Cənubi Afrika ölkəsi olan Lesotonun baş naziri Tomas Tabanenin həyat yoldaşı Maesaiah Tabane ərinin ilk həyat yoldaşı Lipolelonu öldürməkdə ittiham edilir.

2017-ci ildə Lipolelonun öldürülməsində günahlandırılan Maesaiah həbs edilməməsi üçün yanvarın 10-da Cənubi Afrika Respublikasına qaçıb. Maesaiahın vəkili ilə polis arasındakı razılaşmadan sonra o, Lesotoya qayıdıb. Ölkəsinə qayıdan Maesaiah paytaxt Maseruda polisə təslim olub. Komissar müavini Mokete Paseka 42 yaşlı birinci xanımın gecəni nəzarətdə keçirdiyini və məhkəmə qarşısına çıxarılacağını açıqlayıb.

Digər tərəfdən, baş nazir Tomas Tabanenin qətllə əlaqədar sorğu-sual edildiyi bildirilir.

Tomas Tabanenin 2017-ci ildə rəsmi olaraq baş nazir vəzifəsinə başlamasından iki gün əvvəl, keçmiş həyat yoldaşı Lipolelo Tabane Maseruda şəhərində öz avtomobili ilə evinə qayıdarkən silahlı basqın nəticəsində öldürülüb.

Lipolelonun ölümündən sonra keçmiş həyat yoldaşı Baş nazir Tabane qətldə ittiham edilib. Yanvar ayında xalq küçələrə çıxaraq Tabanenin istefasını istəyib. Tabane artan təzyiqlərdən sonra yanvarın 16-da istefa edəcəyini açıqlayıb. Ancaq Tabanenin nə vaxt istefa verəcəyi hələ məlum deyil.