İllərdir Xırdalan şəhərindən, Abşeron rayonunun mərkəzindən yazırlar. Elə bir media orqanı yoxdur ki, bu barədə yazmasın, reportaj hazırlamasın. Birdən məlumatsız oxucu elə bilər ki, şəhər statusu almış Xırdalanın ab-havasından, gözəlliyindən, küçələrə vurulan par-parlayan parketindən... Yox, parketi kabinetə vururlar. Küçəyə asfalt vururlar, amma Xırdalanın küçələrinə deyil. Xırdalanın küçələrinə ona görə asfalt vurmurlar ki, İcra Hakimiyyətindən belə deyirlər: ""Azərsu" ASC kanalizasiya borularını yeniləyir, nə zaman işlərini bitirsələr, o zaman asfalt vurulacaq."

"Azərsu" isə deyir ki... Yox, onlar heç nə demirlər. İşlərini də bitirmirlər. Onlar da işlərini bitirmədikləri üçün 2 ildən çoxdur Xırdalanda yaşayan on minlərlə insan olmazın zülmlərini çəkirlər. Qısası, İcra Hakimiyyəti atır "Azərsu"nun üstünə, "Aazərsu" isə deyir, "işləyirlər".

Amma Abşeron rayon İcra Hakimiyyətinin vəzifəsi olan iş təkcə bu deyil. Axı "Azərsu"nun illərdir xarabazara çevirdiyi Heydər Əliyev prospektindən başqa da Xırdalan şəhərində küçələr var. Misal üçün Mehdi Heseynzadə küçəsi, Qalubiyyə küçəsi. Hansı ki, adı şəhər olan, amma əslində isə kənddən fərqlənməyən ərazinin ən böyük və hərəkətli küçələrindəndir.

Yazmaqla qurtaran dərd deyil. Ona görə də aşağıda təqdim etdiyimiz videoya baxın. İnandırıcı deyil ki, Abşeron rayon İcra Hakimiyyətinin başçısı İradə Gülməmmədovanın hazırladığımız reportajdakı vəziyyətdən xəbəri yoxdur. Yox, xəbəri yoxdursa, bircə dəfə də olsun səhər işə gələndə və ya axşam evə gedəndə sürücüsünə Xırdalan şəhərinin başqa küçələrindən sürməyi tapşırsın. Xalqın içindən keçib, onların addımladığı küçələrin vəziyyətini yaxından görsün.