Beynəlxalq Valyuta Fondunun idarəedici direktoru Kristin Laqard mayın 16-da Qazaxıstana səfər edəcək. FaktXəbər bildirir ki, bu barədə ölkənin Milli Bankının mətbuat xidməti məlumat yayıb.

Kristin Laqard Astana İqtisadi Forumu və hərtərəfli inkişaf üçün iqtisadi siyasət tədbirləri mövzusunda regional dəyirmi masada iştirak edəcək.

Dəyirmi masada baş nazir Askar Mamin, Milli Bankının sədri Yerbolat Dosayev, Qafqaz və Mərkəzi Asiya ölkələri, Monqolustan və Avrasiya İqtisadi Birliyinə üzv ölkələrin mərkəzi bank və maliyyə nazirlərinin rəhbərləri, beynəlxalq maliyyə qurumları və akkreditə olunmuş səfirliklərin nümayəndələri iştirak edəcəklər.

Tədbir zamanı regionda mövcud iqtisadi vəziyyət, davamlı və əhatəli iqtisadi artımın təmin edilməsinə dair tədbirlərin müzakirəsi planlaşdırılır.

Dəyirmi masa iştirakçıları aşağıdakı məsələlər üzrə fikir mübadiləsi aparacaqlar:

"Maliyyə sektorunun möhkəmləndirilməsi və bankların maliyyə resurslarınının kifayət qədər mövcudluğunu təmin etmək üçün biznes modellərini necə dəyişməsi;

Özəl sektorun fəaliyyətini stimullaşdırmaq, iqtisadiyyatı diversifikasiya etmək və yeni iş yerləri yaratmaq üçün biznes mühitinin yaxşılaşdırılması;

İdarəetmə sisteminin təkmilləşdirilməsi və dövlət orqanlarının inzibati effektivliyinin artırılması".

Tədbirin sonunda BVF-nin icraçı direktoru Qazaxıstan və xarici mətbuat nümayəndələri üçün brifinq keçirəcək.