Əslində Obama da müsəlmanlar üçün sələfi Buşdan hələ ki, heç nə ilə fərqlənmir. Məsələn, o da Buş kimi müsəlmanların, necə deyərlər, başını yarıb ətəyinə qoz tökür. Yəni bir tərəfdən başlarına bomba yağdırır, bir tərəfdən də onlar üçün iftar süfrəsi açır. Söhbət  hətta özünün də bixəbər olduğu naməlum sonluqlu siyasətinə qarşı çıxanları cəzalandırmasından, təqdir edənləri isə xüsusi ərəb xurmasına qonaq etməsindən gedir.

Hə, ərəb xurması demişkən, yadıma Ramazan ayı düşdü. Axı bu müqəddəs ayın ən "bərkgedən" yeməyi xurma hesab olunur. Deyirlər ki, müqəddəs Ramazan ayı sevgi və mərhəmətlə doludur. Onun bir günü min aydan üstündür. Bu ayda imkansızları yedizdirib, qohum-əqrabanı yoxlamaq ən xeyirli əməl hesab olunur. Hələ bir az malından-pulundan keçib iftar süfrəsi açaraq kasıbları dəvət etsən qurbanı olduğum səni bütün yerin-göyün bəlasından saxlayar. Elə bu yaxınlarda siz də şahidi oldunuz ki, şeyx cənabları barmaq basmağa yer tapa bilməyəcək səviyyədə bir süfrə açıb, əlsiz-ayaqsızları o ki var yedizdirdi. Bunu etməsəydi nə gecələr gözünə yuxu gedər, nə də Ramazan ayında məzuniyyətə çıxıb rahatca dincələ bilərdi.

Görünür, şeyxin bu addımı Obamanın çox xoşuna gəldiyi üçün dərhal müsəlman dövlətlərinin ABŞ-dakı nümayəndələrini toplayıb iftar süfrəsi vermək niyyətinə düşdü. Özü də söz verib ki, bu xeyirxah əməli ənənə halına salacaq. Amma beynəlxaq aləmdə müsəlman dövləti olaraq xüsusi dəsti-xəttilə tanınan Azərbaycanın səfirliyindən heç kim dəvətli deyildi. Əslində, bir çox nailiyyətlərimizi nəzərə alsaq biz lap yuxarı başda oturmalı, yaxud iftar süfrəsinin açılışında təşkilatçı olmalı idik. Zira belə işlərdə kifayət qədər təcrübə sahibiyik. Həm də haqqımız var. Axı bu il Bakı İslam mədəniyyəti paytaxtıdır.

Doğrusu, əvvəl fikirləşdim ki, Obamanın belə hərəkəti erməni lobbisinin növbəti məkridir. Bu fikrimi bildirkməkdən bir az ehtiyatlanıb balaca araşdırma apardım. Sən demə, kimsə Ramazan ayında Fatimeyi-Zəhra məscidinin bağlanmasını Baraka çatdırıb. O da bu xəbərdən çox mütəəssir olub, onu dəqidləşdirməyə başlayıb. Sonda aydın olub ki, ona çatdırılanlar baş verənlərin heç yarısını əhatə etmir. Təkcə Fatimeyi-Zəhra məscidi deyil, bir neçə məscid təmir adıyla bağlanıb. Bir neçəsi də qanunsuz tikili adıyla sökülür. Daha doğrusu, azərbaycanlılara əsl "tolerantlıq dərsi" keçirilir. Bu olanlardan sonra Obama, dindarlarla məhkəmə arasında kəskin dartışma zamanı şeyxin yavaşca sürüşüb aradan çıxmasını heç cür həzm edə bilməyib. Hələlik əlindən gələn o olub ki, etiraz olaraq Azərbaycan səfirliyinə göndərəcəyi dəvətnaməni cırıb atsın. Biz də gözləyirik ki, görəsən məscid söküləcək ya yox. Əşi, sökülməyindən qorxmuruq əsas odur ki, yerini əyləncə mərkəzinə çevirməsinlər. Yoxsa bütün dindarlarla birlikdə düz gedib Obamanın ibadət etdiyi kilsənin qabağında aksiya keçirdərik ki, heç olmasa cümə günləri namaz qılmağa bizə icazə versinlər. Çünki, belə getsə ölkədə məscid qalmayacaq.