Hər il olduğu kimi bu il də dünya 21 sentyabrı, beynəlxalq sülh günü kimi qeyd edəcək. Düz 29 il bundan öncə BMT dünyada sülhə və sazişə ehtiyac olduğunu duydu və protokollar üzərində bir saziş imzaladı. Ancaq, necə saziş?! Bu dəfəki yazımda sülh günü və bu günə Qüds günü nöqteyi nəzərindən baxışı qələmə almışam.

İkinci dünya müharibəsində qalib gələn tərəf olan ABŞ öz qələbəsini rəsmiləşdirmək və gələcəkdə bütünlükdə dünya üzərində hakimiyyətini bərqərar etmək üçün bir ümumdünyəvi təşkilat yaratdı ki, onun vasitəsi ilə dünyada təcavüz və zülmün əsasını qoydu. 29 il bundan öncə dünyanı sülh gününü qeyd etməyə çağıran BMT vasitəsi ilə ABŞ elə bir o qədər il öncədən başlayaraq dünyada "qaynar" münaqişə ocaqları yaratdı. Fələstin torpaqlarını İsrailə, Pakistan torpaqlarını Hindistana verməklə əslində müsəlman dünyasını daimi olaraq zülm və təcavüzə möhtac elədi. Ardınca Kosova, Çeçenistan, Qarabağ, Əfqanıstan, İraq, Livan eyni taleyə məhkum oldu. Qısaca desək, müsəlman-İslam dünyası müharibələr və münaqişələr zonasına çevrildi.

Bu gün BMT sülh günü keçirir. Elə bir gün ki, İslam aləmi həmən gündən xaricdir. Dünyada harda münaqişə varsa, təcavüzə məruz qalan tərəf müsəlmanlar, təcavüzkar tərəf isə ABŞ və imperialist qüvvələrdir. Bu günə qədər nə BMT, nə də ki onun təhlükəsizlik şurasına üzv olan dövlətlər dünyada olan bu münaqişəli ərazilərin problemlərinin ədalətli həllinə səy etməyiblər. Sanki, sülh gününü qeyd etməklə, BMT İslam dünyasını mövcud vəziyyət ilə barışmağa və sülhə gəlməyə çağırır.

Qarabağsız Azərbaycanı təsəvvür eləyə bilmədiyimiz kimi, dünya müsəlmanları da Qüdsüz İslam dünyasını təsəvvür edə bilmir. Odur ki, müsəlman dünyasının öndərləri beynəlxalq Qüds günü elan etməklə əslində haqsızlığa və batilə mübarizə bayrağını qaldırmış oldular.

Əgər bu günləri Qüds işğal altındadırsa, hansı sülhdən danışa bilərik?!. Bütün din və millətlərin nəzərində ən müqəddəs məkan sayılan Qüdsdə hər gün müsəlman qanı axıdılırsa, müsəlmanlar öz doğma torpaqlarından çıxardılırsa, o halda hansı sülhdən danışaq?! Əgər bu gün Qüds hələ də İsrail, Qarabağ Ermənistan, Kəşmir Hindistan, İraq və Əfqanıstan ABŞ-ın işğalı altındadırsa, o halda hansı sülh və əminamanlıqdan söhbət gedə bilər?! Odur ki, dünya müsəlmanları Qüds günü və Qüds bayrağı altında zülmə və işğala etiraz səslərini ucaltmaq qərarına gəldilər. Ramazan ayının son cüməsini Qüds etirazları keçirtməklə əslində hələ də dünyanın sülhdən söz açmağının tez olduğunu sübut etdilər.

Gəlin, sülh gününə Qüdsün reallıqlarından baxaq. Dünyanın aparıcı dövlətləri müsəlmanlara qarşı aparılan bu terror siyasətinə göz yumur və bir addım da irəli gedərək bütün bu cinayətlərə dəstək verirlər. Son Qəzza hadisələri bir daha sübut etdi ki, dünya hələ sülhə hazır deyil. Körpə uşaqları qanına qəltan edən bir rejimi BMT məzəmmət etmədi. Demək, sülh kimlərinsə əlində yalnız siyasi maxenasiya vasitəsidir ki, bununla onlar öz cinayətlərinə bir fon vermiş olurlar.

Sonda hər bir azadlıq və ədalət sevər insanları bu gözəl və fövqəladə bir gün olan-Qüds günü münasibəti ilə təbrik edirəm. Qüds-yəni məzlumların günü, Qüds-işğala məruz qalanların günü, Qüds-yəni qız gəlinləri əsir düşənlərin günü, Qüds-qaçqın və köçkünlərin günü, Qüds-yəni əslində dolayısı ilə Qarabağın günü. Qarabağın azadlığı Qüdsdən keçir!