Yaxud, Bakı merinin həbsi xəbərinə ən çox kimlər sevinər?
Xəzərin mehli sahilini xırda addımlarla seyr edirdim ki, qulağıma həzin və yalvarışla dolu səslər gəldi. Ətrafda kimsənin olmadığını nəzərə alıb bir az qorxdum. Külək bu səsləri haradansa gətirdiyini özümə təlqin etsəm də zənnim döğrulmadı. Eşitdiyim sədalar çağırış və nidaya daha çox oxşayırdı. Yaxınlıqda bir oturacağın üzərində oturub fikrə getdim. Bax elə bu an həqiqət mənə aydın oldu. Sən demə, qarşımda dayanan iki gənc ağacın söhbətiymiş eşitdiklərim. Yeni inkişaf mərhələsinə qədəm qoyan cavan(ağac)lar bir-birlərinə şikayət edirdilər. Diqqətlə baxıb onların üzərində "reşotkaya" bənzər dəmir parçalar gördüm. Sağda duran ağac qol-qanadının kəsildiyindən gileylənib gecə-gündüz ağrısına dözə bilmədiyini deyirdi. Soldakı da eyni dərddə olduğundan danışıb göz yaşları axıdırdı ki, axı günahımız nədir ki, budaqlarımızı qırıb dəmir barmaqlıqlara bağlayıblar? Nəhayət ömrünü elə mavi Xəzərin sahilində keçirdən və böyük ərazini kölgəsi altına alan bir küknar ağacı dahiyanə görkəm alaraq ağsaqqal nəsihətlərinə başladı: "Siz hələ olduqca gəncsiniz. Vaxt olacaq hər şeyi başa düşəcəksiniz. O zaman biləcəksiniz ki, sizin budaqlarınızı niyə kəsib özünüzü də dustaq ediblər. Axı bura ODLAR DİYARIDIR. Burada hətta ağaclar da plan üzrə böyüməlidirlər. Səhiyyə, təhsil nə bilim bütün sahələr bir istiqamətdə inkişaf edir. Təbiətin özü də mühakimə olunmalıdır ki, özbaşınalıq olmasın. Həm də sizi indidən gələcəkdə baş verəcəklərə öyrədirlər. Daha bir milyonçu kifayət qədər parasından keçib sizin yerinizdə göydələn, yaxud əyləncə mərkəzi ucaltmaq fikrinə düşsə, etiraz etməyəsiniz". Sonra yaşlı küknar neçə-neçə hadisənin şahidi olan ağ saçlarını sığallaya-sığallaya bunları pıçıldadı: "Müstəqil yaşamağı və azadlığı beşikdə boğurlar ki,..." Onun son cümləsini pıçıltı ilə deməsi hələ də canında qorxu olduğunu başa salırdı. Tələm-tələsik redaksiyaya tərəf üz tutdum. Neçə müddət idi ki, ağacların belə dəmir barmaqlıqlara sarıldığının səbəbini tapa bilmirdim. İndi isə elə onların öz dilindən eşitdim. Bu fikirdə idim ki, fürsət tapıb buraları tərk edim. Qucağında qəzet qalağı tutub küçələri dolaşan bir qocanın səsinə diksindim. Həmin qəzetlərin birində bayaq söhbətlərini eşitdiyim ağacları məhbus edən şəxsin həbs olunması yazılmışdı. Bu xəbər ilk səhifədə maraqlı başlıq kimi qeyd edilmişdi. Başlığın yanında isə Bakı şəhərinin meri, minlərlə ağac qatili cənab Hacıbala Abutalıbovun şəkili əks olunmuşdu. Nur kimi bərq vuran şəkilin yanında isə bu cümlə yazılmışdı: "Prezidenti aldatmağa görə Abutalıbova 12 il iş düşür. yazısı səh. 10-da". Durmadan onuncu səhifəni açdım. Çox düşündürücü bir şəkil. Hacıbala müəllim ölkə başçısı İlham Əliyevə nəsə izah edir. Özü də KANALİZASİYA lyukunun üstündə. Yazını oxuyandan sonra məlum oldu ki, bir neçə gün əvvəl hansısa küçənin açılışı olub və üç gün sonra küçə təmirə dayanıb... Bu xəbərdən sonra bəlli oldu ki, günahsız balaca(ağac)ların ah-naləsi bihudə deyilmiş. Onlar sanki bir kabus kimi ünvanlarına çatacaqlar. Sadəcə, bir az səbr lazımdır!
Dizayn :Networkbil.net . 2009 FAKTXƏBƏR . Dərc olunan materilların mətninə görə, redaksiya heç bir məsuliyyət daşımır. Saytdakı materiallardan istifadə edərkən istinad zəruridir.
