İndi hər kəsi bu məsələ düşündürür. Daha dəqiq desəm, hər kəsi yox, əsasən əhalinin aztəminatlı, zəif və yoxsul təbəqəsini düşünməyə vadar edir. Yatsam da yuxuma belə girməzdi ki, Bakı-Ceyhan neft kəməri işə düşəndən sonra ölkə əhalisi pul cəhətdən korluq çəkəcək. Yadımdadır, hələ bir neçə il bundan öncə ən tez-tez işlənilən söz bu idi ki, "qoy hələ BTC işə düşsün, mlyonlar, milyardlar gələcək ziblərimizə". Ac toyuq yuxusunda darı görürmüş kimi, fikrləşirdim ki oturacam evdə, hökümət gətirib ayda min manat basacaq cibimə ki, xərcliyin olsun.

Ancaq, deyir sən saydığını say, gör Tağı müəllim nə sayır. Yox, qətiyyən bu gün metrodakı qiymət artımı barəsində danışmaq fikrim yoxdur. Onsuz, düşünəndəki gündəlik istifadə etdiyim və mənə sərfəli olan bir nəqliyyat vasitəsinin qiymətinin 3 dəfə qalxması mənim aylıq büdcəmə nə qədər zərər vuracaq, hövsələm daralır. Odur ki, heç bu barədə yazıb nə sizin, nə də ki öz yaralarımı təzələmək istəmirəm. Tağı müəllimin adını isə elə belə çəkmədim. Çünki, məmur elitasının hamsı eyni prinsip və əqidəyə sahibdirlər (yaxşıları varsa, yaxşılarından iraq). Allah Hamurappiyə rəhmət eləsin. Düzdur ki yunanlar çıxardığı qanunların ağırlığına görə ona lənət oxuyurdular, ancaq nədənsə 21-ci əsrdə neftlə zəngin bir ölkənin vətəndaşı kimi mənim Hamurappiyə rəhmət deməyim gəlir.

Əlqərəz, əsas məsələlərə keçməsəm məqaləm də şəhərdə ucu bucağı görünməyən propka-tıxaclar kimi uzanacaq. Onu deyirdim axı, "Pulun var sizün?". Yaşayış minimumu 10 manat qalxa-qalxa gəlib 70-80 manat olub. Yəni, bir insan 70 manatla ay ərzində bütün xərclərini ödəməlidir. Absurd demirəm, hökümətin acığına gələr, real deyil ki normalda bir insan 70 manatla dolansın. Qazın qiyməti qalxdı, yaşayış minimumunun qiymətində dəyişlik olmadı. Ərzaq məhsullarının qiyməti durmadan qalxır, ancaq paralel olaraq əmək haqları qaldırılmır. İllahdakı "böhrandır" sözü düşüb bütün idarə rəhbərlərinin ağzına. Deyəndəki, ay qardaş, bəs böhran bizə təsir eləməmişdi, indi nə oldu bizə çatanda böhran olur?! Deyirlər elə böhranın qarşısı maaşları qaldırmamaqla alınır. Əcəb işə düşmüşük, gəl indi dolan görüm necə dolanacaqsan. 

O gün yadıma nə düşüb, konstitusiyadakı son dəyişiklikdə "sosial yönümlü" sözü siyasət sözünə əlavə olundu. Yəni, açıq desək, hökümət sosial qayğı və rifahi gücləndirməyi konstitusiya ilə də təsbitləməklə bu işə ciddi fikr verəciyini bir öhdəlik kimi qarşısına qoydu. Ancaq, reallıqlara baxanda sosial yönümlü heç bir qanun və fərman belə gözümə dəymir. Bircə yenicə qəbul olunmuş "sosial kirayə" haqqında qərardır ki, onu da həvalə ediblər onsuz da fəaliyyətləri hiss olunmayan bələdiyyələrə.

Xülasə, biz yoxsullara bir gün ağlayan yoxdur. Faizimiz də durmadan artır. Keçən il ölkə əhalisini 20%-dən çoxunu təşkil edirdik. Bu il sayımız iki dəfə də artdı. Bizim sayımımızın artımı ölkədəki bahalaşma ilə paralelel gedir. Odur ki, artıq bizim barəmizdə də düşünmək və bizi bu vəziyyətdən çıxarmağın vaxtı gəlib çatıb. Əsas ehtiyaclarımız isə maddiyyatdır. Hə, birdə onu qeyd edim ki bizə ayrılan ünvanlı sosial yardımın 3 əsas prinsipinə bəzi yerli sosial idarələr tərəfindən əməl olunmur. Odur ki yazımın sonunda sosial yardım verən idarələrə bir daha bu prinsipləri xatırlatmaq istərdim. Ünvanlılıq- sosial yardım yalnız aztəminatlı ailələrə təyin olunur; ədalətlilik- sosial yardım ailənin orta aylıq gəliri ilə hər bir ailə üzvü üçün ehtiyac meyarının məcmusu arasındakı fərq məbləğində təyin olunur; bərabərlilik- sosial yardım bütün aztəminatlı ailələlərə təyin olunur.