Siyasəti çox oxudum, siyasi yazılar yazmaq və şərhlər verməklə özümü çox sınadım, ancaq sonda başa düşdüm ki, Allahın siyasətindən gözəl, dəqiq və kamil siyasət ola bilməz. Düzdür ki, müasir zamanımızda siyasət sözü az qala çirkin bir iş sözü ilə eyni tutulur. Ancaq kökünə getsək görərik ki, "siyasət" kəlməsi heç də əxlaqdan kənar bir söz deyil, əksinə ərəb sözü olub mənası "tərbiyə etmək" deməkdir. Məhz, Allah yer üzündə bəşərin təkamülü üçün gözəl bir siyasət, müasir qayda-qanunlar və tərbiyə üsulları qoymuşdur.

Daha sonra sosial siyasətdə özümü sınamaq qərarına gəldim, sosial işçi peşəsinə yiyələndim. Gördüm ki cəmiyyətdə sosial işçi olmaq nə qədər də şərəfli və gözəldir. Axı sosial işçi problemli insanların problemlərinin həllində bir vasitəçi rolunu oynayır. Dedim nə gözəl, nə yaxşı ki mən də insanların dərdlərinin, qəmlərinin, problemlərinin həll olunmasında cüzi də olsa müəyyən bir pay sahibinə çevrildim.

Sosial iş peşəsini bir elm kimi öyrəndikdə bu elmin Qərbdə yaranıb inkişaf tapması barədə fikrlər və bu fikrlərin dünya tərəfindən məhz bu şəkildə qəbul edilməsi məni bu barədə dərindən düşünməyə vadar etdi. Həmişə fikləşirdim ki, mümükündürmü ki, bəşəriyyətə nicat dini olan İslam dinində bu məsələlər öz əksini tapmasın?!

Ancaq, çox tezliklə başa düşdüm ki, sosial siyasətin də əsasını elə Allah öz müqəddəs dinində qoyub. Ramazan ayının Allahın sosial iş və sosial siyasətinin ən gözəl və kamil nümunəsi olduğu qənaətinə gəldim. Allah, dünyanın bütün sosial işçilərinə sosial iş necə olmalıdır, hansı metod və vasitələrdən istifadə edilməlidir nümunəsini bu ayda göstərib.

Varı, dövləti başından aşanı aztəminatlı, qarnı ac, güzəranı problemlər içində olan bəndənin halından başqa necə xəbərdar etmək olardıki?! Allah, bir qanunla bütün bu məsələləri yoluna qoydu. Bəndələrinə orucu vacib etdi. Toxun acdan xəbəri olmaz misalını alt üst etdi. Oruc tutan hər bir bəndə aclıq və yoxsulluğun nə qədər üzücü bir hal olduğunu başa düşdü. Və Allah buyurdu ki, hər bir imkanlı kəs bu ayda və bundan sonra imkansızın əlindən tutsa, yetimi-yesiri, kimsəsizi dolandırsa, həm bu dünyasını, həm də axirətini abad etmiş olar.

Bundan gözəl sosial iş varmı?! Məgər əsas hədəf insanların ruhi və cismi aramlığı deyilmi?! Qidası zəif olan bəndə nə cismi, nə də ki ruhi baxımdan sağlam ola bilməz. Sağlam bədəndə sağlam ruh olduğunu Yaradan hamıdan gözəl bilir. Odur ki Allah Ramazan ayında həyata keçirtdiyi sosial işi məhz insanların maddi cəhətdən bir-birinə kömək etməsi üzərində qurdu. Bu artıq, sosiallaşma, yaxınlaşmadır. Bu özü elə vətəndaş cəmiyyəti və həmrəylik deməkdir. Müxtəlif qrup insanların bir icma daxilində icma daxili problemlərinin həlli istiqamətində atmış olduqları bir addımdır.  Kim buna Allahdan yaxşı nail ola bilər. Hansı fond, hansı təşkilat və ya qrup?! Hökümətlər bu sahədə qanunlar qəbul edir, sosial yardımlar ayırır. Nəticələrə baxanda hələ çox-çox insanların bu qayğıdan, bu yardımdan, diqqətdən kənarda qaldığı açıq görsənir. Allahın diqqətindən isə heç bir bəndəsi yayınmır, kənarda qalmır.

Bu gün xalqımızın böyük bir qismi oruc tutmaqdadır. Nə varlısı, nə kasıbı, nə uşağı, nə yaşlısı, hamı yayın istisindən və günün uzunluğundan çəkinməyərək bu İlahi imtahanı başı uca verməyə çalışır. Odur ki, mən bütün Azərbaycan xalqını, oruc tutan Allah bəndələrini təbrik edirəm və demək istəyirəm ki, zərrə qədər belə ehtiyacı olan bir insana köməklik etmiş olsanız, kiməsə çörək və su vermiş olsanız, öz parlaq gələcəyinizi sığortalamış olarsınız. Axtarın, ətrafınızda, qonşuluqda, qohum-qardaş arasında imkansızlara, ehtiyaclılara əl tutun. Firkləşməyin ki sizin 1 manatınız heç nəyi dəyişməyəcək. Verin, keçin o 1 manatınızdan, inanın Allaha ki o 1 manata ehtiyaclı olan neçə-neçə bildiyimiz və bilmədiyimiz Allah bəndələri var.

            Sonda bunu qeyd edim ki, ötən gecə Ramazan ayının dualarını nəzərdən keçirirdim. Bir dua xüsusi olaraq diqqətimi cəlb etdi. Qərara gəldim ki, duanı köşə yazıma əlavə etməklə həm bu yazını daha bərəkətli edim, həm də diqqətimizi bu duada yazılan məsələlərə yönəldim. "....İlahi, bütün kasıb və yoxsulları dövlətli et. İlahi, bütün acları doyuzdur. İlahi, libası olmayan bütün yoxsulları geyindir. İlahi, bütün borcluların borclarını ödə. İlahi, bütün çətinlikdə yaşayanları qəm-qüssədən azad et....İlahi, bizim borclarımızı ödə və bizə yoxsulluqdan nicat ver. Həqiqətən Sən hər bir şeyə qadirsən".

P.S. NO COMMENT!