Martın 4-nə olan məlumata görə, Çindəki müxtəlif dövlət qurumları COVID-19 koronavirusa qarşı mübarizəni maliyyələşdirmək üçün 110.48 milyard yuan (16 milyard dollar) ayırıb. Bu barədə "Reuters"ə ölkənin maliyyə nazirinin müavini Syu Huantsay məlumat verib.

O bildirib ki, bu məbləğin təxminən 71.43 milyard yuanı xərclənib, 39.05 milyard yuan isə hələ istifadə edilməyib.

Əlavə edib ki, Çin hökuməti virusun yayılması kontekstində yerli hakimiyyət orqanlarının maneəsiz işləməsini təmin edəcək və Maliyyə Nazirliyi epidemiyanın mərkəzinə çevrilən Hubey vilayətinin maliyyələşdirilməsini təmin edəcək.

Syu COVID-19-un hökumətin gəlirlərinə müvəqqəti təsir göstərə biləcəyi xəbərdarlığını edib. Bununla birlikdə, o, iqtisadiyyatın bərpa edildiyi zaman büdcəyə təzyiqin azalacağını proqnozlaşdırır.

Beynəlxalq Valyuta Fondu (BVF) 2020-ci ildə Çin iqtisadiyyatının artım proqnozunu yanvar ayı proqnozu ilə müqayisədə 5,6%-dən 0,4 faiz endirib.