Ölkəmizin "kosmos" sürəti ilə inkişafını nəzərə alaraq bu kiçik köşə yazımda inkişaf fonunda fonsuz və ya diqqətdən kənar qalan bəzi incə məsələlərə "fon" vermək istəyərdim. Əvvəlcədən də qeyd edim ki bu yazını yazmağa məni vadar edən səbəb "Fatimeyi Zəhra" məscidinin sökülməsi ilə bağlı olan məhkəmə qərarı oldu. Yəni ki babalı məhkəmənin boynuna.

İslama və müsəlmanlara qarşı hədsiz kin bəsləyən bəzi Avropa ölkələri (ki inkişafda bizə çata bilməzlər-C.İ) müzakirələr edirlər ki, minarəsiz məscidlərə bundan sonra minarə ucaltmağa icazə verilsin, hər şəhərə düşən məscidlərin sayı artırılsın. Məsələn, son belə müzakirələr Belçikada, Danimarkada aparılmışdır. Bütün bunlar ondan ötrüdür ki, cəmiyyəti narahat edən məsələlər qanuni şəkildə öz həllini tapsın. Çünki, bu ölkələrdə kifayət qədər müsəlman yaşayır və onların hüquq və haqları hökümətin gündəliyində duran məsələlərdəndir. Yəni, cəmiyyət üzvlərinin arasında narazıçılıq varsa, hökümətlər bunu tənzimləmək və bu narazıçılığa aydınlıq gətirməkdə borcludurlar. Necəki, sivil və inkişaf etmiş ölkələrdə əhalinin bütün təbəqələrinin hüquqlarının təmin edilməsi hökümətlərin ali vəzifəsi sayılır.

Bizim bu günki inkişafımızı nəzərə alsaq gərək ki onda məscidlərin sökülməsi haqda yox, məscidlərin genişləndirilməsi və ibadət üçün daha rahat şəkilə gətirilməsi barədə söhbətlər gedərdi. Çünki, bir ölkə inkişaf edirsə, bu inkişaf hər bir sahədə hiss edilməlidir. Siyasətdə, sosial həyatda, iqtisadiyyatda, mənəviyyatda, mədəniyyətdə və s və sair. Bu sahələrin hər hansısa birində inkişaf var ya yox, bunun ilə heç işim də yox. Amma konkret olaraq din və məscid siyasətinə gəldikdə isə, müqayisə üçün Avropa ölkələrindən biri ilə özümüzü müqayisə etsək, nə qədər geri qaldığımızın fərqinə vararıq. Avropa xristian ola-ola müsəlmana və ya öz vətəndaşlarının hüquq və haqlarına dəyər verir və minarə ucaldır, ölkəmiz müsəlman ölkəsi ola-ola öz müsəlman vətəndaşlarının hüquq və haqlarını tapdalayır və məscid sökür.

Mən, bu gün özümü tapdalanmış, əzilmiş və pərt olmuş hiss edirəm. Baxmayaraq ki, mən hər bir çıxışımda və yazılarımda insanları inandırmağa çalışıram ki, ölkəmizdə sosial iş vüsət tapıb inkişaf etməkdədir və tezliklə bütün sosial problemlər (o cümlədən də xalqın dinə qarşı məhəbbətinin artması fonunda məscidlərin tikilməsi, movcud olanların restavrasiyası və təmiri hallarının genişlənməsi) öz həllini tapacaq, bir tərəfdən də məhkəmələr məscidlərin sökülməsi barədə qərarlar verir. Bu disbalanslığa, bu təzada son qoyacaq orqanlardan biri məhkəmə sistemidir ki,  o da təzada hökm verir. Digər bir orqan Dini Komitədir ki, o da susur (susmaq fəlsəfədə bitərəflilik anlamında işlənir-C.İ). Məsələyə ən yaxın və real iş görə biləcək qrum QMİ-dir ki, hələ ki bütün müsəlmanların real ümüd yeri kimi oranı görürəm. Yəni, bu dəqiqə mənim içimdə də belə bir ümüd var ki son anda Hacı Allahşükür Paşazadə cənabları məsələlərə qarışıb məscidin sökülməsinin qarşısını alacaq və məscidi sökmə ənənəsinə son qoyacaq. Çünki bu ənənə bizim xalqa yad bir ənənədir.

Ötən gün Azərbaycan məscidləri haqda tarixi vərəqləmək qərarına gəldim. Niyyətim də 14 əsr ərzində bu diyarda hər hansısa bir məscidin hansısa hökümətlər tərəfindən sökülməsi faktları tapmaq ilə özümə təskinlik vermək idi. Ancaq, tarix də bu halda mənə təskinlik verməkdə aciz görünürdü. Çünki, bizim xalqımızın, dövlətçiliyimizin tarixinin ən şanlı və şərəfli səhifələri məscid və mədrəsə inşası ilə bağlıdır. Tariximizin dinlə bağlı ən qara səhifəsi sayılan sovetlərin hakimiyyəti dövründə belə məscid sökülməsi siyasəti ilə qarşılaşmadım. Yalnız, "google" axtarışları zamanı bu il ərzində Bakı şəhərində 2 Allah evinin sökülməsi barədə xəbərlər aldım. Paytaxtı İslam Mədəniyyətlərinin mərkəzi seçilən bir ölkə üçün bu hal utancvericidir mövzusunda neçə-neçə məqalə oxudum "google"-da. Və başa düşdüm ki ən yeni tariximizi gələcək nəsillər tarix kitablarında (yaxşı ki biz günümüz ilə bağlı xəbərləri google-dan axtarıb tapırıq-C.İ) vərəqləyərkən həqiqətən böyük utanc hissi ilə bu tarixi oxuyacaqlar. Çünki, hələ utanmağa yer var. Verilən son məlumatlara görə tək paytaxtda 5 məscidin sökülməsi planlaşdırılır.  Qısaca desək addım ba addım (step by step-C.İ) məqsədə doğru hərəkət etmək və məscidləri aradan aparmaq siyasətinin şahidiyik.

P.S. "Google", sən Allah evinin sökülməsi ilə bağlı xəbərlərə tab gətirə bilərsən?!