ABŞ Prezidenti Donald Tramp bir müddət sonra Suriyadakı neft yataqlarından çıxacaqlarını açıqlasa da, gündəm başqa şey deyir. 

"(Suriyada) Biz nefti qoruduq. Bəzi məqamlarda da neftlə bağlı problemləri həll edəcəyik və oradan çıxacağıq", - deyən ABŞ Prezidenti Trampın dünən Ağ Evdə keçirdiyi mətbuat konfransındakı sözləri həqiqətlə uyğun gəlmir.

Trampın açıqlamalarının əksinə olaraq, ABŞ qüvvələri, xüsusən də terror təşkilatı YPG / PKK-nın işğal etdiyi neft ərazilərində varlığını artırır.

ABŞ ordusu son 3 ayda həftədə iki dəfə 50-100 yük maşını konvoyları ilə İraqdan Suriyadakı bazalara və hərbi nöqtələrə hərbi və texniki ləvazimatlar daşıyır.

Bölgəyə çatan konvoylara tank əleyhinə raketlər, tanklar, zirehli maşınlar, sursat və texniki ləvazimatlar yüklənmiş yüzlərlə yük maşını da daxil olub.

ABŞ ordusu bu müddət ərzində Suriyaya ən azı 400 əsgər göndərib.

Eyni dövrdə Hasekə vilayətindəki Təl Bəydər və Deyrizor əyalətindəki bazalarını genişləndirən ABŞ qüvvələri bu bazaları kameralar və təhlükəsizlik sistemləri ilə təchiz edib.