan arasında protokolların imzalanması, siyasi
şərhçilərin həyəcan doğuran mülahizələriylə desək, qonşular arasında
münasibətlərin yeni mərhələyə qədəm qoyacağından xəbər verir. Bəzi
ekspertlər belə hesab edir ki, bu məsələdə əsas söz sahibi ABŞ-dır.
Türkiyə və Ermənistan sadəcə olaraq Birləşmiş Ştatların göstərişini
yerinə yetirirlər. Dünyanı nüfuz dairəsinə bölmək uğrunda daim aşkar,
gizli mübarizədə olan ABŞ və Rusiya Güney Qafqazda da eyni siyasət
yürüdür, regiona sahiblik üstündə min cür hoqqadan çıxırlar. Burada
pərdəarxası qurulan böyük oyunların qurbanına çevrilməkdən özünü xilas
etmək, başı salamat saxlamaq özü də bir qəhrəmanlıqdır.
Qəhrəmanlıq demişkən, Rusiya Azərbaycan milli komandaları arasında
keçirilən futbol matçında ölkəmizin, sonuncu Avropa çempionatının bürnc
mükafatçısı qarşısında əzimli mübarizəsi sözün əsl mənasında xalqımızı
sevindirdi. Diplomatik nəzərlə baxsaq, Azərbaycan-Rusiya razılaşması ən
real addımdır. Elə bəlkə də, Rusiya daha çox təsir etməməklə anlatmaq
istəyirdi ki, sizi ancaq biz başa düşürük, əlinizi ətəyimizdən
üzməyin.
Dili ilə ürəyi arasında milyon kilometrlərcə məsafə görünən Türkiyə
özünə məxsus oyun sərgiləməklə tam təmkinli nəzərə çarpırdı. Birinci
yarım hissədə iki qol vurub oyuna nəzarət etməyə başladı...
Tam əminliklə deyə bilərəm ki, baxışlar idman marağıyla deyil, siyasi
gedişlərin həyəcanını seyr edirdilər. Bəli, doğrudan da belə bir həssas
vaxtda regionun dörd aparıcı ölkəsinin qarşı-qarşıya oynaması futbol
diplomatiyasının qüdrətini canlandırdı.
|
