Qazaxıstan Prezidentu Nursultan Nazarbayev hökuməti istefaya göndərib. 

FaktXəbər bildirir ki, bu barədə hökumətin rəsmi saytında məlumat verilib.

"Qazaxıstan Respublikası Konstitusiyasının 70-ci maddəsini əsas tutaraq Qazaıxstan hökumətini istefaya göndərirəm", - mətndə bildirilir.

Həmçinin qeyd edilir ki, müvəqqəti olaraq baş nazir vəzifəsini Əsgər Mamin icra edəcək.

Hökumət üzvləri Nazirlər Kabinetinin yeni tərkibi təsdiqlənənə kimi öz vəzifələrini icra edəcəklər.

Bir müddət əvvəl Nazarbayev qeyd etmişdi ki, hökumət Milli Bankla birlikdə iqtisadiyyatın keyfiyyətli artımı üçün real stimul və alətlər yaratmağı bacarmayıb və istefaya getməlidir. 

"Öncəki illərdə sosial-iqtisadi vəziyyət sabit olub. Bu, əlbəttə ki, müsbət haldır. Amma indiki zəmanə üçün bu, kifayət deyil", - N.Nazarbayev deyib.

Onun sözlərinə görə, icra orqanlarının formal yanaşması nəticəsində əhalinin sosial cəhətdən həssas təbəqəsi ünvanlı sosial yardım ala bilməyib. Prezident hökumət üzvlərinin, nazirlərin, akimlərin əhali ilə necə işləməyi, onların problemlərini dinləməyi, həyata keçirilən işləri və siyasəti necə izah etməli olduqlarını bilmədiklərini vurğulayıb.

O qeyd edib ki, yeni hökumət həyat səviyyəsinin yaxşılaşdırılması və iqtisadiyyatın stimullaşdırılması üzrə effektiv addımlar atmalıdır.