Keçmiş ABŞ kəşfiyyatçısı Edvard Snouden, məhkəmənin ədalətli və obyektiv olacağı təqdirdə mühakimə olunmaq üçün ABŞ-a qayıtmağa hazır olduğunu söyləyib.

FaktXeber.com-un verdiyi məlumata görə, bu barədə, ABŞ Milli Təhlükəsizlik Agentliyinin keçmiş əməkdaşı Milli İctimai Radioya verdiyi müsahibədə bəyan edib.

O, münsiflər heyətinə niyə jurnalistlərə gizli məlumat verdiyini izah etmək istədiyini söyləyib. Snoudenə görə, Münsiflər heyəti də onun düzgün iş görüb-görmədiyini qiymətləndirmək üçün ictimaiyyətə açıqladığı gizli materiallara giriş əldə etməlidir.

"Əgər münsiflər heyəti bu məlumatın açıqlanmasının düzgün olub-olmadığını qiymətləndirə bilmirsə, məlumatın açıqlanması ilə bağlı ədalətli məhkəmə araşdırması apara bilməzsiniz" deyib.

Eyni zamanda Snouden, təkcə hökmü eşitmək üçün ABŞ-a qayıtmanın bənzər vəziyyətdə ola bilənlər üçün pis bir nümunə olacağını vurğulayıb.

"Heç kim istədiyi üçün informator olmur. Heç kim xoşbəxt sonluq gözlədiyi üçün informator olmur" deyə Snouden əlavə edib.

Keçmiş casus Rusiyada yaşamağı özü seçmədiyini vurğulayıb. O, Almaniya və Polşa da daxil olmaqla 27 ölkədən sığınacaq istədiyini, lakin Moskvadan fərqli olaraq digər ölkələrin ABŞ-ın qisas tədbirlərindən qorxduğunu xatırlatdı.

Onun sözlərinə görə, Rusiya xüsusi xidmət orqanları ona əməkdaşlıq təklif ediblər, amma o imtina edib. Əgər razı olsaydı, hava limanında 40 gün keçirmək əvəzinə, aeroportdan ilk gündən limuzində çıxacaqdı, özü isə sarayda yaşayardı və Qırmızı Meydanda şərəfinə paradlar edilərdi.

2013-cü ilin iyun ayında Snouden "Washington Post" və "Guardian" qəzetlərinə internet və ABŞ-ın kəşfiyyat proqramları ilə bağlı bir sıra məxfi materialları təhvil verdi. Bundan sonra o, Hong Konga, oradan isə Moskvaya uçdu, burada bir müddət Şeremetyevo Hava limanının tranzit zonasında qaldı. Rusiya Snoudenin ABŞ-a qarşı fəaliyyətini dayandırması şərtilə bir il müddətinə müvəqqəti sığınacaq verdi. 2014-cü ilin avqust ayında Snouden üç illik yaşayış icazəsi aldı, bu, yalnız Rusiyaya deyil, həm də xaricə səyahət etməyə imkan verir. 2017-ci ilin yanvar ayında Snoudenin yaşayış icazəsi 2020-ci ilə qədər uzadıldı.